கெத்து தாரா!

வேறென்ன தலைப்பு வைக்க?

ஒரு சொல்... ஒரேயொரு சொல் கூட புதியதாக நயன்தாரா குறித்து சொல்லிவிட முடியாது. எல்லாருக்கும் எல்லாமும் தெரியும். அவரது மொத்த வாழ்க்கையும். முழு பயாகிரஃபியும். சகல காதல்களும். அனைத்து காதல் தோல்விகளும்.ஒருவேளை நினைவின் இடுக்கில் சிக்கி வெளிவராமல் அவை தவித்தாலும் இருக்கவே இருக்கிறது கூகுள் சர்ச் இன்ஜின். ‘நயன்தாரா’ என சர்ச் பட்டனில் இட்டால் செய்திகள் கொட்டுகின்றன. இமேஜசில் படங்கள் குவிகின்றன.

படச் செய்திகள் மட்டுமல்ல... பர்சனல் விவரங்களும்தான். அந்தரங்க புகைப்படங்களும்தான்.ஆம். நயன்தாராவின் வாழ்க்கையில் ஒளிவு மறைவே இல்லை.கடந்த காலத்தில் இவரைப் போல் யாராவது இருந்திருக்கலாம். எதிர்காலத்தில் இன்னொருவரும் வரக் கூடும். ஆனால், இப்போது? இன்று? நிகழ்காலத்தில்..?

ம்ஹும். நயன்தாரா தவிர யாருமே இல்லை.அதனால்தான் அவர் கெத்து தாரா!சும்மாவா..? 16 ஆண்டுகளாக டாப் மோஸ்ட் ஹீரோயினாக மட்டுமே அல்லவா ஜொலித்து வருகிறார்?!யெஸ். நடிகையாக அவர் அறிமுகமானது 2003ம் ஆண்டு. அந்தஆண்டு கிறிஸ்துமஸ் அன்றுதான் சத்தியன் அந்திக்காடு இயக்கத்தில் ‘மனசினக்கரே’ மலையாளப் படம் வெளியானது. நயன்தாரா என்ற நடிகைக்கு அதுதான் முதல் படம்.

இரண்டாண்டுகள் கழித்து 2005ல் தமிழில் ‘ஐயா’ வழியாகவும், அடுத்த ஆண்டே ‘லக்ஷ்மி’ மூலமாக தெலுங்கிலும், 2010ல் ‘சூப்பர்’ வழியாக கன்னடத்திலும் கால் பதித்தார்.இதோ இந்த நிமிடம் வரை இந்த நான்கு மொழிகளிலும் இவர்தான் ஸ்டார்; ஒன்லி லேடி சூப்பர் ஸ்டார்.