நக்ஷி நகைகள்!

பெங்காலியில் ‘நக்ஷி’ என்றால் செதுக்கல்கள் என்று பொருள். ‘நக்ஷா’ என்னும் வார்த்தையில் இருந்து மருவி நக்ஷியானது. கைகளால் பார்த்துப் பார்த்து செதுக்கப்பட்ட எந்த ஒரு அரிய பொருளையும் ‘நக்ஷி காந்தா’ என்னும் பெயரில் அழைப்பதுண்டு. இந்த நக்ஷி முறைப்படி செய்யப்பட்ட நகைகள்தான் நக்ஷி டிசைன் நகைகள். தங்கம், வெள்ளி என ஆபரண சந்தைகளில் பல்லாயிரம் ஆண்டுகள் கடந்தும் தனக்கென சிம்மாசனம் போட்டுக்கொண்டு அமர்ந்திருக்கின்றன.

இப்போதும் இந்த நகைகள் எப்படி அதன் டிரெண்ட் மாறாமல் இருக்கின்றன? உற்சாகமாக பேசத் துவங்கினார் உத்தரிகா ஜுவல்லர்ஸ் உரிமையாளரான தாரிணி. ‘‘எத்தனை காலங்கள் போனாலும் முகூர்த்தத்திற்கு பட்டுப் புடவை என்பதை மாற்ற முடியுமா..? அப்படித்தான் இந்த நக்ஷி நகைகளும்.  எப்படி கைகளால் பட்டை தீட்டப்பட்ட வைரங்களுக்கு மதிப்பும் வீரியமும் அதிகமோ, அதே மாதிரி கைகளால் செதுக்கப்பட்ட இந்த நக்ஷி நகைகளுக்கும் சிறப்பும் தனித்துவமும் அதிகம். குறிப்பாக எப்பேர்ப்பட்ட பாரம்பரிய கடையாக இருந்தாலும் இந்த நக்ஷி கலெக்‌ஷன்ஸ் இருக்கும்.

காரணம், இதில் ஒரு தோடு செய்யக்கூட பார்த்துப் பார்த்து தங்கத்தை செதுக்கிச் செய்ய வேண்டும். சரியான பயிற்சியும், அனுபவமும் இல்லைன்னா முகங்கள் சரியாக அமையாது.