இந்தியாவில் அதிகமாக விற்பனையாகும் எஸ்யூவி வகை கார்களில் ஒன்று, ‘மஹிந்திரா தார்’. முரட்டுத்தனமான தோற்றம்தான் ‘தார்’ காரின் வசீகரித்துக்கும், விற்பனைக்கும் காரணம் என்கின்றனர் நிபுணர்கள். இந்த முரட்டுத்தனமான டிசைனுக்கு பின்னணியில் இருப்பது ஒரு பெண்! அவரது பெயர், ராம்கிருபா ஆனந்தன்; சுருக்கமாக கிருபா. 

‘தார்’ மட்டுமல்ல, மஹிந்திராவின் ‘டியூவி300’, ‘எக்ஸ்யூவி500’, ‘எக்ஸ்யூவி300’, ‘மாரசோ’, ‘கேயூவி100’, ‘எக்ஸ்யூவி700’ மற்றும் ‘பொலேரோ’ ஆகிய கார்களின் டிசைன்களுக்குப் பின்னணியில் இருப்பதும் கிருபாதான். ஆண்கள் மட்டுமே ஆதிக்கம் செலுத்தும் கார் டிசைனிங் துறையில் ஒரு பெண் சாதித்திருப்பது சமீபத்தில்தான் இணைய வெளிச்சத்துக்கு வந்திருக்கிறது.

சிறு வயதிலிருந்தே கார்களின் மீது பெருங்காதல் கொண்ட கிருபா, 1971ம் வருடம் பிறந்தார். லண்டன், பாரிஸ் போன்ற நகரங்களில் நடக்கும் ஆட்டோ ஷோக்களுக்கு செல்வது கிருபாவுக்குப் பிடித்தமான ஒரு பயணம். ஐரோப்பாவின் பெரு நகரங்களின் சாலைகளின் ஓரத்தில் அமர்ந்துகொண்டு, அந்த சாலையில் பீறிட்டுச் செல்லும் லம்போர்கினி, ஃபெராரி  கார்களைக் காண்பதுதான் அவரது முக்கிய பொழுதுபோக்கு. 

தனக்குப் பிடித்தமான துறையிலேயே படிக்கவும் செய்தார். ஆம்; இந்தியாவின் புகழ்பெற்ற கல்வி நிறுவனமான பிட்ஸ் பிலானியில் மெக்கானிக்கல் எஞ்சினியரிங் படித்தார். பிறகு மும்பையிலிருக்கும் ஐஐடியின் ஒரு பகுதியாக இயங்கி வரும் ஐடிசி ஸ்கூல் ஆஃப் டிசைனில் சேர்ந்து, மாஸ்டர் ஆப் டிசைன் பட்டத்தைப் பெற்றார்.

2007ம் வருடம் இருபது பேர் கொண்ட குழுவுடன் சேர்ந்து புது வகையான எஸ்யூவி காரை டிசைன் செய்ய ஆரம்பித்தார். அப்போது உலகிலேயே புதிதாக ஒரு மாடல் காரை டிசைன் செய்வதற்காக நியமிக்கப்பட்ட ஒரே பெண் டிசைனர் கிருபாதான். 

சிறுத்தையை மாடலாக வைத்து எஸ்யூவி காரை டிசைன் செய்ய ஆரம்பித்தார். கிருபா மற்றும் அவரது குழுவினரின் நான்கு வருட கடின உழைப்புக்குப் பிறகு நிறைவான வடிவத்தை அடைந்தது அந்த கார். அதன் மாடலின் பெயர், ‘எக்ஸ்யூவி500’. 2011ல் ‘எக்ஸ்யூவி 500’ வெளியாகி, விற்பனையில் சக்கைப்போடு போட்டது.

நாளுக்கு நாள் கார் டிசைனிங்கில் கிருபாவின் செல்வாக்கு அதிகரித்துக்கொண்டே சென்றது. 2019ம் வருடத்தில் ‘மஹிந்திரா’ நிறுவனத்தின் முதன்மை டிசைனராக நியமிக்கப்பட்டார் கிருபா. ஆனாலும் சமீப நாட்களில்தான் ‘தார்’ காரை டிசைன் செய்தது ஒரு பெண் என்று ராம்கிருபாவின் பெயர் சமூக வலைத்தளங்களில் பரவலாகியது. 

இரண்டு வருடங்களுக்கு முன்பு, ‘மஹிந்திரா’ நிறுவனத்திலிருந்து வெளியேறிய கிருபா, ‘கிரக்ஸ் ஸ்டூடியோ’ எனும் டிசைனிங் நிறுவனத்தை சொந்தமாகவே ஆரம்பித்துவிட்டார். அத்துடன் ‘ஓலா எலெக்ட்ரிக்’ வாகனத் தயாரிப்பு நிறுவனத்தின் தலைமை டிசைனராகவும் பணிபுரிந்து வருகிறார்.