ஆமாம். சர்வதேச அளவில் மட்டுமல்ல... இந்திய அளவிலும் இதுதான் இன்று ஹாட் டாபிக்.பதின்வயதினருக்கு ஏற்படக்கூடிய பிரச்னைகள் என்னென்ன? அதனைச் சரிசெய்வது எப்படி?உளவியல் மருத்துவர்கள் முதல் சமூகவியல் ஆய்வாளர்கள் வரை இன்று இந்த சப்ஜெக்ட்டைத் தான் அக்கு  வேறு ஆணி  வேறாக அலசிக் கொண்டிருக்கிறார்கள். 

பல பிரச்னைகள் காரணமாக இளம் வயதினர் பலரும் இன்று யாருடனும் மனம்விட்டு சரியாகப் பேசுவதில்லை. வீட்டில் தனித்தே இருக்கின்றனர். ஒருவிதக் குழப்பத்துடனும் நம்பிக்கையின்றியும் காணப்படுகின்றனர். மனநிலையில் அதிக மாற்றங்கள் ஏற்படும் வயது என்பதால் மனரீதியாகவும் பல பிரச்னைகளுக்கு உள்ளாகின்றனர்.

இதுபோன்று குழந்தைகள், பதின்வயதினர் மன அழுத்தத்தில் இருப்பது முதல் தவறான குற்றச்செயல்களில் ஈடுபடுவது வரை நடக்கிறது.எனவே, டீன்-ஏஜ் எனும் இந்த பதின்ம வயது அவர்களுக்கு மட்டுமல்ல, அவர்களின் பெற்றோர்களுக்கும் கடின காலம்தான். 

இந்தக் காலகட்டத்தில் அவர்கள் குழப்பம், தன்னைப் பற்றிய சந்தேகங்கள், மன அழுத்தம், சமூகத்தில் பல எதிர்பார்ப்புகள் என உடல்ரீதியாகவும் மனரீதியாகவும் பல மாற்றங்களை எதிர்கொள்கின்றனர்.

சிபிடி எனும் அறிவாற்றல் சார்ந்த நடத்தை சிகிச்சை (Cognitive Behavioral Therapy) எதிர்மறை எண்ணங்களை சரிசெய்ய உதவுகிறது. டிபிடி எனும் இயக்கவியல் நடத்தை சிகிச்சை (Dialectical Behavioral Therapy) மன அழுத்தத்தைக் குறைக்கவும் உணர்ச்சிகளைக் கட்டுப்படுத்தவும் உதவுகிறது. 

தன்னைத்தானே வருத்திக்கொள்ளுதல் அல்லது காயப்படுத்திக் கொள்ளுதல் மற்றும் தற்கொலைக்கு தூண்டுதல் ஆகியவற்றை இவை குறைக்கும். பெற்றோர் மற்றும் இளம்வயதினருக்கு இடையேயான பிரச்னையை சரிசெய்வது அனைத்துக்கும் மேலாக முக்கியம்.

தங்களுடைய குழந்தைகள் நன்றாகப் படிக்க வேண்டும், நல்ல மதிப்பெண்கள் பெற வேண்டும், ஏதேனும் ஒரு துறையில் அல்லது கலையில் சாதிக்க வேண்டும் என்றெல்லாம் நினைத்து பெற்றோர்களே குழந்தைகளுக்கு அழுத்தத்தைக் கொடுப்பதாக உளவியல் நிபுணர்கள் சுட்டிக் காட்டுகிறார்கள்.

பிள்ளைகள் 10, 11, 12 ஆம் வகுப்பு படிக்கிறார்கள் என்றால் நல்ல மதிப்பெண்கள் பெறவேண்டும் என எப்போதும் படித்துக்கொண்டே இருக்க கட்டாயப்படுத்தும் பெற்ரோரே அதிகம். இதற்காக வீட்டிலேயே பல விதிமுறைகளை விதிக்கின்றனர். தாங்கள் நினைக்கும் மதிப்பெண் வரவில்லை என்றால் தண்டனை வழங்கும் அளவுக்குச் செல்கின்றனர்.

அதேநேரத்தில் இன்னொரு தரப்பு பெற்றோர், தங்கள் குழந்தைகளுக்கு எந்த கஷ்டமும் வராமல் பாதுகாத்து வளர்க்கின்றனர். அவர்களுக்கு வரும் பிரச்னைகளை தாங்களே முன்நின்று சமாளிக்கின்றனர். இந்த இரண்டு வளர்ப்பு முறையுமே தவறு என்கிறார்கள் மருத்துவர்கள். டீன்- ஏஜ் என்பது சாதாரணமானதுதான். 

குழந்தைகளுக்கு அழுத்தம் தராதவண்ணம் அதேநேரத்தில் அவர்களுக்கு பிரச்னைகளை எதிர்கொள்ள கற்றுக்கொடுக்க வேண்டும். பதின்மவயது குழந்தைகளுக்கு உடல், மனரீதியாக பிரச்னை இருந்தது தெரிந்தால் அவர்களிடம் பேசி காரணத்தைக் கண்டறிந்து சரிசெய்ய வேண்டும். தேவைப்பட்டால் கண்டிப்பாக ஒரு உளவியல் நிபுணரை அணுகுவது நல்லது.

உலக சுகாதார நிறுவனம் வெளியிட்டுள்ள தகவலின்படி உலக அளவில் 10 - 19 வயதுடையோரில் 7ல் ஒருவர் மன அழுத்தம், பதற்றம், நடத்தைகளில் மாற்றங்கள் என மன ரீதியாக பாதிக்கப்படுவதாகக் கூறியுள்ளது.

எனவே, பதின்மவயதினரிடையே ஏற்படும் நடத்தை மாற்றங்கள் பொதுவானதுதான். என்றாலும் குறிப்பிடத்தக்க மாற்றங்களைக் கண்டறிந்தால் பிரச்னை அதிகமாவதற்கு முன் அதனைச் சரிசெய்வது நல்லது.இதைத்தான் நிபுணர்கள் வலியுறுத்துகின்றனர்.