சுற்றிலும் நீர்நிலை. அதில் அடர்ந்த மரங்களும், செடி கொடிகளும் சூழ்ந்திருக்கின்றன. சூரிய ஒளி கிஞ்சித்தும் உட்புகாத அந்த இடம் அத்தனை குளுகுளுவென இருக்கிறது. பறவைகளும், பூச்சியினங்களும், நீர்வாழ்வினங்களும், நரி, கீரிப்பிள்ளை, காட்டுப்பூனை உள்ளிட்ட மற்ற உயிரினங்களும் அதனுள் சுதந்திரமாக சுற்றித் திரிகின்றன. 

பள்ளி மற்றும் கல்லூரி மாணவர்களின் கல்விச் சுற்றுலாவிற்காகவும், ஆர்வமுள்ள பொதுமக்களுக்காகவும் இந்தப் பூங்காவைச் சுற்றிக்காட்ட சென்னை நதிகள் சீரமைப்பு அறக்கட்டளை பொருள் விளக்க அலுவலர்களையும் நியமித்துள்ளது. 

அவர்களில் ஒருவரான கோமதி நம்முடன் வந்தார்.சுமார் மூன்றரை கிலோமீட்டர் தொலைவுள்ள நடைப்பயிற்சிப் பாதையில் நடந்தோம். ராஜா அண்ணாமலைபுரத்தில் இருந்து சாந்தோம்-பட்டினப்பாக்கம் சிக்னலில் உள்ள ஸ்கைவாக் மேம்பாலம் வரை சென்று வரலாம். 

இதனை சீரமைப்பு செய்யணும்னு கடந்த 2007ம் ஆண்டு தமிழக அரசு திட்டப்பணிகளைத் தொடங்கியது. அப்போதைய தமிழக முதல்வர் கலைஞர் இதற்கு அடிக்கல் நாட்டினார். அப்படியாக முதற்கட்டமாக 58 ஏக்கர் சுற்றளவில் அமைந்துள்ள அடையாறு உப்பங்கழியோடையை சீரமைப்பதற்கான திட்டம் தொடங்கப்பட்டது. 

பின்னர் 2011ம் ஆண்டு முதல்வர் கலைஞர் திறந்து வைத்தார்...’’ என நடந்தபடியே நம்மிடம் பேசிய கோமதி, அங்கிருந்த மரங்கள், செடிகொடிகள் பற்றி விளக்கங்கள் கொடுத்தார். 

‘‘இங்க ஒன்றரை லட்சம் மரக்கன்றுகள் நடவு செய்திருக்கோம். குறிப்பாக வறண்ட பசுமை மாறா காடுகள்ல இருக்கக்கூடிய 177 வகையான தாவரங்களை நடவு செய்திருக்கோம். உதாரணத்திற்கு கருங்காலி மரம், காட்டு எலுமிச்சை, காட்டு புன்னை, நீர்மருது, நீர் அடம்பைனு ரொம்ப தனித்துவமான மரங்களை வச்சிருக்கோம்.

 இதுதவிர புங்கம், மகிழம் உள்ளிட்ட மரங்களும் இருக்குது. அப்புறம் மாங்குரோவ் காடுகளை உருவாக்கியிருக்கோம். இதில் மாங்குரோவ் வாக்னு ஒரு பகுதியும் இருக்கு...’’ என்றவர், அங்கிருந்த ஓய்வு குடிலில் நம்மை அமர வைத்தார். 

‘‘பொதுமக்களும், மாணவர்களும் இளைப்பாற இந்தக் குடில்கள் ஆங்காங்கே உருவாக்கப்பட்டிருக்கு. அப்புறம், மாணவர்களைக் கவர பூச்சிகள், மரங்கள் பற்றின குறிப்புகளையும் ஆங்காங்கே தந்திருக்கோம்.  

ஆரம்ப காலத்துல பொதுமக்களுக்கு இங்க அனுமதியில்ல. காரணம் என்னன்னா இது சீரமைக்கப்பட்ட பூங்கா. பல வகையான அரிய தாவரங்களும், விலங்குகளும் இருப்பதால் அதன் வளர்ச்சி பாதிக்கும்னு அனுமதி கொடுக்கல. இப்ப நாம் சீரமைப்பு பண்ணி தக்கவைப்பதில் வெற்றியும் பெற்றிருக்கோம். 

இதெல்லாம் கடந்த 15 ஆண்டுகள் சீரமைப்பு மூலமே வந்திருக்கு. 

இப்போ, நாம் சிறப்பாக சீரமைப்பு செய்திட்டு வர்றோம். இதனால் இன்னும் உயிரினங்கள் பல்கிப்பெருகிட்டு இருக்குது. போதிய உணவு, போதிய பாதுகாப்பு, அதுங்களுக்கான சூழல் எல்லாமே இங்கே இருப்பதாலேயே பல்கிப்பெருகுது...’’ என்கிறவர், தண்ணீருக்கு நடுவே இருந்த சிறிய பாலத்தின் வழியே அழைத்துச் சென்றார். 

அதனால்தான் தொல்காப்பிய பூங்கா பராமரிக்கப்பட வேண்டிய ஒரு பொக்கிஷம்னு சொல்றோம்...’’ என கோமதி நெகிழ, கண்காணிப்பு கோபுரம் வந்தது.இரண்டு அடுக்குகள் கொண்ட இந்த வாட்ச் டவரிலிருந்து அடையாறு உப்பங்கழியை இருபுறமும் ரசிக்கலாம். இதில் ஒரு பைனாகுலர் டெலஸ்கோப்பும் வைத்துள்ளனர். 

அது இன்னும் நெருக்கமாகக் காட்டுகிறது.இதன்வழியே உப்பங்கழியில் திரியும் பறவைகளையும், மாங்குரோவ் காடுகளில் ஒளிந்திருக்கும் பறவையினங்களையும் ரசிக்கலாம். நிறைவாக அதன் அருகில் இருக்கும் சாந்தோம் ஸ்கைவாக் மேம்பாலத்தில் ஏறி பார்த்திட்டு திரும்ப இரவாகியிருந்தது நேரம்.