‘கேங்ஸ் ஆஃப் மெட்ராஸ்’ படத்தைப் பார்த்தவர்கள் இக்கேள்வியைத்தான் கேட்கிறார்கள்.பதில் சிம்பிள். ஞாயிறுதோறும் இரவு 10 மணிக்கு சன் டிவியில் ‘கிராமத்தில் ஒரு நாள்’ நிகழ்ச்சி வந்ததல்லவா..?

அந்த நிகழ்ச்சியில் போட்டியாளராக இருந்து ‘சூது கவ்வும்’ உட்பட சில படங்களில் தலையைக் காட்டிய சாய் பிரியங்கா ரூத்தான் இப்போது நாயகியாகக் களமிறங்கியிருக்கிறார். ‘‘இவ்ளோ பில்டப் தேவையில்ல. ஷாக்க குறைங்க! சாதாரணப் பொண்ணுதான் நான்...’’ அடக்கத்துடன் கோவைத் தமிழில் பேசத் தொடங்குகிறார் சாய் பிரியங்கா ரூத்.

‘‘சொந்த ஊர் கோவை. படிச்சது பிசிஏ. எல்லாரையும் மாதிரி பிழைக்க சென்னை வந்தேன். ஒரு கம்பெனில வேலைக்கும் சேர்ந்தேன். ஆனா, சின்ன வயசுல இருந்தே நடிப்பு மேல அப்படியொரு ஆர்வம். வீட்ல சொன்னா டின்னு கட்டிடுவாங்க. அதனால உள்ளுக்குள்ளயே புதைச்சுட்டு கம்பெனி வேலையைப் பார்த்துட்டு இருந்தேன்.

இந்த நேரத்துல நண்பர்கள் மூலமா ஒரு பிரைவேட் சேனல்ல ரியாலிட்டி ஷோல என்ட்ரி ஆனேன். அப்புறம் எங்க எல்லாம் ஆடிஷன் நடக்குதோ அங்க எல்லாம் கலந்துகிட்டு கிடைச்ச ஒண்ணு ரெண்டு கேரக்டர்ஸ்ல சினிமால தலைகாட்டினேன்...’’ என சுருக்கமாக தன் ஃப்ளாஷ்பேக்கை சொல்லும் பிரியங்காவுக்கு எந்த கேரக்டர் என்றாலும் ஓகேதானாம்.