முடக்குவாதம் வெண்புள்ளிகளுக்கு சித்த மருத்துவத்தில் மருந்தே இல்லை!

சித்து விளையாட்டு -3

முடக்குவாதம், வெண்புள்ளிகள் உள்ளிட்ட மரபணு நோய்களான கன்ம நோய்களைத்  தீர்க்க முடியாது என அகத்தியரே சொல்லியிருப்பதாகச் சொல்கிறார்கள். சித்த  மருத்துவத்தில் இவற்றிற்கு மருந்தில்லை என இந்தத் துறை சார்ந்தவர்கள்  சுட்டிக் காட்டுகிறார்கள்!

நாள்பட்ட ஆஸ்துமா, மூட்டு வலி மருந்துகளில் கார்டிகோ ஸ்டிராய்டை  அதிகளவில் கலக்கிறார்கள். இதைத் தொடர்ந்து சாப்பிட்டால் உடலெல்லாம் சில  வருடங்களில் வீங்கிவிடும்!இரும்புச் சத்து மாத்திரை  கெட்டுப் போகாமல் இருக்க தொடர்ந்து அதிகமான அளவு சாப்பிட்டால் சுவாசக் கோளாறுகள் மற்றும் கல்லீரல்  பிரச்னைகளை உருவாக்குவதாக ஆங்கில மருத்துவத்திலேயே அலாரம் அடிக்கும்  பென்சோயிக் ஆசிட்டை அதிகமாகக் கலக்குகிறார்கள்! ஐந்து வருடங்களுக்கு முன்பு உண்மையிலேயே மெடிக்கல் ரெப்பாக இருந்த நபர் ஒருவர் இப்போது பிரெஞ்ச் தாடியுடன் ஆண்மை மருத்துவத்தை போதித்துக் கொண்டிருக்கிறார்!

பெரிதும் நான் விரும்பிப் பார்க்கும் புலி விலங்கு சேனலில் இன்னொருவர் இறை மருத்துவம் செய்து கொண்டிருக்கிறார். அவருடைய மருத்துவத்தின் பலனாக இளம்பெண் ஒருத்தர் சமீபத்தில் இறந்து போனார். உடனடியாக அந்த மருத்துவர், தான் மருத்துவரே இல்லை, ஒருங்கிணைப்பாளர் என்று பணம் கொடுத்துத் தப்பித்துக் கொண்டார்.

பிரச்னைகள் எல்லாம் முடிந்த பிறகு மறுபடியும் ஒரு போலி எம்டி பட்டம் வந்து அவருடைய பெயருக்குப் பின்னால் ஒட்டிக் கொண்டது. அவரிடம் மட்டுமே கிட்டத்தட்ட, சித்த மருத்துவத்தை முறையாகப் பயின்ற 35 பேர் 35,000 ரூபாய் சம்பளத்திற்கு பணிபுரிந்து கொண்டிருக்கின்றனர்! அதிலிருக்கும் பெண் மருத்துவர் ஒருவர் அவருக்காகவும் பணத்திற்காகவும் சிலுவை சுமந்தார். பிற்பாடு அவரும்கூட விடுவிக்கப்பட்டார்.

முடக்குவாதம், வெண்புள்ளிகள் உள்ளிட்ட மரபணு நோய்களான கன்ம நோய்களைத் தீர்க்க முடியாது என அகத்தியரே சொல்லியிருப்பதாகச் சொல்கிறார்கள். சித்த மருத்துவத்தில் இவற்றிற்கு மருந்தில்லை என இந்தத் துறை சார்ந்தவர்கள் சுட்டிக் காட்டுகிறார்கள். ஆனால், அவற்றைத் தீர்ப்பதாக இந்த இறை மருத்துவர் சொல்லிக் கொண்டிருக்கிறார். கலெக்டருக்கு நிகரான பதவியில் இருந்த ஒருவர் வெண்புள்ளி களை நீக்குவதற்காக ஐம்பதாயிரம் ரூபாய் செலவழித்ததாகச் சொல்கையில், சாதாரணமானவர்கள் குறித்து என்ன சொல்ல?

இவரைப் போன்றவர்களிடம் போனவர்கள் மூட்டு வலி உடனடியாகக் குறைந்துவிடுவதாகச் சொல்கிறார்கள். இவர் மட்டுமா என்ன? அந்த மருந்து சாப்பிட்டால் இரண்டே நாட்களில் மூட்டு வலி குணமாகிறது என விளம்பரங்களில்கூட நிறைய வயதானவர்கள் சொல்கிறார்கள்.

சித்த மருத்துவத்தில் அதெப்படி இரண்டே நாட்களில் வயதானதன் காரணமாக உருவாகும் நாள்பட்ட மூட்டு வலி விலகும்? நாள்பட்ட ஆஸ்துமா, மூட்டு வலி மருந்துகளில் கார்டிகோ ஸ்டிராய்டை அதிகளவில் கலக்கிறார்கள் என இந்தத் துறை சார்ந்த மருந்து உற்பத்தியாளர் ஒருத்தர் சொன்னார். இதைத் தொடர்ந்து சாப்பிட்டால் உடலெல்லாம் சில வருடங்களில் வீங்கி விடுமாம்.

‘‘ஆங்கில மருந்துதானே அது. வேறொரு வகையில் அதைச் சாப்பிடத்தானே செய்கிறோம். சித்த மருந்தில் கலந்ததால் என்ன குடிமுழுகிப் போய்விட்டது...” என அறியாமையில் அவரிடம் கேட்டேன். அவர் அதற்கு விரிவாகப் பதிலளித்ததோடு மட்டுமல்லாமல், மேற்கு மாவட்டத்தைச் சேர்ந்த பிரம்ம ரிஷி ஒருவரிடம் அழைத்துச் சென்றார்.

நெஞ்சு வரை தாடியோடு இருந்த அந்த மகானின் தரிசனத்திற்காக மக்கள் அலைமோதிக் காத்துக் கிடந்தனர். வேறு வழியில்லாமல் நாங்களும்கூட கிட்டத்தட்ட இரண்டு மணி நேரம் காத்திருந்தோம். பிரம்மரிஷி பட்டத்தை யார் அவருக்குத் தந்தது? அவராகவே வைத்துக் கொண்டாராம். அழைத்துப் போன மருந்து உற்பத்தியாளர், “சாமி உங்க பெருமையைச் சொல்றதுக்காக கூப்ட்டு வந்திருக்கேன். உங்க சமீபத்திய கண்டுபிடிப்பை சொல்லுங்க...” என்றார்.