ஆலயங்கள் தோறும் ஆயிரக்கணக்கில் பழம்பெருமைகளும், அதிசய, ஆச்சர்யங்களும் நிரம்பி வழிகின்றன. அவ்வகையில் மதுரை தெப்பக்குளம் பகுதியில் இருக்கும் ‘முத்தீஸ்வரர் கோயில்’ தனக்குள் மேலும் ஆச்சர்யத்தை அள்ளிவைத்து அசர வைக்கிறது.

‘மரகதவள்ளி அம்பிகை உடனுறை முக்தீஸ்வரர் கோயில்’ எனும் இக்கோயில், மீனாட்சியம்மன் கோயிலின் உபகோயில் எனும் பெருமைக்குரியது. மேலும் இந்தக் கோயிலானது  ஆந்திர மாநிலம் காளகஸ்தி கோயிலுக்கு இணையான ஆன்மிகப் பெருமைக்குரியது.

திருமலை நாயக்கரின் தம்பி முத்துவீர நாயக்கரால் 1609 முதல் 1623க்குள் கட்டி முடிக்கப்பட்டு, அழகு பேசும் கலைப்பொக்கிஷப் பெருமைக்குரியதாகவும் இருக்கிறது. இத்துடன், சூரியக் கதிர்கள் சிவனை தரிசிக்கும் அதிசயம் இங்கு ஆண்டுக்கு இருமுறை நடக்கிறது. ‘‘வழிபட்டால் முக்தி தரும் பெருமைக்குரியதாக ‘முக்தீஸ்வரர் கோயில்’ இருக்கிறது. 

சூரியக்கதிர்கள் சுவாமி சன்னதி மண்டபத்தின் துவாரம் வழியாக கோயிலின் நந்தியில் பட்டு எதிரொளித்து மூலஸ்தானத்தில் உள்ள லிங்க வடிவிலான சிவனை தரிசிக்கும் அதிசயம் தொடர்கிறது. இந்த நிகழ்வுக்கென ஒரு பழங்கதையும் இருக்கிறது.

துர்வாச முனிவர் சாபத்தில் இந்திரனின் ஐராவத யானை பூலோகம் வந்தது. மதுரையின் இக்கோயிலில் சிவனை வழிபட்டதால் சாபம் நீங்கியது. ஆனால், யானையோ தன்னை மறந்து இங்கேயே தங்கி விடுகிறது. தன் யானையைத் தேடி அழைத்து வரும்படி இந்திரன், கதிரவனை அனுப்பி வைக்கிறார். இக்கோயிலை கதிரவன் தேடி வந்து, இந்திரனின் யானையை அழைத்துச் சென்றதாம்.