மலையாளத்தில் ஒரு பாகுபலி

கோடிகளை அள்ளுகிறது காயம்குளம் கொச்சுண்ணி, மலையாளத் திரைப்படம்.கேரளாவில் திரையிடப்பட்ட முதல்நாளில் மட்டும் 1700 காட்சிகளில் ஐந்தரைக் கோடி ரூபாய் வசூலை வாரியிருக்கிறது.1817 முதல் 1858 வரை வாழ்ந்த கேரளத்து ராபின்ஹுட் கொச்சுண்ணியின் வாழ்க்கை நிகழ்வுகளே இந்தப் படத்தின் கதை.

கொட்டாரத்தில் சங்குண்ணி என்பவர் நூலை அடிப்படையாகக்கொண்டும், கொச்சுண்ணியைப் பற்றிய வரலாற்று ஆய்வுகளைத் திரட்டுவதற்கு அமைக்கப்பட்ட குழு வழங்கிய தகவல்களின் தொகுப்பைக்  கொண்டும்  பாபி மற்றும் சஞ்சய் இணைந்து திரைக்கதையை உருவாக்கி உள்ளனர்.

பெயரைச் சொன்னாலே தாழ்த்தப்பட்ட மக்கள் வாழும் பகுதி என அறியப்பட்ட காயம்குளம் கிராமத்தில் பிறந்து, பத்து வயதில் ஊரைவிட்டு வெளியேறி, வேறொரு ஊரிலுள்ள பிராமண அக்ரஹாரத்தில் அடைக்கலம் புகுந்து, அவர்களால் அவமானம், திருட்டுப்பட்டம் அடைந்து, வேறு வழியில்லாமல் கொள்ளையனாக மாறி, அதில் திரட்டிய பணத்தையும் நகைகளையும் தனது ஊர் மக்களுக்கு வழங்கிய கொச்சுண்ணியின் உண்மைக்கதை இது.

கொச்சுண்ணி கதாபாத்திரத்துக்கு அடுத்த சாய்ஸே தேவைப்படாமல் நிவின் பாலியைத் தேர்வு செய்திருக்கிறார் இயக்குநர் ரோஷன் ஆண்ட்ரூஸ். இடைவெளி விட்டு விட்டு படப்பிடிப்பு நடந்ததால், ஒப்புக்கொண்ட படங்களில் நடிக்கமுடியாமல் மூன்று படங்களின் வாய்ப்பை இழந்திருக்கிறார் நிவின்.

இந்தப் படத்துக்காக தலைமுடியை ஒட்ட வெட்டிக்கொண்ட அவர், தன்னுடன் நடிக்கும் பாபு ஆண்டனி மற்றும் சன்னிவேன் ஆகியோருடன் கொச்சியில் உள்ள ஆண்ட்ரூஸ் தற்காப்புக் கலைப் பள்ளியில் களரிப்பயட்டு மற்றும் குதிரையேற்றப் பயிற்சிகளை முறைப்படி கற்றிருக்கிறார். நிவினுடைய 34ஆவது பிறந்தநாளான அக்டோபர் 11ஆம் தேதியில் படத்தை வெளியிட்டு, நிவினுக்குப் பெருமை சேர்த்திருக்கிறார் இயக்குநர் ஆண்ட்ரூஸ்.

இத்திக்கா பக்கி என்கிற கொள்ளையர் தலைவனாக சிறப்புத் தோற்றத்தில்  நடித்திருக்கிறார் மோகன்லால். 12 நாட்கள் கால்ஷீட்டில் நடித்த அவர், மூன்று  மணிநேரப்  படத்தில், நாற்பது நிமிடங்களே வந்தாலும் உடல்மொழியால் அசத்தி,  கதாபாத்திரத்துக்கு உயிர்கொடுத்து கைதட்டல்களை அள்ளிச்   செல்கிறார்.

நாயகியாக முதலில் ஒப்பந்தமானவர் அமலாபால். அவர் கொடுத்த தேதிகளில்  படப்பிடிப்பை நடத்த முடியாததால் பிரியா ஆனந்த் இவ்வாய்ப்பைப்  பெற்றிருக்கிறார். இந்தப் படத்துக்காக மூன்று படங்களை இழந்திருக்கிறார் அவரும்.

‘உதயனானு தாரம்’, ‘நோட்புக்’, ‘எவிடம் சொர்க்கமானு’, ‘மும்பை போலீஸ்’, ‘ஹவ் ஓல்டு ஆர் யூ’ ஆகிய ஹிட் படங்களை இயக்கிய ரோஷன் ஆண்ட்ரூஸ் இயக்கியுள்ள படம் இது. இவரது இயக்கத்தில் வெளிவந்த ‘ஹவ் ஓல்டு ஆர் யூ’ படத்தின் தமிழ் வடிவம்தான் ஜோதிகா  நடிப்பில் வெளிவந்த ‘36 வயதினிலே’.