விருபாக்‌ஷா

சமீபத்தில் திரையரங்குகளில் வெளியாகி வசூலை அள்ளிய தெலுங்குப்படம், ‘விருபாக்‌ஷா’. இப்போது ‘நெட்பிளிக்ஸி’ல் காணக்கிடைக்கிறது. ருத்ரவனம் எனும் கிராமத்தில் 1979ல் படத்தின் கதை ஆரம்பிக்கிறது. அங்கே உள்ள ஒரு வீட்டில் வசிக்கும் தம்பதியினர் மாந்திரீகத்தில் ஈடுபடுவதாக ஊர் மக்கள் சந்தேகப்படுகின்றனர்.

கிராமத்தில் உள்ள குழந்தைகளின் மரணத்துக்கு அந்த தம்பதியினர்தான் காரணம் என்று அவர்களைப் பிடித்து மரத்தில் கட்டி வைக்கின்றனர். அத்துடன் அவர்களது மகன் கண் முன்னாலேயே எரித்து விடுகின்றனர்.  

அந்த மகன் அனாதையாகிறான். எரித்துக் கொல்லப்படும்போது அந்தப் பெண் இன்னும் 12 வருடங்களில் கிராமமே அழிந்துவிடும் என்று சாபமிடுகிறாள். 12 வருடங்கள் ஓடுகிறது. கிராமத்தில் கோயில் திருவிழா வருகிறது. மக்கள் எல்லோரும் கோயிலில் கூடியிருக்கும்போது கிராமத்துவாசி ஒருவர் வினோதமான முறையில் கோயிலுக்குள் சென்று மரணமடைகிறார்.

இந்த மரணம் பீதியைக் கிளப்ப, கிராமத்துக்கு லாக் டவுன் விடப்பட, படபடக்கிறது திரைக்கதை. வித்தியாசமான அனுபவத்தைத் தரும் சுவாரஸ்யமான படம் இது. ‘புஷ்பா’ படத்தின் இயக்குனர் சுகுமார்தான் இப்படத்துக்கு திரைக்கதை எழுதியிருக்கிறார். படத்தின் இயக்குநர், கார்த்திக் வர்மா தண்டு.

சமீபத்தில் திரையரங்குகளில் வெளியான மலையாளப் படம், ‘நீல வெளிச்சம்’. இப்போது ‘அமேசான் ப்ரைமி’ல் காணக்கிடைக்கிறது. ஒரு கிராமத்தில் பார்கவி நிலையம் என்ற பாழடைந்த வீடு இருக்கிறது.

பல வருடங்களாக அந்த வீட்டில் யாரும் குடியிருப்பதில்லை. இளம் எழுத்தாளர் ஒருவர் பார்கவி நிலையத்தில் தங்க வருகிறார். அந்த வீட்டுக்குள் நுழையும் அவரைச் சுற்றியிருக்கும் கிராமவாசிகள் ஒரு மாதிரியாக பார்க்கின்றனர். வீட்டைச் சுத்தம் செய்துவிட்டு அருகிலிருக்கும் ஹோட்டலில் சாப்பிடுகிறார். மதிய உணவை வீட்டுக்கு அனுப்பச் சொல்லி ஹோட்டல்காரரிடம் வேண்டுகிறார்.

எழுத்தாளர் பார்கவி நிலையத்தில் தங்கியிருக்கிறார் என்று அறிந்தவுடன் உணவை அனுப்ப முடியாது என்று மறுக்கிறார். அந்த ஊரில் இருக்கும் நண்பர்களைக் காணச் செல்கிறார். பார்கவி நிலையம் என்ற பெயரைக் கேட்டவுடன் நண்பர்கள் ஆடிப்போய்விடுகின்றனர்.

அப்படி என்ன பார்கவி நிலையத்தில்  இருக்கிறது என்பதை அறிய படத்தை ஒருமுறை பார்த்துவிடுங்கள்.