இந்த புத்தாண்டு ஒரு பூகம்பத்துடன்தான் புலர்ந்திருக்கிறது. ஆம். ஜனவரி ஒன்றாம் தேதி ஜப்பான் நாட்டை குலுக்கி எழுப்பி விட்டது ஒரு பூகம்பம். ரிக்டர் அளவுகோலில் 7.6. அதைத் தொடர்ந்து அடுத்தடுத்து குட்டிக்குட்டியாக 21 நில அதிர்வுகள்.

ஜப்பானின் மேற்குக் கரையில், நோட்டோ தீபகற்பம் அருகே ஏற்பட்ட இந்த நிலநடுக்கத்தால் இஷிகவா பகுதியில் பெரும் பாதிப்பு. சுசு பகுதியில் பல வீடுகள் இடிந்தன. 32 ஆயிரம் வீடுகளில் கரண்ட் கட். கூடவே குடிநீர், தொலைபேசி தொடர்புகளும் துண்டிப்பு.

ஒரு லட்சம் பேர் அவசரமாக வெளியேற்றப்பட, உயிர்ப்பலி மொத்தம் 92. காயம் அடைந்தவர்கள் 413 பேர். இதுபோக காணவில்லை என நூற்றுக்கணக்கானவர்களைத் தேடிக்கொண்டு இருக்கிறார்கள். 

இந்த சுனாமி என்கிற ஆழிப்பேரலை எச்சரிக்கை, ஜப்பானை மட்டுமின்றி, ரஷியா, வட கொரியா நாடுகளையும் அச்சுறுத்தியது. புத்தாண்டு பூகம்ப அதிர்ச்சியில் இருந்து ஜப்பான் இன்னும் மீளாத நிலையில், ‘அடுத்தடுத்து அங்கே பூகம்பம் ஏற்பட 20 சதவிகித வாய்ப்பு இருக்கிறது’ என்று எச்சரித்திருக்கிறார்கள் புவியியல் வல்லுநர்கள்.

ஜப்பான் பூகம்பத்தைத் தொடர்ந்து ஜனவரி 5ம்தேதி மிசோரம் மாநிலம் லுங்லே பகுதியில் 3.5 அளவில் ஒரு சின்ன குலுக்கல் ஏற்பட்டது குறிப்பிடத்தக்கது.சரி. பூகம்பங்கள் ஒருபக்கம் இருக்கட்டும். 

கடந்த ஆண்டின் கடைசி மாதத்தில் சென்னையைத் துவைத்து தொங்கப் போட்ட மழையை நாம் மறந்திருக்க மாட்டோம். வழக்கமாக, சென்னைக்கான மொத்த மழையில் 63 சதவிகிதத்தை வாரிவழங்குவது வடகிழக்குப் பருவமழைதான். ஆனால், இந்தமுறை மிக்ஜாம் புயலுடன் கூட்டணி சேர்ந்து சென்னையை ஏகத்துக்கும் மிரட்டிவிட்டது வடகிழக்குப் பருவ மழை.

‘சென்னை வெள்ளத்தில் மிதக்கிறது, திருநெல்வேலி போன்ற தென்மாவட்டங்கள் வெப்பத் தில் தீயாய் தகிக்கிறது’ என்று சிலர் அங்கலாய்க்க, இந்த அங்கலாய்ப்பு வருண பகவானுக்குக் கேட்டுவிட்டதோ என்னவோ? சென்னையை அடுத்து திருநெல்வேலி, தூத்துக்குடி மாவட்டங்கள் எதிர்பாராதவிதமாக 60 செமீ பெருமழையைச் சந்தித்து வெள்ளக் காடாயின.

நமது பூமியின் இப்போதைய சராசரி வெப்பநிலை 1.70 டிகிரி செல்சியஸ். பூமியில் வெப்ப நிலை கூடக்கூட, மழையளவு கூடிக்கொண்டே போகும் எனக் கணிக்கிறார்கள் வானிலை நிபுணர்கள். அதாவது ஒரு டிகிரி செல்சியஸ் வெப்பம் கூடினால் மலைப்பகுதிகளில் 15 சதவிகிதம் மழை அளவு கூடும் என்கிறார்கள். 

இதே ரீதியில் வெப்பநிலை உயர்ந்துகொண்டே போனால், 2020ம் ஆண்டுக்கும் 2040ம் ஆண்டுக்கும் இடையில் மழையளவு 5 சதவிகிதம் அதிகரிக்க வாய்ப்புஉண்டாம். 2050ல் 11 சதவிகிதம். அதுவே 2070 - 2090ல் இது 21 சதவிகிதம். இதே வேகத்தில் போனால், இந்த நூற்றாண்டின் முடிவில் மழையளவு 21 சதவிகிதம் அதிகரித்து விடும் என்று கணிக்கிறார்கள் நிபுணர்கள்.