மனிதனுக்கும் ஆடுகளுக்கும் இடையிலான உறவு ஆரம்பித்து பத்தாயிரம் வருடங்களுக்கு மேல் ஆகிவிட்டன. கி.மு. 8000ல் மேற்கு ஆசியாவில் வாழ்ந்து வந்த பழங்குடிகள் உணவு தேடி காட்டுக்குள் சென்றனர்.

அப்போது அவர்களது பார்வையில் அதற்கு முன்பு பார்த்திராத ஓர் உயிரினம் தென்பட்டது. அதுதான் ஆடு. அதை வேட்டையாடி, அதன் இறைச்சியைப் பழங்குடிகள் ருசித்தனர். மற்ற இறைச்சிகளைவிட ஆட்டிறைச்சியின் சுவை பழங்குடிகளை வெகுவாக ஈர்த்தது. அடுத்த நாளும் ஆட்டை வேட்டையாடச் சென்றனர்.

இந்த ஆடு வளர்ப்புப் பயணம் மேற்கு ஆசிய நாடுகளில் ஆரம்பித்து, ஆப்பிரிக்கா, அமெரிக்கா என உலகம் முழுவதும் பரவியது.

கி.மு. 5000ல் இறைச்சிக்காக மட்டுமல்லாமல் பாலுக்காகவும் ஆடுகளைத் தனியாக வளர்க்க ஆரம்பித்தான் மனிதன். அதனுடைய எலும்புகளை ஆயுதமாக பயன்படுத்தினான். ரோமம் மற்றும் தோலைக் கொண்டு ஆடைகளை உருவாக்கினான். அத்துடன் ஆட்டின் சாணத்தை எரிபொருளாகப் பயன்படுத்தினான். இப்போதும் பால், இறைச்சி, தோல் மற்றும் ரோமத்துக்காகவே ஆடுகள் வளர்க்கப்படுகின்றன.

இன்று 300 வகையான ஆடுகள் இருக்கின்றன. உலகம் முழுவதும் உள்ள ஆடுகளின் எண்ணிக்கை 100 கோடியைத் தாண்டும். இதில் 96 சதவீத ஆடுகள் வளர்ந்த நாடுகளில் மட்டுமே உள்ளன.

கிழக்கு ஆப்பிரிக்காவில் உள்ள முக்கியமான ஒரு நாடு, உகாண்டா. அங்கே உள்ள கியோடெரா நகரிலிருந்து நாற்பது கிலோ மீட்டர் தொலைவிருக்கும் ஒரு கிராமத்தில் பிறந்தார் கிரேஸ் வோஜி. இவருடைய தந்தை வாழைப்பழ விவசாயம் செய்து வந்தார். கிரேஸின் ஊரில் பெண்களுக்குக் கல்வி என்பது எட்டாக்கனியாகவே இருந்தது. விவசாயம் செய்து ஈட்டிய வருமானத்தில் கிரேஸைப் படிக்க வைத்தார் அவரது தந்தை. அந்தக் கிராமத்திலேயே கல்லூரிக்குச் சென்று படித்த ஒரே பெண் கிரேஸ்தான். மட்டுமல்ல; வெளியூரில் வேலைக்குச் சென்ற ஒரே பெண்ணும் இவரே.

‘ஒரு பெண்ணாக எப்படி பண்ணையைக் கவனித்துக் கொள்வாய், ஆடுகளைத் திருடிக்கொண்டு போய்விடுவார்கள், தனியாக இருந்தால் யாராவது வந்து தாக்கிவிடுவார்கள்...’ என்று வீட்டிலும், சமூகத்திலும் கிரேஸுக்கு நிறைய எதிர்ப்புகள் கிளம்பின. இதையெல்லாம் மீறி ஆடு வளர்ப்பில் இறங்கினார்.

முதல் இரண்டு வருடங்கள் ஆடு வளர்ப்பு ரொம்பவே கடினமாக இருந்தது. உள்ளூர் விவசாயிகளின் வழிகாட்டுதலுடன் சிலரை வேலைக்கு அமர்த்தி ஆடுகளை வளர்த்தார். ‘வோஜி ஃபார்ம்ஸ்’ என்று ஒரு பிராண்டிங்கை உருவாக்கினார். சமூக வலைத்தளங்களில் மார்க்கெட்டிங் செய்து ஆடுகளை விற்றார். அத்துடன் அருகிலிருக்கும் நாடுகளுக்கு ஆடுகளை ஏற்றுமதியும் செய்கிறார் கிரேஸ்.