மதுரையில் சித்திரைத் திருவிழா சைவமும், வைணவமும் இணைந்த திருவிழா ஆகும். இரு சமயங்கள் தொடர்புடைய மீனாட்சி சுந்தரேசுவரர் திருக்கல்யாணமும், அழகர் ஆற்றில் இறங்கும் திருவிழாவும் விளங்குகின்றன.

சமயங்களிடையே ஒற்றுமையை ஏற்படுத்தும் நோக்கத்துடனே மன்னர் திருமலை நாயக்கர் காலத்தில் இரு விழாக்களும் இணைக்கப்பட்டு ஒரே விழாவாக ஆக்கினார். இதனால் வைகை ஆற்றின் வடகரையில் அமைந்த ஊரான தேனூரில் ஆற்றில் இறங்கும் விழா, வெகுகாலமாகவே நடைபெற்றுவருகிறது. பின்னாளில் இத்திருவிழா மதுரையில் வைகை ஆற்றில் இறங்கும்படியான விழாவாக மாற்றியமைக்கப்பட்டது.

மீனாட்சியின் திருக்கல்யாணம் சித்திரை 27 தான் என்றாலும் அதற்கு ஒருவாரம் முன்பே கொடியேற்றப்பட்டு திருவிழா களை கட்ட தொடங்குகிறது. பின் வரும் ஒவ்வொரு  நாளும் மீனாட்சி பட்டமேற்பது, திக்விஜயம் செய்வது, பின் சிவனைக் கண்டு நாணம் கொள்ளுதல்,  திருமணம் நிச்சயித்தல், திருமணத்திற்கு முன் கன்னி ஊஞ்சலாடல் என நிகழ்ச்சிகள் அத்தனையும் நடந்த பிறகே திருக்கல்யாண வைபோகம் நடைபெறுகிறது.

அத்துடன் முடிந்ததா? பிரச்னைகள் இல்லாத கல்யாணமா? தங்கையின் கல்யாணத்தைக் காணவரும் அழகருக்கு வழியில் சிறிது தாமதமாகிறது. அதற்குள் இங்கே தங்கையின் திருமணம் முடிந்ததைக் கேள்விப்பட்ட அழகர் சினம்  கொண்டு வைகை ஆற்றில் இறங்குகிறார். மண்டூக மகரிஷிக்கு சாப விமோசனம் கொடுத்த பின் மதுரை செல்லாமல் அழகர் மலைக்கே திரும்புகிறார். இத்துடன் திருவிழா நிறைவு பெறுகிறது.