லவ் ஸ்டோரி-சாதி மொழி நாடு கடந்தது எங்கள் காதல்!

இயக்குநர் கரு.பழனியப்பன்

இயக்குநர் கரு.பழனியப்பன் இலக்கியம் தொடங்கி சினிமா வரைக்கும் கற்றுத் தேர்ந்தவர். செறிந்த உரையாடலில் கைதேர்ந்தவர். திராவிட அரசியலின் அத்தனை பரிமாணங்களும் அத்துபடி. அவரின் ‘பார்த்திபன் கனவு’ இன்னமும் ஞாபகமிருக்கும் புதுப்படைப்பு. இனி அவரது நாடு கடந்த லவ் ஸ்டோரியை அவர் வார்த்தைகளில் கேட்கலாம்.

பள்ளியில் ஆண், பெண் என சேர்ந்துதான் படித்தோம். என்னோடு படித்த ஷீலாவோடு விடுமுறை தினங்களில் சினிமாவிற்குப் போவோம். எங்க அப்பா ‘யாரை வேண்டுமானாலும் வீட்டுக்கு வரச்சொல்லு. இங்கிருந்து போங்க. நீங்க எங்க போறீங்கனு தெரியணும் இல்லையா’னு கேட்பார்.
அமெரிக்கன் கல்லூரிக்கு படிக்கப் போனதும் ‘பள்ளிக்கும், கல்லூரிக்கும் வேறுபாடு என்ன காண்கிறீர்கள்’ என பேராசிரியர் கேட்க, ‘கூட பெண்கள் இல்லாதது ஒரு மாதிரியாக இருக்கிறது’னு சொன்னேன்.