கதைப்படி ஒருவருடைய கடந்த கால வாழ்க்கையை மாத்த முடியும். அதற்கு ஒரு போன் உதவும். அந்த போன் மூலம் கடந்த காலத்துக்குப் போகவும் முடியும்; நடக்கப்போகும் விபரீதத்தைத் தடுக்கவும் முடியும். 

இதை ஸ்க்ரீன்ல சொன்னால் எப்படி இருக்கும் என்ற ஐடியாவுல ஆர்வத்தோட ‘மார்க் ஆண்டனி’ கதையை எழுதினேன்...’’ உற்சாகமாய் பேச ஆரம்பிக்கிறார் இயக்குநர் ஆதிக் இரவிச்சந்திரன்.

மார்க், கனவிலும் சண்டையை விரும்பாதவர். ஆனால், அவருடைய அப்பா ஆண்டனி சண்டையோட குடித்தனம் பண்ணுபவர். பெரிய தாதாவா அதகளம் பண்ணுவார். இந்த இருவேறு கேரக்டர்களையும் ஒன்றுக்கு ஒன்று தொடர்பில்லாத வகையில் செமையாகப் பண்ணினார்.எஸ்.ஜே.சூர்யா சாரை நானே விரும்பி அழைத்து வந்தேன்னு சொல்லலாம். 

பொதுவா வில்லன் நடிகர்கள் அவருடைய கேரக்டரை பண்ணமுடியாது. பெர்ஃபாமன்ஸ் தேவைப்படுகிற கேரக்டர். ரசிகர்களை சிரிக்க வைக்கணும், பயப்பட வைக்கணும், பதட்டமடையச் செய்யணும். அப்படி எல்லாத்தையும் ஒரே சமயத்துல அதுவும் வித்தியாசமாக பண்ணக்கூடியவராகத் தெரிந்தார் எஸ்.ஜே.சூர்யா.

எல்லோரும் எல்லாவிதமான படங்களையும் பார்க்கிறார்கள். கமர்ஷியல் படங்களை குறிப்பிட்ட இயக்குநர்கள் எடுப்பார்கள். வாழ்வியல் சார்ந்த கதைகளை சிலர் எடுப்பார்கள். என்னைப் பொறுத்தவரை என் வயசுக்கு ஏற்றமாதிரி ‘த்ரிஷா இல்லன்னா நயன்தாரா’ எடுத்தேன். 

இப்போது எனக்கு பக்குவம் வந்துவிட்டது. அதனால் விஷால் சாரிடம் போனேன். இன்னும் பத்து ஆண்டுகள் போனால் என்னுடைய அனுபவம் கூடும். அப்போது வாழ்வியல் சார்ந்த கதைகள் பண்ணலாம். சினிமாவுக்கான கதை என்பது நம்முடைய மைண்ட் செட் என்ன சொல்லுதோ அதுதான் படமாக வெளிவரும்.

அஜித் சாருடைய தீவிர ரசிகன் நான். ‘மார்க் ஆண்டனி’ எடுக்கக் காரணமே அஜித் சார்தான். இந்த மாதிரி பிரம்மாண்டமான படம் எடுக்க எனக்குள் பொறியை உண்டாக்கியவர் அவர். சின்னதாக யோசிக்காமல் பெரிதாக யோசித்தால்தான் பெரிய படம் பண்ண முடியும்னு என்னை தட்டிக்கொடுத்தார். அஜித் சாரை வெச்சு படம் பண்ண வேண்டும் என்பது என் கனவு. 

‘மார்க் ஆண்டனி’ ரிலீசுக்குப் பிறகு அந்தத் தகுதி கிடைக்கும்னு நம்புகிறேன். ‘நேர்கொண்ட பார்வை’ படத்தில் நடிச்சப்ப அஜித் சாரை நேரில் சந்தித்து, பேசிப் பழகும் வாய்ப்பு கிடைச்சது. அப்போது அவர் சொன்ன வார்த்தைகள்தான் விஷால் சார் படம் பண்ணுமளவுக்கு உயர்த்தியுள்ளது.