வெற்றிமாறன் தயாரிக்க... வேல்ராஜ் ஒளிப்பதிவு செய்ய... பிரமிள் ஆவணப்படம்!

ஆமாம். பொதுத் தளத்தில் அதிகம் தெரியாத... ஆனால், காத்திரமான சிறுபத்திரிகை வட்டாரத்தில் இன்று வரை மகாகவியாக கொண்டாடப்படும் திருகோணமலையை பூர்வீகமாக கொண்ட... 50 ஆண்டுகளுக்கும் மேலாக தமிழகத்தில் வாழ்ந்து மறைந்த பிரமிள் குறித்த ஆவணப்படம் அவர் மறைந்து 25 ஆண்டுகளுக்குப் பிறகு தயாராகிறது!

‘‘கவிஞரும், மெய்விழிப்பருமான பிரமிள் பத்தி ஓர் ஆவணப்படம் எடுக்கணும் என்பதும், அவருக்கு மணிமண்டபம் அமைக்கணும் என்பதும் என் நீண்டநாள் திட்டம். அவர் இறந்து இத்தனை ஆண்டுகளுக்குப் பிறகு இப்பதான், என் நட்புகளின் கரங்கோர்ப்பினால் நிறைவேறிட்டு இருக்கு. ரொம்ப மகிழ்ச்சியா இருக்கேன்...’’ உற்சாகம் பொங்கப் பேசு
கிறார் இயக்குநர் தங்கம்.

இவர், இயக்குநரும், ஒளிப்பதிவாளருமான பாலுமகேந்திராவின் பள்ளியில் பாடம் கற்றவர். சிறந்த சினிமா விமர்சகர். ‘காற்றின் தீராத பக்கங்களில்...’ என பிரமிள் பற்றி இவர் எடுத்து வரும் ஆவணப்படத்தை இவரின் நண்பரும் இயக்குநருமான வெற்றிமாறன் தயாரிக்க, ஒளிப்பதிவாளரும் இயக்குநருமாகிய இன்னொரு நண்பர் வேல்ராஜ் ஒளிப்பதிவு செய்கிறார். இதனால் இலக்கிய உலகில் மிகுந்த கவனத்தை ஏற்படுத்தியிருக்கிறது பிரமிள் ஆவணப்படம்.

‘‘என் சொந்த ஊர் கோயம்புத்தூரில் இருக்கும் பீளமேடு. அங்கே சர்வஜன மேல்நிலைப் பள்ளியில பயிலும்போது செந்தலை கவுதமன் ஐயா எனக்குத் தமிழாசிரியர். என் பால்ய வயசுலயே பிரமிள் எழுத்துகளை வாசிக்க ஆரம்பிச்சிட்டேன். அவரின், ‘லங்காவின் தேசிய தற்கொலை’ நூல் வெளியாகிய 1985ம் ஆண்டிலேயே வாங்கிப் படிச்சிட்டேன்.  அதே ஆண்டுல ‘அறிந்ததினின்றும் விடுதலை’ வாயிலாக ஜே. கிருஷ்ணமூர்த்தி அறிமுகமாகிறார். ஜே. கிருஷ்ணமூர்த்தியை அறிமுகப்படுத்தினவர் எனது ஞானத் தந்தையாகிய பட்டணம் புதூர் செந்தில் மணி. செந்தில் மணி எழுத வந்திருந்தால் அவர் இன்னொரு பிரமிள்.

செந்தில் மணியோடு இணைஞ்சு ‘கோயம்புத்தூர் ஃபிலிம் கிளப்’  அப்படிங்கிற பெயர்ல ஃபிலிம் சொசைட்டி நடத்திக்கிட்டிருந்த மனோகரன், ‘தமிழோசை’ விஜயகுமார் ஆகியோர் மூலமா பிரமிளின் எல்லா எழுத்துகளும் எனக்குப் படிக்கக் கெடச்சது. இன்றைய ஆவணப்பட உருவாக்கத்துக்கு இவங்கெல்லாம்தான் காரணம்.