ஹீரோக்களுக்கும், ஹீரோயின்களுக்கும் கெமிஸ்டரி ஒர்க்அவுட் ஆகிற மாதிரி சில ஹீரோக்களுக்கும், வில்லன்களுக்கும் கெமிஸ்ட்ரி பக்காவாக ஒர்க் அவுட் ஆகிவிடும். எம்.ஜி.ஆருக்கு நம்பியார் மாதிரி சில உதாரணங்களைச் சொல்லலாம்.

அது போல ரஜினிக்கு பொருத்தமான வில்லனாக பல ஆண்டுகள் தமிழ் சினிமாவில் வலம் வருவார் என்று கணிக்கப்பட்டவர்தான் கராத்தே மணி. காரணம், இருவரும் இணைந்து ஒரு சில படங்களில் மட்டும் நடித்திருந்தாலும், அந்த ஹீரோ-வில்லன் கெமிஸ்ட்ரி அப்படி ஒர்க் அவுட் ஆகியிருந்தது.

‘அன்புக்கு நான் அடிமை’  படத்தில் ரஜினியும் கராத்தே மணியும் மோதிக் கொள்ளும் காட்சிகள் இப்போதும் இணையத்தில் பிரபலம். அடுத்து நடித்த ‘ரங்கா’ படத்தில் திருடனான கராத்தே மணியும் நல்லவரான ரஜினியும் ஒரு இரவில் சந்திப்பார்கள். அவரவர் தரப்பு வாதத்தை வைப்பார்கள்., மறுநாள் கராத்தே மணி நல்லவராகவும், ரஜினி திருடனாகவும் மாறிவிடுவார்கள்.

ஒரு குழந்தையைக் கடத்த ரஜினி முயற்சிப்பார், அதைத் தடுக்க கராத்தே மணி போராடுவார். இப்படி அடுத்த படத்திலேயே ரஜினிக்கு இணையான ஒரு இடத்தைப் பிடித்தார் மணி. இப்படத்தின் ‘பட்டுக்கோட்டை அம்மாளு’ பாட்டு இன்னும் ஹிட்டு.