தாப்ஸியின் குமுறல் கேட்கிறதா..?

பொதுவாக நடிகைகளில் பலர் முன்னணி கமர்ஷியல் ஹீரோக்களுடன் சேர்ந்து ஜோடியாக நடிப்பதில் ஆர்வம் காட்டுவார்கள். படம் ஓடினால் மற்ற ஹீரோக்களுக்கு ஜோடியாக ஒரு ரவுண்ட் வர தூதுவிடுவார்கள். மார்க்கெட் இருக்கும் போது சம்பாதிப்பதில் மும்முரமாக இருப்பார்கள். அதற்கு மேல் அவர்களது பேட்டியோ அல்லது கருத்துகளோ அவர்கள் நடிக்கும் படங்களைப் பற்றி மட்டுமே இருக்கும்.

குறிப்பாக அவர்கள் சார்ந்திருக்கும் சினிமா துறை குறித்தோ, திரைப்படங்கள் பற்றியோ அல்லது சமூகம் சார்ந்த கருத்துகளையோ சொல்ல விரும்ப மாட்டார்கள்.
ஆனால், இந்த நடிகைகளில் இருந்து மாறுபட்ட ஒரு சில நடிகைகளில் தாப்ஸியும் ஒருவர்.உதாரணத்திற்கு, தற்போது திரைப்படங்களுக்கு நிலவும் பஞ்சாயத்து குறித்து வெளுத்து வாங்கியிருக்கிறார் தாப்ஸி. சமீபத்தில்தான் இவர் ‘தக் தக்’ என்ற படமொன்றைத் தயாரித்திருந்தார் என்பது குறிப்பிடத்தக்கது.

‘‘இன்றைக்கு சிறிய பட்ஜெட் படங்களுக்கு திரையரங்கு உரிமை, ஓடிடி உரிமை விஷயங்களில் பெரும் பிரச்னை இருக்கிறது. சின்ன பட்ஜெட் படங்களைத் தயாரிக்கும் தயாரிப்பாளர்களுக்கு தயாரிப்பு செலவை ஈடுகட்ட ஓடிடி உரிமைகள் மூலம் கிடைக்கும் வருவாய் உதவியாக இருக்கும். ஆனாலும் அந்தப் படத்தை விளம்பரப்படுத்தவும், பப்ளிசிட்டி செய்யவும் தயாரிப்பாளர் தனது கையிலிருந்துதான் பணத்தை இறக்கியாக வேண்டும்.