நீங்கள் வசிக்கும் நகர்ப்பகுதிகளில் எங்கேயாவது பறவையின் கூட்டைப் பார்த்தால், அந்த கூட்டுக்கும், ராகேஷ் காத்ரிக்கும் தொடர்பு இருக்கலாம். ஆம்; கடந்த 14 வருடங்களாக இந்தியாவின் நகர்ப் பகுதிகளில் பறவைகள் வந்து தங்குவதற்காக செயற்கையான கூடுகளைக் கட்டி வருகிறார் ராகேஷ். 

சணல், கயிறு, தேங்காய் தொட்டிகளைக் கொண்டு இந்த கூடுகளைக் கட்டுகிறார். நகர்ப்புறங்களில் இருக்கும் வீடுகள், மரங்கள் மற்றும் பறவைகள் வரும் இடங்களை மையமாக வைத்து கூடுகளை அமைக்கிறார் ராகேஷ்.

இதுவரை இந்தியா முழுவதும் உள்ள முக்கிய நகரங்களில் 7.3 லட்சம் கூடுகளை அமைத்திருக்கிறார். ‘இந்தியாவின் கூடு மனிதன்’ என்று அவரை மக்கள் அன்புடன் அழைக்கின்றனர்.

தில்லியில் பிறந்து, வளர்ந்தவர், ராகேஷ். சிறு வயதில் மற்ற குழந்தைகளைப் போலவே சிட்டுக்குருவிகளைப் பிடித்து, விளையாடுவது ராகேஷின் வழக்கம். குறிப்பாக அவருடைய வீட்டில் இருந்த மின்விசிறிக்கு மேல் பகுதியில் சிட்டுக்குருவிகள் கூடு கட்டியிருந்தன. மின்விசிறியை போட்டால் அந்தக் கூட்டுக்குப் பாதிப்பு ஏற்படும். 

அதனால் ராகேஷின் தாத்தா மின்விசிறியைப் போட வேண்டாம் என்று அவரை எச்சரிக்கை செய்வார். ஆனால், மின்விசிறியை போட்டு, தாத்தாவிடம் திட்டு வாங்குவார் ராகேஷ். சிட்டுக்குருவியின் சிறப்புகளைப் பற்றியும், பறவைகளின் வாழ்விடங்கள் பற்றியும் ராகேஷுக்குச் சொல்லிக் கொடுத்து, அவருக்குப் பறவைகளின் மீதான அக்கறையும், காதலையும் வளர்த்தார் தாத்தா.

இந்நிலையில் 2008ம் வருடம் புதிதாக ஒரு அலுவலகத்துக்கு வேலைக்குச் சென்றார். அவரது அலுவலகத்தின் ஒரு மூலையில் பறவையின் கூடு ஒன்று இருந்தது. அதில் பறவைகளும் வசித்தன. அந்தக் கூட்டில் பறவைகளைப் பார்த்ததும் ராகேஷுக்கு எல்லையில்லா மகிழ்ச்சி.

கூடு இருந்தால் பறவைகள் வந்து தங்கும் என்பதை உணர்ந்த ராகேஷ், 2008ம் வருடத்திலிருந்து கூடுகளை அமைக்கத் தொடங்கினார். தில்லியில் உள்ள மயூர் விஹார் எனும் பகுதியில் முதல் கூட்டை அமைத்தார். ‘‘சிட்டுக்குருவிகள் தானாகவே கூட்டை அமைத்துக்கொள்ளும். நீ அமைத்த கூட்டில் அவை எப்படி வந்து தங்கும்..?’’ என்று முதல் கூட்டுக்கே விமர்சனங்கள் எழுந்தன.

உற்சாகமாக கூட்டை அமைத்த ராகேஷ் மனதுக்குள் சந்தேகங்கள் எழுந்தன. ‘‘கூடுகள் அமைப்பதை ஒருபோதும் நிறுத்திவிடாதே. ஒரு காலத்தில் சிட்டுக்குருவிகளிடமிருந்து நாம் பறித்துக்கொண்டதைத்தான், நீ இப்போது திருப்பிக்கொடுக்கிறாய். 

நிச்சயமாக அந்த கூட்டுக்கு சிட்டுக்குருவிகள் வரும்...’’ என்று ஒரு தோட்டக்காரர் ராகேஷிடம் சொல்லியிருக்கிறார்.

ஆம்; ராகேஷ் அமைத்த கூட்டில் சிட்டுக்குருவிகளின் கீச்சுக்குரல்கள் கேட்க ஆரம்பித்தன.முதலில் பெரு நகரங்களை இலக்காக வைத்து இயங்க ஆரம்பித்தார். தன்னால் மட்டுமே எல்லா இடங்களிலும் கூடுகளை அமைக்க முடியாது என்ற எதார்த்தம் அவருக்குப் புரிந்திருந்தது. 

தன்னைப் போலவே சூழலியலில் ஆர்வமுடையவர்களை இணைத்து, ஓர் அமைப்பை உருவாக்கினார்.  சிட்டுக்குருவிகள் அழிந்து வரும் பெங்களூரு, சென்னை, தில்லி, ஹைதராபாத், கொல்கத்தா, மும்பை உள்ளிட்ட இந்தியாவின் முக்கிய நகரங்களில் எல்லாம் கூடுகளை அமைத்தார்.