சிங்கங்கள் வாழும் காட்டில் விவசாயம் செய்யும் இளைஞர்!

இந்தியாவில் அதிகமாக சிங்கங்கள் வாழும் பகுதி, கிர் காடுகள். குஜராத்தில் வீற்றிருக்கும் இந்த காடு, சுமார் 1,400 சதுர கிலோ மீட்டர் பரப்பளவு கொண்டது. சிங்கம் மட்டுமல்லாமல் பல உயிரினங்களின் சரணாலயமாகத் திகழ்கிறது கிர். இந்தக் காட்டில் விவசாயம் செய்து வருகிறார் சித்தார்த் குபாவத் என்ற இளைஞர். வாழ்க்கைக்கு அர்த்தம் தரும் ஒரு விஷயமாக விவசாயத்தைத் தகவமைத்துக் கொண்டது சித்தார்த்தின் தனித்துவம்.

மட்டுமல்ல, தான் கற்றுக்கொண்ட  விவசாயம் குறித்த விஷயங்களை எல்லோரிடமும் கொண்டு சேர்ப்பது அவரது சிறப்பு. குஜராத்தில் உள்ள ஜூனாகத் நகரில் பிறந்து, வளர்ந்தவர் சித்தார்த் குபாவத். சிறு வயதிலிருந்தே ஐஐடியில் படிக்க வேண்டும் என்பது சித்தார்த்தின் கனவு. அதனால் பத்தாவது படிக்கும்போதே ஐஐடி நுழைவுத்தேர்வுக்காகத் தயாரானார். பாடப்புத்தகங்களைப் படித்துக்கொண்டே நுழைவுத்தேர்வுக்காகவும் படித்தார்.

தொடர்ந்து இரண்டு வருடங்களுக்கு மேலாக தேர்வுக்காக உழைத்தார். எப்போது தேர்வு வைத்தாலும் எழுதி, தேர்வாகிவிடுவேன் என்ற நிலையில்இருந்தார் சித்தார்த். ஆனால், ஒரு கட்டத்தில் நேரத்தை வீணடித்துக் கொண்டிருக்கிறோம் என்ற உணர்வு அவருக்குள் உண்டானது. உடனே தேர்வுக்குத் தயாராவதை நிறுத்திவிட்டார். ‘‘தேர்வுக்குத் தயாராவதை ஓர் இயந்திரம் போல உணர்ந்தேன். உண்மையில் ஐஐடி மாதிரியான கல்வி நிறுவனங்கள் மனிதர்களுக்குப் பதிலாக இயந்திரங்களைத்தான் உருவாக்குகிறது. நான் இயந்திரங்களைப் பற்றித்தான் படிக்க விரும்பினேன்.