அழுக்குத்துணிகளை வெளுத்து வெண்மையாக்கும் சேத்துப்பட்டு டோபிகானா சலவைத் தொழிலாளர்களின் வாழ்க்கையில் படிந்துள்ள இருளை அகற்றி ஒளியேற்ற சம்பந்தப்பட்டோரின் மனம் வெளுக்க வேண்டும்!

உலகம் அழியும்போதும் அழியாத பிரான்சில் இருக்கும் புகாரெச் கிராமத்தைப் பற்றிப் படித்து சிலிர்த்தோம்.

மறைந்த ரவிச்சந்திரனின் நினைவுகளை மறக்காமல் வெளியிட்டு, சிறந்த நடிகருக்கு மரியாதை செலுத்தியிருந்தீர்கள்.

- வரலட்சுமி முத்துசாமி, சென்னை-37.

சூப்பர் ஸ்டாராக இருந்தாலும் ரஜினி என்றும் எளிமையான மனிதர் என்பதை மறுக்க முடியாது. சாதாரண பள்ளி ஆண்டு விழாவுக்கு வந்ததைப் பற்றி நேஷனல் செல்லையா நெகிழ்ச்சியாகக் கூறியிருந்தார்.

படிப்பதற்கு வயது ஒரு தடையில்லை என்பதற்கு எடுத்துக்காட்டாக  38 வயதில் சிவில் எஞ்சினியரிங் எடுத்திருக்கும்  சிவக்குமாரை பாராட்டியே தீரவேண்டும்.

நடிகர்திலகத்தின் நடிப்பையே 'காப்பி' அடித்த நடிகர்கள் வாழும் புண்ணிய பூமி இது. கூல் நமீதா கூல்!

27 வயதில் இமாலயப் புகழடைந்த பாப் பாடகி எமி ஒயின்ஹவுஸின் வாழ்க்கை போதையில் முடிந்தது என்பது துயரச்செய்தி. என்ன செய்ய... அவரது பெயரிலேயே 'ஒயின்' என்ற போதை அரக்கன் இருக்கிறானே?

சவாலாக திரைக்கதை அமைத்து 'அரவான்' போல படமெடுக்கும் முயற்சி, தமிழ்ப்படவுலகுக்கு பெருமை சேர்க்கும்!

அமலா பால் தன் கண்களால் ரசிகர்களை கிறங்கடிப்பதில் டாப். அதேபோல் நடிப்பிலும் டாப் என்றால் மகிழ்ச்சியே!

- எம்.மிக்கேல்ராஜ், சாத்தூர்.

குழந்தைகளுக்கு தாய்ப்பால் தரமுடியாத தாய்மார்களுக்கு இந்த 'குளோனிங் பசு தாய்ப்பால்' வரம்தான். தோட்டத்தில் மேயுது குளோனிங் பசு!

'சுட்ட கதை சுடாத நீதி'யில் நிதர்ஸனா 'எதையும் முழுமையாக விசாரிக்காமல் நம்பக்கூடாது' என்ற நீதியை உணர்த்தியிருந்த விதம் அருமை!

- இரா.வளையாபதி, கரூர்.

அன்னா ஹசாரேயின் படம் ஒட்டப்பட்ட கவர்ச்சி உடையில் காசுக்காக கண்றாவி போஸா? நேஹா தூபியா நம் ஜனநாயகத்தையே கேவலப்படுத்தியிருக்கிறார்!