சமீபத்தில் மின்னணு பொருட்கள் ஏற்றுமதியில் தமிழ்நாடு மாபெரும் சாதனை படைத்து அசத்தியிருக்கிறது. கடந்த 2024 - 25 நிதியாண்டில் 14.65 பில்லியன் டாலர்கள் மதிப்பிலான மின்னணு பொருட்களை ஏற்றுமதி செய்து புதிய உச்சத்தைத் தொட்டிருக்கிறது. 

இது இந்திய மதிப்பில் சுமார் ஒரு லட்சத்து 25 ஆயிரம் கோடி ரூபாயாகும். கடந்த 2023 - 24 நிதியாண்டில் இதே மின்னணு பொருட்கள் ஏற்றுமதியில் தமிழ்நாடு 9.56 பில்லியன் டாலர்களை எட்டியிருந்தது. அதாவது இந்திய மதிப்பில் சுமார் 81 ஆயிரம் கோடி ரூபாய் ஏற்றுமதி செய்திருந்தது.

‘‘ஆட்டோமொபைல் உற்பத்தியின்போதே மின்னணு பொருட்களின் முக்கியத்துவமும் புரிந்திருந்தது. தவிர, மின்னணு பொருட்களின் தேவையும் அதிகரித்ததால் அதன் உற்பத்தியை அரசு அதிகரித்தது. இப்போது பல நிறுவனங்களின் முதலீடுகளைக் கொண்டுவந்து இன்னும் அதிகரித்து வருகிறது. 

இதனால் முதல்கட்டமாக நிறைய வேலைவாய்ப்புகள் உருவாகும். வருமானம் அதிகம் பெருகும். ஏற்றுமதி அதிகரிக்கும். அந்நிய செலவாணி உயரும். தவிர, வேலை, வருமானம் உள்ளிட்டவை தமிழ்நாட்டின் வளர்ச்சியை மேலும் ஊக்குவிக்க பயன்படும்...’’ என்கிறவரிடம், ‘தமிழ்நாட்டில் மின்னணு துறை வளர்ந்து வருவதற்கு என்ன காரணம்’ என்றோம்.

இவர்கள் எல்லா துறைகளிலும் தங்கள் பங்களிப்பை சிறப்புடன் செய்து வருகின்றனர். குறிப்பாக தமிழகத்தில் சேவைத் துறையும் அதிகம் உள்ளது. High-end Manufacturing எனச் சொல்லப்படுகிற உயர்நிலை உற்பத்தியும் அதிகமாக இருக்கிறது. 

உயர்நிலை உற்பத்தி என்பது மேம்பட்ட தொழில்நுட்பங்கள் மற்றும் சிறந்த நிபுணத்துவத்தைப் பயன்படுத்தி உயர்தரமான பொருட்கள் தயாரிப்பதில் கவனம் செலுத்துவது. நம்மிடம் திறன்வாய்ந்த தொழிலாளர்கள் இருப்பதால் இந்த உயர்நிலை உற்பத்தியில் சிறப்பாக இருக்கிறோம்.  

தற்போது இந்தியாவின் தேசிய மொத்த உள்நாட்டு உற்பத்தியில், உற்பத்தி துறையின் பங்கு என்பது 17%. இது கடந்த பத்து ஆண்டுகளாகவே அப்படியேதான் உள்ளது. 

மேக் இன் இந்தியா உள்ளிட்ட திட்டங்கள் வழியாக இதை அதிகப்படுத்த வேண்டும் என நினைத்தார்கள். தனியார் நிறுவனங்களுக்கு வருமான வரி சலுகை எல்லாம் கொடுத்தார்கள்.

அப்படியாக உற்பத்தியின் பங்கை ஜிடிபியில் உயர்த்த கடந்த பத்து ஆண்டுகளாகவே பல முயற்சிகளை எடுத்தார்கள். இருந்தபோதும் அது இந்திய அளவில் 17 சதவீதத்தைத் தாண்டவில்லை. 

ஆனால், தமிழகத்தின் ஜிஎஸ்டிபியில் உற்பத்தி துறையின் பங்கு 25% உயர்ந்திருக்கிறது. இதற்குக் காரணம் திறன்வாய்ந்த தொழிலாளர்கள். திறன்வாய்ந்த தொழிலாளர்கள் இங்கே இருக்கக் காரணம் 1960களில் இருந்தே திராவிட கழக அரசுகள் கல்வி, சுகாதாரம் உள்ளிட்டவற்றுக்காக நிறைய செலவுகள் செய்து வருவதே!

அதேபோல் அமெரிக்கா உள்ளிட்ட நாடுகளை ஒப்பிடும்போது அவர்களைவிட குறைவான சம்பளத்திற்கு வேலை செய்ய நம்மவர்கள் தயாராகவும் உள்ளனர். இதனால், தமிழகத்தில் நிறுவனங்கள் முதலீடு செய்ய விரும்புகின்றன. இரண்டாவதாக நிறுவனங்கள் முதலீடு செய்வதற்கான உள்கட்டமைப்பு வசதிகள் மற்ற மாநிலங்களை ஒப்பிடுகையில் இங்கே சிறப்பாக உள்ளன.

தமிழ்நாட்டின் முதல்வரே நேரடியாக வெளிநாட்டுக்குச் சென்று நிறுவனங்களை ஊக்கப்படுத்தி முதலீடுகளை ஈர்க்கும் வழிவகைகளைச் செய்கிறார். இது சம்பந்தமான துறைகளை மேம்படுத்தியும், துறைகளுக்குச் சிறந்த செயலாளர்களை நியமித்தும், தொழில்துறைக்கு இளம் அமைச்சர்களைக் கொண்டு வந்தும் பல முன்னெடுப்புகளை அரசு செய்துள்ளது.

‘‘இன்றைக்கு மின்னணு உற்பத்தி கருவிகள் எல்லாம் மேம்பட்டதாக மாறிவிட்டன. மின்னணுவில் அடிப்படையான, அத்தியாவசியமான ஒரு பொருள் செமி கண்டக்டர். இதில் சீனா, தைவான் உள்ளிட்ட நாடுகள் முன்னணியில் இருக்கின்றன. 

தற்போது இதன் உற்பத்தியையும் தமிழகம் பெரியளவில் தொடங்கியிருக்கிறது. முன்பு மைக்ரோ சிப்கள் அமெரிக்காவிலிருந்து வாங்க வேண்டும். ஆனால், இப்போது சீனாவே அமெரிக்காவைவிட மலிவு விலையில் உற்பத்தி செய்கிறது. நாமும் அதை நோக்கிச் செல்கிறோம்.