உலகளவில் ஜனநாயகம் மற்றும் நீதிக்காக முதல் கொடியைத் தூக்கியவர்கள் மாணவர்கள்தான். இந்தி எதிர்ப்பு போராட்டமா… ஈழத் தமிழர்கள் பிரச்னையா… ஜல்லிக்கட்டா… எல்லாவற்றுக்கும் முன்னணியில் நின்றவர்கள் தமிழக மாணவர்கள்.

ஆனால், இன்று குடியுரிமை திருத்தச் சட்டம் முதல் பல சமூக கேடுகளுக்காக வடநாட்டு மாணவர்கள் தெருவில் இறங்கிப் போராடி, மண்டை உடைந்து கிடக்கும் நேரத்தில் தமிழக மாணவர்கள் ஆழ்ந்த மெளனம் காப்பது ஆச்சரியம். உண்மையில் தமிழக மாணவச் சிங்கங்களுக்கு என்ன ஆனது?

‘‘ஒரு காலத்தில் தமிழக கல்லூரி மற்றும் பல்கலைக்கழக மாணவர்கள் அரசியல் மயமாகத்தான் இருந்தார்கள். ஆனால், அரசியல் கட்சிகளின் ஆட்சியால் அவர்களும் கட்சி அரசியலுக்குத் தள்ளப்பட்டார்கள். ஆரம்பத்தில் அரசியல் கட்சிகள்கூட மாணவர்களால்தான் முன்னுக்கு வந்தன.

பிறகு மாணவர்களின் கட்சி சாராத அரசியல் போக்கால் அவர்களுக்குள் அரசியல் சிந்தனை புகுந்துவிடக்கூடாது என்பதை கருத்தாகக் கொண்டே அரசியல் கட்சிகள் காய்களை நகர்த்தின…’’ என்று இன்ட்ரோ கொடுக்கும் சென்னையில் இயங்கும் வளர்ச்சிக்கான ஆய்வு நிறுவனமான எம்ஐடிஎஸ்-ஸின் இணை பேராசிரியர் லட்சுமணனிடம், ‘மாணவர்களிடையே இந்த அரசியல் நீக்கம்  எப்படி படிப்படியாக நிகழ்ந்தது..?’ என்றோம்.