ஹோம் அக்ரி-37

மண்ணில்லாமல் வீட்டில் செடி வளர்க்கும்  எளிய முறைகள்!

தானாகவே நீர் உறிஞ்சிக்கொள்ளும் ஹைட்ரோபோனிக் (நீர்நிறை வேளாண்மை) முறை பற்றி பார்த்துவிட்டோம். இப்போது மற்ற இரு முறைகளைப் பார்ப்போம்.

நாம் இந்த தொடரில் விளக்கும் முறைகள் அனைத்தும் வீட்டில் பயன் படுத்தும் எளிய முறைகளே. இதே முறைகளைத் தோட்டத்திலும் பயன்படுத்தலாம். தோட்டத்தில் வணிக ரீதியாக பயன்படுத்தும்போது சில தானியங்கி கட்டுப்பாடுகளை சேர்த்துக்கொள்ளலாம். இதனால் குறைந்த செலவும் குறைந்த ஆள் தேவையும் இருக்கும்.

மிகவும் பரவலாக பயன்படுத்தப்படும் முறை NFT (Nutrient Film Technique) என்று சொல்லக்கூடிய முறையில் நீர்நிறை கரைசல் (hydroponic solution) செடிகளின் வேரைத் தொடும்படி சுழற்சியில் வைக்கப்படுகிறது. இதற்கு குழாய் போன்ற கலன்களும், இதற்காகவே பிரத்தியேகமாக வடிவமைக்கப்பட்ட செவ்வகக் குழாய்களும்  பயன்படுத்தப்படுகின்றன.

இந்த முறையில் ஒரு கொள்கலனிலிருந்து நீர்நிறை கரைசல் இந்த குழாய் வழியாக செலுத்தப்படுகிறது. கொள்கலனில் இருக்கும் கரைசல் தொடர்ந்து காற்றேற்றம் (aeration) செய்யப்படுதலால் ஆக்ஸிஜன் நிறைந்ததாக இருக்கிறது. வேர்களுக்கு ஆக்ஸிஜன் தேவையென்பதால் இது முக்கியமாகிறது. இதனால் வேர்கள் எப்போதும் நீரில் மூழ்கி இருப்பதில்லை.

அவ்வப்போது பாய்ச்சப்படும் கரைசலில் நனைந்து பின்னர் அந்த ஈரத்தின் ஆதாரத்திலேயே வளர்கின்றன. இந்த முறையில் தொடர்ந்து கரைசலின் pH மற்றும் மற்ற ஊட்டங்களின் அளவுகள் கண்காணிக்கப்பட முடிவதால் நல்ல முறையில் செடியின் வளர்ச்சியை கட்டுப்படுத்தலாம்.