வறுமையில் பிறந்து தன் அறிவாலும் நல்லோர் உதவியாலும் மேற்படிப்பை எட்டிய மாணவன் மணிவண்ணன் ‘ரோல்மாடல்’ பகுதியில் இடம்பெற்றிருக்க வேண்டியவன். அதுவரை பொறுத்திராமல் முடிவு தேடிக் கொண்ட அவனை நினைத்தால் நெஞ்சம் விம்முகிறது!

‘கறுப்புதான் உலகத்துக்கே பிடிச்ச கலரு’ என்று கிளம்பியிருக்கும் ‘வாவ்’ அமைப்பை பாராட்டி வரவேற்று நாம் ‘சிவப்புக் கம்பளம்’ விரிக்கலாமா... கூடாதா? டவுட்டா இருக்கு பாஸ்..!

வாராவாரம் தென்றலாகவும் சூறாவளி காற்றாகவும் வீசிய பழநிபாரதியின் ‘காற்றின் கையெழுத்து’ விரைவாக முடிந்தது ஏமாற்றம் தந்தது. ஆனால், மனுஷ்யபுத்திரன் எழுதும் புதிய பகுதி பற்றிப் படித்தவுடன், ஏமாற்றம் மறைந்து எதிர்பார்ப்பு பெருகியது!

சட்டசபையில் பிட்டு படம் பார்த்த மந்திரிகளை நகைச்சுவையாக நையப் புடைத்து விட்டது ‘நயம்பட பேசு!’ யப்பா ஆல்தோட்ட பூபதி... நீ கலக்கு நைனா!

‘இறந்த பின்னும் தன் காதலனை மானசீகமாக மணந்தார் நிறைமாத கர்ப்பிணி’. கோடம்பாக்க அசிஸ்டென்ட்டுகள் தயாரித்த ஒன்லைன் போலவே இருக்கும் இந்தச் செய்தி, நிஜத்தில் நடந்தது என்பதை நம்பவே முடியவில்லை!

‘ஒரு முதியோர் இல்லம் தோன்றினால் நூறு கூட்டுக் குடும்பங்கள் சிதைகின்றன’ என்று 35 வருடங்களுக்கு முன்பே பிரசாரம் செய்த முதியோர் நல மருத்துவர், வி.எஸ்.நடராஜனைப் பாராட்டியே தீர
வேண்டும்!

பாவம்ங்க காண்டாமிருகம். அதோட இனமே அழியுற நிலையில இருக்காம்... இதுல காண்டாமிருகக் கொம்பு நமக்கு பலான பலத்தைக் கொடுக்குமாம். மூட நம்பிக்கைக்கும் ஒரு முகாந்திரம் வேணாம்?

அடுத்தடுத்து மூன்று படங்கள் என்ற அஜித்தின் அதிரடி டைம் டேபிள்... நமக்கெல்லாம் விருந்து படைக்கப் போகும் டைனிங்டேபிள்தான் போங்க!

ஓவியக் கண்காட்சிகளைப் பற்றியே கேள்விப்பட்ட காதுகளுக்கு ஹியூமராலஜி புதுசாக இருந்தது. வயிறு குலுங்க சிரிக்க வைத்து மொத்த உடலுக்கும் புது உற்சாகம் கொடுத்து விட்டது! பிரபல கார்ட்டூனிஸ்டுகளும் ‘ஹியூமராலஜி’ நடத்த வேண்டும் என்று எதிர்பார்க்கிறோம்!

உறவுகளுக்குப் புது அர்த்தம் கொடுக்கிறது ‘விஜயா டீச்சர்’ தொடர்கதை. தொய்வில்லாமல் கதையோட்டம் செல்வதும் நன்று.