அனுசுயா, அந்த இடத்தை அடையும்பொழுது விமானம் விழுந்து நொறுங்கி 2 மணி நேரம் ஆகியிருந்தது.இன்னமும் கூட மீட்பு நடவடிக்கைகள் முடிந்த பாடில்லை. சுய இயக்க விமான ஒழுங்குமுறை கவுன்சிலில் பணியாற்றும் விஞ்ஞானியான அனுசுயாவால் இன்னமும் அதிர்ச்சியில் இருந்து மீளமுடியவில்லை.

சென்னையில் இருந்து துபாய்க்கு பறந்த குறைந்த கட்டண விமானம். ரயிலில் போவதை விட மலிவு என்ற மானசீக திருப்தியோடு அனுசுயா குழு உருவாக்கிய கனவு சிதைந்து போய் சிதறிக் கிடக்கிறது, 152 பயணிகளுடன் சென்ற விமானம்.

9/11 சம்பவங்களின் மூலம் விமானங்களைக் கொண்டு கட்டடத்தின் மீது ஏவி 2700 பேரை உயிரிழக்கச் செய்த சம்பவம்... கொடூர விமான கொலை விபத்தாக... பதிவு செய்யப்பட்டிருந்தாலும் அப்படிப்பட்ட வரிசையில் தாங்கள் தயாரித்த உள்நாட்டு விமானம் சிதைந்து இடம்பெறும் என்று அனுசுயா ஒருபோதும் கருதவில்லை.

தாங்கள் தயாரித்த முதல் விமானத்தோடு அதை ஓட்டிக்கொண்டு செல்லும் பெண் பைலட் கதீஜாவை அனுசுயா கைகுலுக்கி அனுப்பி வைத்து 2 மணி நேரம் கூட இன்னும் ஆகவில்லை... என்ன ஒரு துயரம்.

புது தில்லி இந்திரா காந்தி சர்வதேச விமான நிலையத்தில் இருந்து சவுதி விமானமும் கஜகஸ்தான் விமானமும் நேரடியாக வானில் மோதிக்கொண்ட கோர விபத்தில் 1996ம் ஆண்டு 349 பேர் உயிரிழந்தனர்.

இந்தியா சம்பந்தப்பட்ட விமான விபத்துகள் குறித்து தனியே ஆய்வு செய்து முனைவர் பட்டம் பெற்ற அனுசுயா மனதில் ஏதேதோ ஓடிக்கொண்டிருந்தது.

ஒமேகா எனும் கனவு திட்டத்தை முன்மொழிந்து முழுக்க முழுக்க பெண்களே தயாரித்த அந்த விமானம் பற்றிய வரலாறு விரைவில் மறக்கப்படும். எப்போதும் ஆல்ஃபா மனிதன் வெற்றி பெற்றுக்கொண்டே இருக்கிறான். பெண் என்றால் அவ்வளவு இளக்காரம். அதற்குள் பத்திரிகையாளர்களும் ஊடகங்களும் எப்படி எல்லாம் கேவலமாக தங்கள் வெறியைத் தீர்த்துக்கொண்டுவிட்டார்கள்.

எவ்வளவு பெரிய போராட்டத்தை அவர்கள் எதிர்கொள்ள வேண்டியிருந்தது... விமானத்தின் உதிரிப் பாகங்களை தயாரிக்கும் 17 வெவ்வேறு இடங்களுக்கும் விஜயம் செய்து அந்த உதிரிப் பாகங்களைக்கூட பெண்களே தயாரிக்கும் அம்சத்தைப் பிடிவாதமாக அனுசுயா ஏற்படுத்தியிருந்தாள்.

வானூர்தி போக்குவரத்தில் ஒருபோதும் கேட்கக் கூடாத வார்த்தை ‘மே டே...’ விமான கட்டுப்பாட்டு அறை இப்படிச் சொல்லி கேள்விப் பட்டால் அங்கிருப்பவர்கள் அனைவரும் ஏறக்குறைய மயக்கமாகி விடுவார்கள். ஃப்ரான்ஸ் நாட்டில் மேடர் என்கிற சொல்லிலிருந்து வந்த உருவாக்கம். 

இந்தச் சொல் அனுசுயாவின் வாழ்க்கையோடு பின்னிப் பிணைந்து விட்டது.

சர்வதேச விமான சேவையில் பெண்கள் என்கிற அமைப்பு அப்போது அதை கடுமையாக சாடியது. பெண் விமானிகள் மற்றும் பிற நிபுணர்களின் திறன்களை, பங்களிப்புகளை அங்கீகரித்து அவர்களை பணியமர்த்தி தக்கவைத்துக் கொள்வதில் விமான போக்குவரத்து துறை தீவிரம் காட்டவில்லை என்கிற குற்றச்சாட்டு எழுந்துள்ளது. 

இத்தனைக்கும் 1910ம் ஆண்டிலிருந்தே பைலட் உரிமத்தை பெண்கள் பெற்று வருகிறார்கள். உலகின் முதல் பெண் பைலட் ரேமாண்டி லோரோஜ். ஆங்கிலக் கால்வாயை விமானத்தில் கடந்த முதல் பெண்மணி ஹரியட். விமானத்தை ஓட்டிக் காட்டிய முதல் கறுப்பின பெண்மணி பெசி கோல்மன்.

1936ம் ஆண்டிலேயே இந்திய விமானப்படை விமானத்தை தபால் துறை விமானமாக மாற்றிய சரளா துக்ரால். மேலும் நிவேதிதா பேஷன்... துர்கா பானர்ஜி... இப்படியானவர்களின் நினைவுகள் அனுசுயாவை சூழ்ந்துகொண்டன.

புகை மூட்டத்துக்கு நடுவே தன்னுடைய இலக்கை நோக்கி அனுசுயா நடந்து கொண்டிருந்தாள். யாரும் செய்யாத ஒரு வேலையை விமானம், அதன் பாதுகாப்பு மற்றும் அதனுடைய வழிகாட்டுதல் என்கிற முறையில் அனுசுயா ஓர் அற்புதத்தை நிகழ்த்தி இருந்தாள்.

அது எப்படி வேலை செய்யாமல் போகும்..? எத்தனை இரவுகள் கண் விழித்து இருப்பாள். ஸ்மார்ட் மெமரி. தொழில்நுட்பம் நினைவக உலோக அதிர்ச்சி உறிஞ்சும் போட்.

உங்கள் உடல் முழுதும் நல்ல எண்ணம் ஓடிக்கொண்டிருந்தால் உங்களை இந்த உலகம் அழைப்பது போல நீங்கள் உணர்ந்து கொண்டே இருப்பீர்கள்...

மனித உயிருக்கு முன்னுரிமை தரும் அறிவியல், பெண் அறிவியல். எந்த விபத்தும்... விதியோ இயற்கையாக அமைந்ததோ அல்ல. மனிதனின் கவனக் குறைவு, அலட்சியம் என்கிற பிரம்மாண்டமான குற்றம் அதில் அடங்கி இருக்கிறது அல்லது ஏதோ ஒரு வகையில் அரசியல் தலையீடு உட்பட பல அபாயங்கள் இன்று உண்டு.