மிஸ் தமிழ்நாடு, மிஸ் இந்தியா, மிஸ் யூனிவர்ஸ், மிஸ் வோர்ல்ட்... இப்படி காலம் காலமாகப் போட்டிகள் நடப்பது வழக்கம். ஆனால், உலகிலேயே முதன்முறையாக மிஸ் ஏஐ அழகிப் போட்டி தற்போது நடக்கவிருக்கிறது. 

அதாவது செயற்கை நுண்ணறிவு அழகிகளுக்கான போட்டி நடைபெற இருக்கிறது. இதில் நம் இந்திய ஏஐ அழகி சாரா சதாவரி (Zara Shatavari, India) முதல் 10 இடங்களுக்குள் வந்து மாஸ் காட்டியுள்ளது கூடுதல் தகவல்.இந்தப் போட்டிகளில் பல்வேறு நாடுகளில் இருந்து 1500 ஏஐ மாடல்கள் போட்டியிட்டனர். அழகு, தொழில்நுட்ப அறிவு மற்றும் சமூக ஊடகங்களில் அவர்களுக்கு உள்ள ஆதரவுகள், பிரபலம் ஆகியவற்றின் அடிப்படையில் முதல் 10 பேரை ‘ஃபேன்வியூ’ அமைப்பு தேர்வு செய்துள்ளது.

லண்டனைச் சேர்ந்த ‘ஃபேன்வியூ’ அமைப்பு உலக அளவில் ஏஐ மெசேஜ் மற்றும் சாட்டிங் தளமாகவும், ஏஐ கிரியேட்டர்களுக்கான களமாகவும் இயங்கி வருகிறது. கடந்த ஒரு மாதமாக 1500 மாடல்களைக் கொண்டு இந்த அழகிப் போட்டி நடந்து வருகிறது. இதில் இரண்டுநடுவர்களும் மேலும் இரண்டு ஏஐ நடுவர்களும் போட்டி முடிவுகளை தேர்வு செய்வர்!ராகுல் சவுத்ரி என்பவரால் உருவாக்கப்பட்ட இந்திய ஏஐ மாடல்தான் சாரா சதாவரி.

‘இந்தியன் மொபைல் ஏட் ஏஜென்சி’ என்ற நிறுவனத்தின் துணை நிறுவனரான ராகுல் சவுத்ரி தங்கள் நிறுவன விளம்பர நோக்கங்களுக்காக சாரா சதாவரி என்ற ஒரு செயற்கை நுண்ணறிவு மாடலை உருவாக்கினார். தங்களது ஏஜென்சியின் டிஜிட்டல் மாடலாக சாராவை ராகுல் சவுத்ரி பயன்படுத்தி வருகிறார்.

சாராவுக்கென தனியாக சமூக வலைத்தள பக்கங்கள் உள்ளன. அதில் உடல் நலம், வேலை வாய்ப்பு, திறன் மேம்பாடு மற்றும் ஃபேஷன் ஆகியவை குறித்து டிப்ஸ்களை வழங்கி வருகிறார் சாரா.

‘‘உலகின் முதல் மிஸ் ஏஐ போட்டியின் பட்டியலில் முதல் பத்து இடத்தில் ஒருவராக சாரா இடம் பிடித்துள்ளது சந்தோஷமாக இருக்கிறது. இந்தியாவின் பிரதிநிதியாக சாரா கலந்து கொள்வது மற்றும் ஆசிய பிரதிநிதியாக இந்தப் போட்டியில் முதல் 10 இடங்களில் ஒன்றைப் பிடித்திருப்பது என்பது மிகவும் பெருமை...’’ புன்னகையுடன் சொல்கிறார் ராகுல் சவுத்ரி.

வெற்றி பெறுவோர் உலக செயற்கை நுண்ணறிவு கிரியேட்டர் விருது (World AI Creator Awards (WAICAs)) பெறுவர். இதன் வெற்றியாளர்களை இரண்டு நடுவர்கள் (மீடியா உரிமையாளர் மற்றும் தொழிலதிபர் ஆண்ட்ரூ பிளோச், அழகிப் போட்டிகளில் அனுபவசாலியான சாலி-ஆன் பாவக்கெட்) தேர்வு செய்ய உள்ளனர். 

இவர்களுடன் இரண்டு ஏஐ நடுவர்களான ஐதானா லோபஸ் மற்றும் எமிலி பெல்லிகிரினி இணைந்து வெற்றியாளர்களை தேர்வு செய்வார்கள்.இந்தியாவைச் சேர்ந்த சாரா தவிர்த்து மேலும் 9 அழகிகள் இந்த இறுதிப் பட்டியலில் போட்டியிட இருக்கிறார்கள். அவர்களையும் தெரிந்து கொள்வோமா?!