சமீபமாக அதிக வெயிலைச் சந்தித்து வருகிறது தமிழ்நாடு. கடந்த வாரம் 115 டிகிரி ஃபாரன்ஹீட் வெப்பம் சில இடங்களில் பதிவாகி எல்லோரையும் களைப்பாக்கியது. சென்னையில் 109 டிகிரி ஃபாரன்ஹீட் வரை ஏறியிறங்கியது. கரூர் மாவட்டத்தில் இயல்பைவிட மிகமிக அதிகமாக அதாவது 5.1 டிகிரி செல்சியஸுக்கு மேல் வெப்பம் பதிவானதாக சென்னை வானிலை ஆய்வு மையம் தெரிவித்தது.அதுமட்டுமல்ல.

மியான்மர் அருகே கரையைக் கடந்த மோக்கா புயலின் காரணமாக வெப்பம் 2 முதல் 4 டிகிரி செல்சியஸ் வரை அதிகரிக்கும் என வானிலை ஆய்வு மையம் ஏற்கனவே தெரிவித்திருந்தது. இருந்தும் மாலை நேரங்களில்கூட மக்களால் வெளியில் நடமாட முடியவில்லை. அந்தளவுக்கு வெயில் தகித்தது. தகித்துக் கொண்டும் இருக்கிறது. ஃபேன் ஓடினாலும் வியர்வை வழிந்தோடுகிறது.

இந்த வெயில் ஏன் இவ்வளவு வெயிலாக இருக்கிறது... இது வெப்பஅலையா... என்கிற கேள்விகளுடன் வானிலை ஆய்வு மையத்தின் தென்மண்டல தலைவர் பாலச்சந்திரனிடம் பேசினோம்.

‘‘வெப்ப அலையை எப்படி கணக்கிடுறோம்னா இயல்பைவிட, அதாவது மலைப்பகுதி, கடல்பகுதி, உள்பகுதினு ஒவ்வொரு இடத்திலும் வெவ்வேறு மாதிரி வெப்பம் இருக்கும். அங்க சராசரி எவ்வளவு பதிவாகுது, சராசரியிலிருந்து எவ்வளவு அதிகம் பதிவாகுது என்பதைப் பொறுத்து அது வெப்ப அலையா இல்லையானு தெரியும்.

இப்ப மலைப்பகுதிக்கு 30 டிகிரி, கடல்பகுதிக்கு 37 டிகிரி, உள்பகுதிகளுக்கு 40 டிகிரி அல்லது அதுக்குமேல் இருக்கலாம். இயல்பு 40 டிகிரினு வைத்தால் 45 டிகிரி எனப் பதிவாகும்போது 5 டிகிரி அதிகம். இதுல 4.6 டிகிரியிலிருந்து 6 டிகிரி வரை போனால் அதை வெப்ப அலைனு சொல்றோம். அதுவும் ஆறு டிகிரி வரை போச்சுனாதான் அது வெப்பஅலை. அதுக்கு கீழ உள்ளதை எல்லாம் இயல்பைவிட வெப்பம் அதிகம்னு சொல்றோம்.

‘‘இந்தமுறை வெப்பம் அதிகரிக்க மோக்கா புயலும் ஒரு காரணம். வங்கக்கடல்ல புயல் திசைமாறி வடகிழக்கு நோக்கிப் போகும்போது அதையொட்டி காற்றிலுள்ள ஈரப்பதம் எல்லாம் போயிடும். அப்ப மேகக்கூட்டங்கள் உருவாகாத சூழல் இருக்கும். வடமேற்குத் திசையிலிருந்து காற்று வீசும். அப்ப வெப்பம் அதிகரித்து காணப்படும்.

உள்பகுதியா, கடல்பகுதியா, மலைப்பகுதியா என்பதைப் பொறுத்து இந்த வெப்பத்துல மாற்றங்கள் இருக்கும்.சென்னை போன்ற நகரங்களில் கடல்காற்று ரொம்ப முக்கியம். கடல்காற்று உருவானால்தான் அது வெப்பத்தைக் கட்டுப்படுத்தும். கடந்த வாரம் இந்த மோக்கா புயல் போனபிறகுதான் கடல்காற்று 15ம் தேதி உருவானது. அது ரொம்ப பலவீனமாக இருந்தது. அதனால, மூணு நாட்கள் வெப்பம் அதிகமாக இருந்தது.

ஆனா, அந்த வெப்பம் உச்சத்தைத் தொட்டுட்டு அங்கேயே ரொம்ப நேரம் நிற்குதா இல்ல உடனே இறங்கி வருதானு இரண்டு நாட்கள் ஒப்பீடு பண்ணும்போது மூன்றாவது நாள் சீக்கிரமாக இறங்கிடுச்சு. ஏன்னா, கடல்காற்று வீச ஆரம்பிச்சிடுச்சு.

அப்புறம், இயல்பாகவே மே மாதத்தின் ரெண்டாவது வாரம் வெப்பம் அதிகமாகவே இருக்கக்கூடிய காலக்கட்டம். சூரிய வெளிச்சம் நேரடியாக பூமியில் வந்து விழும். அதனால இயல்பைவிட வெப்பம் அதிகரிக்கும். புயல் இருப்பதால் மட்டுமல்ல, புயல் இல்லாத காலக்கட்டத்துலகூட நமக்கு வெப்பநிலை அதிகம் இருந்திருக்கு. 44 டிகிரி எல்லாம் போயிருக்கு.

இந்த முறை மேற்கு தாம்பரத்துல சென்னையைவிட அதிக வெப்பம் பதிவாகியிருக்கு. பொதுவாக, நகரத்தில் வண்டியின் புகை உள்ளிட்ட காரணிகளால் வெப்பம் அதிகம்னு சொல்வாங்க.

நார்மலாக நாம் 2ல் இருந்து 3 லிட்டர் வரை தண்ணீர் அருந்தணும். இந்த வெயில் காலத்துல வெப்பத்தைத் தணிக்க அதைவிட அதிகமாக குடிக்கணும். சிறுநீர் போகலனு நினைக்கக்கூடாது. ஏன்னா, அது வியர்வையாக வெளியேறிடும். அடுத்து சாப்பாடும் நீர் ஆகாரமாக இருந்தால் நல்லது. பொதுவாக, வெயில் காலத்துல பலருக்கும் உணவு எடுக்காது.

அப்ப கூழ், கஞ்சி, தயிர்சாதம் மாதிரியான உணவுகளை எடுத்துக்கணும். அப்புறம், மசாலா பொருட்கள் உள்ள உணவுகளைக் குறைச்சுக்கணும். அது செரிமானம் ஆகாது. வயிற்றுப்போக்கு ஏற்பட்டு ரொம்ப நீரிழப்பை ஏற்படுத்திடும். மருத்துவமனையில் சேர்க்கிற அளவுக்குப் போயிடும். அதனால கவனம் தேவை.