திருவல்லிக்கேணி காசி விநாயகா உணவகம்

லன்ச் மேப்

தமிழகத்திலேயே அதிகம் மெஸ்கள் உள்ள பகுதி என்றால் அது திருவல்லிக்கேணிதான். நூற்றுக்கும் மேற்பட்ட உணவகங்கள் இங்குள்ளன. காரணம், இங்கிருக்கும் மேன்ஷன்ஸ்.சென்னைக்கு வேலை தேடி வரும் ஆண்களின் சரணாலயமாக திருவல்லிக்கேணி பகுதியே பல ஆண்டுகளாகத் திகழ்ந்து வருகிறது. எனவேதான் திருவல்லிக்கேணி என்றதும் பார்த்தசாரதி கோயில், மகாகவி பாரதியார் நினைவகத்தை அடுத்து மெஸ்களே நினைவுக்கு வருகிறது.

அந்த வகையில் 48 வருடங்களாக அதே புகழுடனும் சுவையுடனும் பெருமை குன்றாமல் அக்பர் தெருவில் கம்பீரமாக நிற்கிறது காசி விநாயகா மெஸ்.
சுத்த சைவ உணவகம். எப்போதும் வாசலில் 50க்கும் மேற்பட்டவர்கள் சாப்பிடுவதற்காக காத்திருக்கிறார்கள். இன்னொரு பக்கத்தில் சாப்பாட்டுக்கு டோக்கன் வாங்க நீண்ட வரிசை.

இந்த உணவகத்தில் 37 பேர் வரை மட்டுமே அமர்ந்து சாப்பிட முடியும். அந்த அளவுக்குத்தான் டேபிள் சேர் போட்டிருக்கிறார்கள். முதல் இரண்டு வரிசைகளுக்கு வெள்ளை டோக்கன். மற்ற இரு வரிசைகளுக்கு மஞ்சள் டோக்கன். ஒரு வரிசையில் அமர்ந்திருப்பவர்கள் சாப்பிட்டு முடித்து முழுமையாக சுத்தம் செய்தபிறகே அவ்வரிசையில் அடுத்த செட்டை அமர வைக்கிறார்கள்.

இது தெரிந்தும் மக்கள் பொறுமையாகக் காத்திருந்து சாப்பிடுகிறார்கள். காரணம், சுவை, தரம், ஆரோக்கியம். இந்த உணவகத்தில் டிபன் கிடையாது. சாப்பாடு மட்டும்தான். மதியம் 12 மணிக்குத் தொடங்கி 3 மணி வரை கூட்டு, பொரியல், அவியல், அப்பளம், சாதம், சாம்பார், வத்தக்குழம்பு, ரசம், மோர், தயிர்... என சகலத்தையும் சாப்பிடலாம்.

பச்சரிசி உணவை சுடச்சுட ஒரு கிண்ணத்தில் அச்சு போல் வைக்கிறார்கள். சின்ன கிண்ணம் அல்ல. ஒரு நபர் வயிறார சாப்பிடக்கூடிய அளவு. பருப்பும் நெய்யும் கட்டாயம் உண்டு. முதல் தரமான பருப்பை விறகுஅடுப்பில் வேகவைத்து கடுகு, பச்சை மிளகாய், கறிவேப்பிலை சேர்த்து தாளித்துத் தருகிறார்கள்.

சாப்பிட்டபிறகும் பருப்பு மற்றும் நெய்யின் மணம் நம்மைச் சுற்றிச் சுற்றி வருகிறது. சின்னச் சின்ன கிண்ணங்களில் தரப்படும் வத்தக்குழம்பையும் சாம்பாரையும் ஊற்றிச் சாப்பிடுவதற்காகவே கணிசமானவர்கள் வருகிறார்கள். மிளகாய், மல்லி, மஞ்சள்தூள், கரம் மசாலா... என அனைத்தையும் தனித்த பதத்தில் வறுத்து அரைத்து சேர்க்கின்றனர். அதனாலேயே எங்கும் கிடைக்காத சுவையில் உள்ளது.

“சொந்த ஊர் துறையூர் பக்கத்துல இருக்கிற கிராமம். பத்தாவது முடிச்சுட்டு சென்னைக்கு ஓடி வந்தேன். செய்யாத வேலையே இல்ல. எல்லா வேலையும் செஞ்சி பார்த்தேன். எதுவுமே திருப்தியா வரலை.அப்பதான் மாநிலக்கல்லூரில இருக்கிற விக்டோரியா ஹாஸ்டல் மெஸ்ல சமையல் வேலைக்கு சேர்ந்தேன். சொன்னா நம்ப மாட்டீங்க. அவ்வளவு சந்தோஷமா இருந்தது. வேலை பார்த்த திருப்தியும் கிடைச்சது.