சமந்தா, கீர்த்தி சுரேஷ், பிரியங்கா சோப்ரா... என பல பிரபலங்கள் பாம்பு நெக்லஸில் காட்சி கொடுத்தனர். 

உலக கோடீஸ்வரர்களின் நகைப் பெட்டிகளையும் அவர்கள் கழுத்தையும் மட்டுமே அலங்கரித்த இந்த நகைகள் தற்போது இந்திய மார்க்கெட்டிலும் கால் பதித்துள்ளதுதான் ஹைலைட். இதென்ன பாம்பு நகைகள், யாருடைய டிசைன் எனத் தேடினால் வரலாறு நம்மை 18ம் நூற்றாண்டுக்கு அழைத்துச் செல்கிறது. 

சோதிரியோஸ் வூல்காரிஸ்... 1857ம் ஆண்டு கிரீஸ் நாட்டின் பரமிதியா என்ற சிறிய கிராமத்தில் பிறந்தவர். ஏழைக் குடும்பத்தைச் சேர்ந்தவர். அவரது தந்தை வெள்ளி ஆபரணங்கள் வடிவமைக்கும் பணியாளர். 

சிறுவயதிலிருந்தே சோதிரியோஸ் தந்தையுடன் சேர்ந்து நகை செய்வதைக் கற்றுக்கொண்டார். வெள்ளி வேலைகளில் சிறிய கைவினைப் பொருட்களை உருவாக்கி விற்பது அவரது வாழ்க்கையின் ஆரம்பம். அவருக்கு கலை, அழகு, வடிவமைப்பு இவற்றில் தீவிரமான ஆர்வம் இருந்தது.

திடீரென கிரீஸில் அரசியல் குழப்பங்களும் பொருளாதார சிக்கல்களும் ஏற்பட்டன. இதனால் சோதிரியோஸின் தொழில் கடுமையாக பாதிக்கப்பட்டது. வாழ்க்கையில் முன்னேற வேண்டும் என்ற உறுதியுடன் அவர் தனது பிறந்த நாட்டை விட்டுவிட்டு புதிய வாய்ப்புகளைத் தேடி இத்தாலிக்குப் புறப்பட்டார். 

தன்னிடம் இருந்த சிறிய பணம், பெரிய கனவு ஆகியவைதான் அவரது மூலதனம்.1880களில் அவர் இத்தாலியின் ரோம் நகரத்தை அடைந்தார். அங்கு ஒரு சிறிய கடையைத் தொடங்கி வெள்ளி ஆபரணங்களை விற்கத் தொடங்கினார். 

அவரது வேலைகளில் இருந்த நுணுக்கம் மற்றும் தனித்துவம் காரணமாக வாடிக்கையாளர்கள் விரைவாகவே அதிகரித்தனர். ரோமின் மக்கள் அவரது கைத்திறனை ரசித்து, அவரது ஆபரணங்களை பெருமையுடன் அணிந்தனர். 

இதன் மூலம் சோதிரியோஸுக்கு தன்னுடைய வாழ்நாள் கனவு எட்டிப் பிடிக்கும் தூரத்திற்கு வந்தது.1884ம் ஆண்டில் அவர் ரோம் நகரிலேயே தனது முதல் நகைக் கடையை நிறுவினார். 

தனது குடும்பப் பெயரான ‘Voulgaris’ என்பதிலிருந்து ‘Bulgari’ என்ற பெயரை உருவாக்கி பிரத்யேக ஆடம்பர நகை பிராண்டாக உருவாக்கினார். சோதிரியோஸ் வடிவமைத்த நகைகள் வித்தியாசமானவை. 

மாணிக்கம், மரகதம், ரத்தினங்களை மிகச் சுலபமாக தனது நகைகளில் இணைத்து வடிவமைத்தார். அவர் நகைகளில் சேர்க்கும் விலையுயர்ந்த கற்களின் மதிப்பு, அதன் விலை என எதைப் பற்றியும் கவலைகொள்ளவில்லை. 

ரோமானிய கலை மற்றும் நவீனம் இணைந்த அவரது வடிவமைப்புகள் ‘புல்காரி’யின் தனிச்சிறப்பாக மாறி அரச குடும்பங்களின் பாரம்பரிய நகைப் பட்டியலில் இணையத் துவங்கின. 

‘புல்காரி’ தற்போது நகைகளுடன் கைக்கடிகாரங்கள், வாசனைத் திரவியங்கள், பைகள், மற்றும் சொகுசு ஹோட்டல்கள் வரை விரிந்துள்ளது.சோதிரியோஸ் வூல்காரிஸ் 1932ம் ஆண்டு மறைந்தார். ஆனால், அவர் உருவாக்கிய ‘புல்காரி’ நிறுவனம் இன்றும் அவர் பெயரை உலகம் முழுக்க எடுத்துரைத்துக் கொண்டிருக்கிறது. 

அது வெறும் நகை விற்பனை நிறுவனமாக அல்லாமல், கலை, அழகு, பாரம்பரியம் ஆகியவற்றின் சின்னமாகவும், பணத்தின் அடையாளமாகவும் மாறியது. ஒரு கிராமத்து சிறுவன் தனது கைவினைத் திறமையையும் கனவையும் கொண்டு உலகப் புகழ் பெற்ற பிராண்டை உருவாக்கிய கதை இது. 

‘Serpenti’ என்றால் லத்தீன் மொழியில் பாம்பு. ‘புல்காரி’, பாம்பை வெறும் ஓர் உயிரினமாக பார்க்காமல் மாற்றம், புதுப்பிப்பு, மற்றும் நிரந்தர அழகு என்பவற்றின் சின்னமாகப் பார்க்கிறது.

 

‘செர்பன்டி’ நகைகள் 1940களில் அறிமுகமானது.

 ‘புல்காரி’ பிராண்ட் பாம்பின் வடிவத்தை நகைகளில் கலைநயத்துடன் வடிவமைத்தது. தங்கம், வைரம், எமரால்ட், ரூபி போன்ற விலைமதிப்புள்ள கற்கள் சேர்த்து, பாம்பின் நெளிவைப் போன்ற வளையல்கள், சங்கிலிகள், கடிகாரங்கள் உருவாக்கப்பட்டன. 

இவற்றில் ‘செர்பன்டி வாட்ச்’ (Serpenti Watch) உலகப் புகழ் பெற்றது. பாம்பின் உடல் வடிவில் சுருண்டிருக்கும் இக்கடிகாரம் ஃபேஷன் விரும்பிகளுக்கு பிரியத்துக்குரிய உடல் உறுப்பாக மாறின. 

நம் வீடுகளில் பாம்பு வடிவ சின்ன மோதிரம் அணிந்தாலே ‘இது வீட்டுக்கு நல்லதல்ல’ என்கிற மூட நம்பிக்கை இருக்கும். ஆனால், மேலை நாட்டவர்கள் இந்தப் பாம்புகளைத் தன்னம்பிக்கையின் அடையாளமாகப் பார்க்கிறார்கள். 

இது ஒரு நகை மட்டுமல்ல - ‘தான் யார் என்பதைக் காட்டும் கலை வடிவம்’ என்கின்றனர் ‘புல்காரி’ வடிவமைப்பாளர்கள்.