எங்க இட்லி ‘மல்லிகைப் பூ மாதிரி இருக்கும்’னு ஓட்டல் நடத்தறவர் சொல்லலாம்; எங்க மல்லிகைப் பூ ‘இட்லி மாதிரி இருக்கும்’னு பூக்கடை நடத்தறவர் சொல்ல முடியுமா?
- சாம்பார் குளத்தில்
இட்லியை மூழ்க வைத்து ருசித்துக் கட்டுவோர் சங்கம்

என்னதான் பெரிய எழுத்தாளரா இருந்தாலும், டீக்கடைக்கு போனா லைட் டீ. ஸ்டிராங் டீ மட்டும்தான் குடிக்க முடியும்; ‘ராயல்டி’யை குடிக்க முடியாது!
- ஞானபீட விருது வாங்கும்
அளவுக்கு ஞானமில்லாதோர் சங்கம்

‘‘கட்சி ஆபீசுக்கு ஏன் சினிமா டைரக்டர் வந்திருக்கார்..?’’
‘‘மகளிர் அணித்தலைவிய தலைவர் எப்படி காதல் பார்வை பாக்கணும்னு டைரக்ட் பண்ண வந்திருக்காராம்..!’’

‘‘எங்க வீட்ல திருடினவன் தெலுங்குல பேசினான்னு சொன்னதும் ரொம்ப அதிர்ச்சி ஆயிட்டீங்களே... ஏன் இன்ஸ்பெக்டர்?’’
‘‘மாமூல் வாங்க ஆந்திரா வரைக்கும் போயாகணுமே! அதை நினைச்சுத்தான்...’’

‘‘கூட்டணிக் கட்சி நடத்துற உண்ணாவிரதப் போராட்டத்துல கலந்துக்கப் போன நம்ம தலைவர் ஏன் கோவிச்சுக்கிட்டு வந்துட்டாரு..?’’
‘‘அவரை ‘சாப்பிடறீங்களா’ன்னு யாரும் கேட்கலையாம்..!’’

‘‘சோறு கண்ட இடம் சொர்க்கம்னுதானே சொல்லுவாங்க... நீங்க என்ன நரகம்னு சொல்றீங்க?’’
‘‘என் மனைவி பண்ற சமையலைச் சொன்னேன்..!’’

‘‘தலைவர் சினிமா பார்த்து ரொம்பக் கெட்டுப் போயிட்டார்...’’
‘‘ஏன்... என்னாச்சு?’’
‘‘ரெய்டுக்கு வந்த சி.பி.ஐ. ஆபீசர்களை மயக்கறதுக்கு கவர்ச்சி நடனம் ஏற்பாடு பண்ணியிருக்கார்!’’