‘‘ஒல்லியா வெள்ளையா இருக்கிறவங்க மட்டும்தான் நயன்தாரா மாதிரி மேக்கப் போட்டுக்க முடியுமா?! ஏன், பப்ளியா இருக்கறவங்களை மேக்கப் வழியா நயன்தாரா மாதிரி மாத்த முடியாதா என்ன..? செய்யலாம். கண்டிப்பா மேக்கப் வழியா கொண்டு வரலாம்.

ஏன்னா இருப்பதை அழகாகக் காட்டுவது தான் மேக்கப். அதோடு இல்லாத ஒரு விஷயத்தையும் உருவாக்குறதுதான்! இதன் விளைவுதான் இவ்வளவு லுக்ஸ்... இது எல்லாத்துக்கும் மாடல் நானேதான்!’’ புன்னகைக்கிறார் மேக்கப்கலைஞரான இலங்கேஸ்வரி. 

ஊரடங்கு காலத்தில் பலரும் ஓய்வு நேரத்தை கிரியேட்டிவ்வாக பயன்படுத்தி டிரெண்ட் செய்கிறார்கள். அந்த வகையில் இலங்கேஸ்வரி தனது மேக்கப் கலையை வைத்து முந்தைய கால பிரபலமானவர்கள் போல மேக்கப் போட்டு சமூக வலைத்தளங்களில் கலக்கிக் கொண்டிருக்கிறார்.

‘திருவருட் செல்வர்’ சிவாஜி கணேசன், யோகி பாபு, விஜய் சேதுபதி, நம்பியார்... என மேக்கப் அத்தாரிட்டியான உலக நாயகனுக்கே டஃப் கொடுத்துக் கொண்டிருக்கிறார்.  ‘‘பூர்வீகம் திருநெல்வேலி. பிறந்தது, வளர்ந்தது எல்லாமே சென்னைலதான். 20 வருடங்களா மேக்கப் ஆர்ட்டிஸ்ட்டா இருக்கேன். கடந்த ஆறு வருடங்களா ஃபேஷன் துறையிலயும் இருக்கேன்.

இந்த ஊரடங்கு காலத்துல நம்மையே ஏன் மாடலாக்கக் கூடாதுனு தோணுச்சு...’’ என்னும் இலங்கேஸ்வரி மேலை நாடுகளின் கான்செப்ட் எக்ஸ்பரிமென்டை கையில் எடுத்திருக்கிறார்.

முதல்ல முன்னாள் முதல்வர் ஜெயலலிதா மாதிரி எனக்கு நானே மேக்கப் போட்டுக்கிட்டேன். முதல் சோதனையே வெற்றி. அப்புறம் என்ன... டிரெண்டில் இருந்த அத்தனை பேரையும் மேக்கப் மூலம் முகத்தை மாத்தினேன்.நம்ம மனசுல நீங்காம இருக்கற நம்பியார்,  சிவாஜி கணேசன் மாதிரியானவங்க தோற்றத்தை கொண்டுவரக் கூடாதுனு மல்லாந்து படுத்திருந்தப்ப தோணுச்சு.