தூக்கமின்மை, மன அழுத்தம், ஞாபக மறதி, சிந்தனை இழத்தல் போன்ற நோய்கள் உள்ள மரபணு மாற்றம்  செய்யப்பட்ட குரங்கு ஒன்றிலிருந்து குளோனிங் முறையில் 5 குரங்குகளை சீன விஞ்ஞானிகள் முதல் முறையாக  உருவாக்கியுள்ளனர்.

இதுகுறித்த கட்டுரை சீனாவில் இருந்து வெளியாகும் National Science Review என்ற ஆங்கில இதழில் வெளியாகியுள்ளது. இந்த குளோனிங் குரங்கு குட்டிகள் சீனாவின் ஷாங்காய் நகரில் உள்ள மூளை அறிவியல் மையத்தில் பிறந்துள்ளன. இன்குபேட்டரில் இந்த குரங்கு குட்டிகள் இருக்கும் படமும் வெளியிடப்பட்டுள்ளது.

சீனாவில் கடந்த 2017-ம் ஆண்டு குளோனிங் முறையில் இரண்டு குரங்குகள் உருவாக்கப்பட்டன. விலங்கு  ஆராய்ச்சியில் பின்பற்றப்படும் சர்வதேச நெறிமுறையுடன் இந்த மருத்துவ ஆராய்ச்சி மேற்கொள்ளப்படுகிறது.

எதிர்காலத்தில் மனித மூளை நோய்களை ஆய்வு செய்வதோடு, அதற்கான மருந்துகள் குளோனிங் முறையில்  உருவாக்கப்படும் குரங்குகளிடம் பரிசோதிக்கப்படும். இதன் மூலம் மருத்துவ பரிசோதனைக்கு உட்படுத்தப்படும்  விலங்குகளின் எண்ணிக்கை குறையும் என்கிறார் இது குறித்து ஆய்வு செய்த ஆராய்ச்சி மையத்தின் இயக்குநர் Mu-Ming Poo.