கோவிட் பலரது வாழ்விலும் பல மாற்றங்களை ஏற்படுத்தியது என்பது உண்மையே. குறிப்பாக மாணவர்கள் பயிலவும், அவர்களுக்கு பாடங்களை கற்றுக் கொடுக்கவும் ஆசிரியர்கள் மிகவும் கஷ்டப்பட்டனர். தினமும் நேரடியாக பாடங்களை கற்றுவித்த ஆசிரியர்கள் ஆன்லைன் முறையில் வகுப்பினை எடுக்கும் கட்டாயத்திற்கு தள்ளப்பட்டனர். 

அப்படிப்பட்ட நிலையில் கல்வி கற்பிப்பதில் புதுமையை புகுத்தி மாணவ, மாணவியருக்கு கல்வி கற்றலை எளிதாக்கி தந்தவர் விழுப்புரத்தைச் சேர்ந்த ஹேமா டீச்சர். கல்வி கற்பிப்பதில் புதுமையினை புகுத்தியதற்காக இவர் சிறந்த ஆசிரியர் என்ற விருதும் பெற்றுள்ளார்.

33 வருடங்களாக ஆசிரியப் பணியில் இருக்கும் இவர் ஆசிரியை பணி மட்டுமில்லாமல் குடும்ப நல ஆலோசகர், தெருக்கூத்து கலைஞர், ஓவியர், சமூக செயல்பாட்டாளர், பண்டைய நாணயங்கள் சேகரிப்பாளர், சூழலியல் ஆய்வாளர் என பல முகங்கள் கொண்டுள்ளார். இதுவரை ஆறு பள்ளிகளில் தன் ஆசிரியர் பணியினை மேற்கொண்டுள்ளார்.

‘‘என்னுடைய இந்த 33 வருட ஆசிரியர் பணியில் நான் நீண்ட காலம் வேலை பார்த்து வந்தது செ.குன்னத்தூரில் உள்ள அரசு உயர்நிலைப் பள்ளியில்தான். அங்கு 11 ஆண்டு பணிபுரிந்தேன். அதன் பிறகு மற்ற பள்ளிகளில் ஆறு முதல் ஏழு வருடங்கள் பணிபுரிந்து வந்த நான் தற்போது விழுப்புரத்தை சேர்ந்த அரசு உயர்நிலை பள்ளியில் பணிபுரிந்து வருகிறேன்.

எனக்கு சேவை மனப்பான்மை அதிகம். அதனால் நான் வேலை பார்க்கும் பள்ளியின் வளர்ச்சிக்கு என்னால் முடிந்த அளவு நிதியுதவி செய்து வருகிறேன். இதற்கான விருது அல்லது பாராட்டு கிடைக்கும் என்று எதையும் எதிர்பார்த்து நான் செய்வதில்லை” என்று கூறியவருக்கு 2019-20ம் ஆண்டில் “மாநில நல்லாசிரியர் விருது” கிடைத்துள்ளது. 

அதே வருடம் “கல்வியில் புதுமை ஆசிரியை” என்ற விருதும் பெற்றுள்ளார். தன் சொந்த செலவில் கற்றல், கற்பித்தல் உபகரணங்களை மாணவர்களுக்கு அளித்ததற்காக இவருக்கு இந்த விருது வழங்கப்பட்டது. மேலும் பாரதப் பிரதமரால் “மனதின் குரல்” நிகழ்ச்சி மூலம் பாராட்டையும் பெற்றுள்ளார் ஹேமலதா.