ஒரு நாள் கூட இளையராஜா இல்லாமல் கடந்து போக முடியாது...

லயிக்கிறார் ‘96’ இசையமைப்பாளர் கோவிந்த் வஸந்தா

‘‘என்ன ஆளை பிடிக்கவே முடியல... சிக்கவே மாட்டேங்றீங்க!’’ இதுதானே உங்க முதல் கேள்வி? எப்போதைக்குமான இனிமையில் உதடு பிரியாத புன்னகையில், சிநேகம் ததும்பும் கண்களில் சிரிக்கிறார் கோவிந்த் வஸந்தா.

 ‘96’, ‘சீதக்காதி’ என முரசுகொட்டி தமிழ் மக்களை வசீகரித்து கட்டிப் போட்டிருக்கும் இசையமைப்பாளர். அவரது இசைபோலவே பேச்சும் ரிதமே.
‘சீதக்காதி’ உங்களுக்குக் கிடைத்த பெரிய பொறுப்பில்லையா...பாலாஜி தரணிதரன் அண்ணாகூட வொர்க் பண்றதுசந்தோசமா இருக்கும். அவரே ஒரு Intense Character. ரொம்ப வருஷமா பழக்கம். இந்த ஸ்டோரி, கேரக்டர், அதன் உருவாக்கமெல்லாம் அவரிடம் நிகழ்ந்தபோதே எனக்குத் தெரியும். புதுசா இருந்தது.

கலை, பிறகு தொடர்பான வாழ்க்கையைச் சொல்ற படம். இவ்வளவு ஆழமா இருக்கும்போது நான் கவனக்குறைவா விடக்கூடாது. எங்க சித்தப்பா கர்நாடக இசைப்பாடகர். அப்ப நான் நேரடியாக் கத்துக்கல. ஆனால், அந்தப் பாட்டுகளும், அதோடு இணைந்த இசையும் என் காதுகளில் விழுந்துக்கிட்டே இருக்கும். அதுல ஒரு ஹார்மனி தெரியும். என்னால் பெயரிட முடியாத ராகம் கேட்கும்.

அப்புறமா ராக், ராப் எல்லாம் கேட்டேன். வெஸ்டர்ன் கிளாசிக்கில் நுழைஞ்சிப் பாத்தேன். இது 72 வயதான ஐயா பத்தி சொல்லும்போது கர்நாடிக் பேக்கரவுண்டை பயன்படுத்திருக்கேன். நான் இதுவரை பண்ணினதெல்லாம் காதல்தான்.  ஆனால், ‘சீதக்காதி’ வேற. தரணிதரன் என்னிடம் வெளிப்படையாக இருந்தார். எல்லா சந்தேகங்களையும் பேசி, அருகிருந்து செய்ததால் இவ்வளவு அழகா வந்திருக்கு.
நீங்க இளையராஜாவோட தீவிர ரசிகரில்லையா..?

நம்மோட வாழ்க்கை அவரை உணர்ந்தும், புரிந்தும்தான் நடந்துக்கிட்டே இருக்கு. ஓரு நாள் கூட இளையராஜா இல்லாமல் கடந்துபோக முடியாது. தினப்படி வாழ்க்கையில் அவரை நாம சேர்த்துக்கிட்டோ, ஞாபகப் படுத்திக்கிட்டோதான் இருக்கோம்.

அவர் மெலடிகள் அவ்வளவு உயிர்த் தன்மையானது. குத்துப்பாட்டில்கூட அதன் ஊடாக மெலடி ஸ்ட்ராங்கா இருக்கும். நானொரு வயலினிஸ்ட். அவர் பாடல்களை வாசிக்க அவ்வளவு இஷ்டமா இருக்கும். நான் அவர் முன்னாடியே ஒரு விழாவில் வாசிச்சேன். எனக்கோ பயங்கரடென்ஷன். முதுகுப்பக்கமா வந்து ‘ரொம்ப நல்லாருக்கு...’னு ரெண்டு வார்த்தை சொன்னார்.  

மறக்கமுடியாத Moment அது. சொல்லப்போனால் அவர் ஒரு மார்க்கம். அவரில் பயணித்து நிறையபேர் இலக்கை அடைந்திருக்கிறார்கள்.
மெலடிதான் இஷ்டமா?மெலடிதான் ஆன்மாவை ரொம்ப உரசும். அதில் பாட்டுக்கும், கேட்கிறவனுக்கும் ஒரு கனெக்‌ஷன் வருமில்லையா, அதுக்கு ரொம்ப பாடுபடுவேன். மெலடியை நம்புவேன். அதற்கு முன்னுரிமை தருவேன்.