ஆம். ஆச்சரியமேதான்! வீடற்றவராக +2 மாணவி மோனிஷா வசிப்பது, சென்னை வால்டாக்ஸ் பகுதியில் உள்ள சாலையோரம். “எனக்கு வசிக்க வீடில்லை. சிறுவயதில் இருந்தே சாலையோரத்தில்தான் என் வாழ்க்கை...” என்கிற மோனிஷா, சத்தமில்லாமல் கூடுதலாக இன்னொரு சாதனையையும் ஏற்கனவே நிகழ்த்தியிருக்கிறார்.

ஆம். ஒருகாலத்தில் கிரிக்கெட்டில் ஆதிக்கம் செலுத்திய இங்கிலாந்தின் கோட்டைக்குள், அவர்களின் பெருமைமிகு லாட்ஸ் மைதானத்தில் 2019ல் வைஸ் கேப்டனாக  நுழைந்து, இங்கிலாந்து வீரர்களை எதிர்த்து விளையாடி, ‘தெருவோரக் குழந்தைகளுக்கான உலகக் கோப்பையை’ வென்று வந்திருக்கிறார். இந்த நிகழ்வுக்குப்பின் ஊடகங்களின் பார்வையில் அப்போதே மோனிஷா விழுந்திருக்கிறார்.

வால்டாக்ஸ் சாலையில் மோனிஷாவின் சாலையோர வசிப்பிடம் தேடி சென்றால் புன்னகையுடன் நம்மை வரவேற்றார். இதுதான் என் வீடென மோனிஷா கை நீட்டியது சின்னதாக அட்டைப்பெட்டி மாதிரி தகரத்தால் அடைக்கப்பட்டிருக்கும் ஒரு சிறிய அறை. ‘‘இதை எங்கள் வீடுன்னு சொல்ல முடியாது.

இங்கிருக்கிற முப்பது குடும்பத்திற்கும் இது பொதுவான வீடு. இதில்தான் பெண்களான நாங்கள் உடை மாற்றுகிறோம். மற்றபடி குளிப்பது, காலைக் கடன்களை முடிப்பதெல்லாம் சாலையோரம் உள்ள கட்டணக் கழிப்பறையில்தான்.

மழை, வெயிலென எதுவானாலும எங்களுக்கு வாழ்க்கை தெருவோரம்தான்...” என்கிற மோனிஷா சிறு வயதிலேயே தன் அப்பாவை இழந்திருக்கிறார். அம்மா சென்னை மாநகராட்சியில் நகரசுத்தி தொழிலாளியாக வேலை செய்து வருகிறாராம்.‘‘வால்டாக்ஸ் சாலையில் நிறைய கார்கோ மூவர்ஸ் இருக்கிறார்கள்.

அவர்களுடைய டிராலி, ரிக்‌ஷா போன்றவற்றை இரவில் சாலையோரங்களில்தான் நிறுத்தி வைப்பார்கள். பெரும்பாலும் நாங்கள் இரவில் அதில் ஏறித்தான் படுத்துத் தூங்குவோம். வயது பெண்களான எங்களுக்கு இதனால் பாதுகாப்பு இல்லாத சூழல்தான். இருந்தாலும் எங்களுக்கு வேறு வழியில்லை.

இரவில் சிலரோட பார்வை சரியாகவே இருக்காது. ரொம்பவே ஏளனமாகவும் சிலர் எங்களைப் பார்ப்பார்கள். சிலர் தண்ணி அடிச்சுட்டு வந்து சாலையில் படுப்பார்கள். பல இரவுகள் எனக்கு இதனால் சரியான தூக்கம்கூட வராது...’’ என்றவர், எங்களுக்கு மட்டும் ஏன் இந்த நிலை, நாங்கள் மட்டும்  ஏன் இவ்வளவு கீழே தாழ்ந்து வாழ்கிறோம் என்கிற கேள்வியை நா தழுதழுக்க அழுத்தமாகவே நம்முன் வைக்கிறார்.

‘‘எங்களுக்குன்னு ஒரு வீடு, எங்களுக்குன்னு சில அடையாளம் இருந்தால்தானே எங்களாலும் இருப்பிடச் சான்று, சாதிச் சான்று, ஆதார் அட்டை, ரேஷன் அட்டை போன்றவற்றைப் பெற முடியும்..? தேர்தல் நேரத்தில் மட்டும் எங்களை வந்து சந்திக்கும் அரசியல்வாதிகள், அதிகாரிகள் அதன்பிறகு சுத்தமாகக் கண்டுகொள்வதில்லை.

‘‘உலகக் கோப்பையை நாங்கள் வென்று வந்தபோது, தெருவோரக் குழந்தைகள்தானே, நம் வெற்றியை நமது நாட்டில் மதிப்பார்களா... நம்மைக் கொண்டாடுவார்களா... என்றுதான் முதலில் நினைத்தோம். ஆனால், மீடியாக்கள் தொடர்ந்து எங்களைத் தேடிவந்து நிறையவே எங்களை செய்தியாக்கினார்கள்.

சன் தொலைக்காட்சி எங்களை ஏர்போர்ட்டில் வந்து முதலில் பேட்டி எடுத்து அன்றே செய்தியாக வெளியிட்டார்கள்...’’ எனப் புன்னகைத்தவர், ‘‘பக்கத்து ஊருக்குக்கூட போகமுடியாத எங்களை லண்டன்வரை அனுப்பி வைத்த பெருமை, சென்னை தண்டையார்பேட்டையில் இருக்கும் ‘கருணாலயா’ தொண்டு நிறுவனத்தைத்தான் சேரும்.