‘‘பிறந்தது, வளர்ந்தது எல்லாமே சென்னைலதான். பதினைஞ்சு வருஷமா ஃபீல்டுல இருக்கேன். சினிமா பேக்ரவுண்ட் என்பது எங்க ஜெனரேஷனுக்கே இல்லை. நான்தான் முதன் முறையா சினிமாவுக்கு வந்திருக்கேன். படிச்சது பி.எஸ்சி. இண்டீரியர் டிசைனிங். சினிமாவில் ஆர்ட் டைரக்டராகணும்னு ஆசைப்பட்ட எனக்கு சினிமா பூஜை, ஆடியோ ஃபங்ஷன், புரோமோஷன் நிகழ்ச்சிகள் போன்ற வாய்ப்புகள் கிடைச்சது.

எந்தவித முன் அனுபவமும் இல்லாத என்மீது நம்பிக்கையோடு ‘பீட்சா’, ‘அட்டகத்தி’ படங்களோட ஈவண்ட்டை நடத்தும் வாய்ப்பை தயாரிப்பாளர் சி.வி.குமார் சார் கொடுத்தார். சன் டிவி நிகழ்ச்சிகளுக்கும் செட் ஒர்க் பண்ணியிருக்கிறேன்...’’ என்கிற நர்மதா முதல் சினிமா அனுபவத்தை பகிர்ந்தார்.

ஷூட் முழுவதும் வறண்ட பகுதியில் எடுத்தார்கள். நிழலில் ஒதுங்க இடம் இருக்காது, பாத்ரூம் வசதி இருக்காது. அப்படி சில நடைமுறைச் சிக்கல் இருந்ததால லேடி ஆர்ட் டைரக்டரான நான் எப்படி சமாளிக்கப் போறேன்னு கேள்வி இருந்துச்சு.எனக்கு மட்டுமல்ல, மொத்த டீமுக்கும் சவால் இருந்துச்சு.

ஆக்ச்சுவலா நான் இரண்டாவது ஷெட்யூலில்தான் ஜாயின் பண்ணினேன். முதல் ஷெட்யூலில் வேற ஒரு ஆர்ட் டைரக்டர் ஒர்க் பண்ணியிருந்தார். நடுவுல லாக்டவுன் காரணங்களால் இரண்டு வருஷம் தாமதம் ஏற்பட்டது. மறுபடியும் படப்பிடிப்பு தொடங்கினப்ப ஊரே மாறியிருந்தது. முந்தைய ஆர்ட் டைரக்டர் பண்ணிய ஒர்க்கை அப்படியே மேட்ச் செய்து பண்ணுவது கடினமா இருந்துச்சு.

திருவிழா செட்டப், கபடி கிரவுண்ட் என படத்துல நீங்க பார்த்த பல விஷயங்கள் செட் ஒர்க். இயக்குநர் விக்ரம் சுகுமாரன் சார் கொடுத்த சுதந்திரத்தாலதான் என்னால் அப்படி ஒர்க் பண்ண முடிஞ்சது...’’ என்றவர் சினிமா டிஜிட்டலுக்கு மாறிய நிலையில், கலை இயக்குநர்களுக்கான வேலை வாய்ப்பு எப்படியிருக்கிறது என்பதையும் பகிர்கிறார்.

‘‘சினிமா என்னதான் டெக்னாலஜியில வளர்ந்தாலும் ஆர்ட் டிபார்ட்மெண்ட் இல்லாம ஒர்க் பண்ணமுடியாது. கிராஃபிக்ஸ் காட்சிகள் எங்கு தேவைப்படுகிறது என்றால் செட் போட நேரம் இல்லாத சமயத்தில். பட்ஜெட், டைம், ஆர்ட்டிஸ்ட் கால்ஷீட் இல்லாத சமயத்தில் கிராஃபிக்ஸ் ஆப்ஷனுக்கு போய்த்தான் ஆகவேண்டும்.

பெண் என்பவள் பிறக்கும்போதே மல்டி டாஸ்க்குடன் பிறக்கிறார். பெண்களால் பத்து விஷயத்தை ஒரே சமயத்துல பண்ண முடியும்.

ஆண்களால் முடியாதுனு சொல்லவில்லை. விவாதம் என்று வரும்போது என்னால் இந்த வாதத்தை முன் வைக்க முடியும். ஆக்ச்சுவலா பெண்களிடம் ரெஸ்பான்ஸ் பற்றி கேள்வியே கேட்கக் கூடாது. அது அவர்கள் பிறவியிலே கலந்தது...’’ என்ற நர்மதா பர்சனல் பக்கங்களையும் புரட்டுகிறார்.‘‘சினிமா என்று வரும்போது கஷ்டம் இருக்கும்னு இருநூறு சதவீதம் தெரிஞ்சுதான் உள்ளே வந்தேன். சினிமாவுல என்னால் சுதந்திரமா செயல்பட முடிகிறது என்றால் அதற்கு காரணம் என்னுடைய குடும்பம். மாமியார், கணவர் எல்லோருமே சப்போர்ட் பண்றாங்க.