நம் கருப்பரின் ஒவ்வொரு ஆலயம் குறித்தும் பார்த்து வருகிறோம். இடையிடையே கருப்பண்ணசாமியின் புகழ் பற்றியும் அறிந்து வருகிறோம்.அந்த வகையில் இந்த அத்தியாயத்தில் முக்கியமான ஒன்றைக் குறித்து பார்க்கப் போகிறோம்.

அதுதான் பஞ்ச பூதங்களுக்கும் கருப்பண்ணசாமிக்கும் இருக்கும் தொடர்பு பற்றிய உண்மைகள்.பலமுறை சொன்னதுதான். திரும்பத் திரும்ப உணர்த்துவதில் தவறில்லை. தமிழக கிராமச் சமூகங்களில் வழிபடப்படும் கருப்பண்ணசாமி, பொதுவாக ஒரு ‘காவல் தெய்வம்’ என்ற அளவிலேயே புரிந்து கொள்ளப்பட்டுள்ளார்.

அவரை மனதார வணங்கும் பக்தர்களும் அப்படியே கருதுகிறார்கள்.ஆனால், உண்மை அதுவல்ல. ஆழமாக நோக்கினால் அவர் வெறும் நம்பிக்கையோ, புராண உருவமோ அல்ல. இயற்கை, காலநிலை, சுற்றுச்சூழல் மாற்றங்கள் ஆகியவற்றை மனித சமூகங்கள் புரிந்துகொண்ட விதத்தின் ஒரு சமூக பண்பாட்டு வடிவம் என்பது புரியும். 

காதில் பூ சுற்றவில்லை. அல்லது கலந்துகட்டி போகிறபோக்கில் அடித்துவிடவில்லை. உண்மையிலேயே நம் கருப்பர் இயற்கை, காலநிலை, சுற்றுச்சூழல் மாற்றங்கள் ஆகியவற்றை உணர்த்தும் அறிவியல் பரம்பொருள். 

மிகையில்லை. இன்றைய உலகில் காலநிலை மாற்றம் குறித்த அறிவை வழங்குவது Intergovernmental Panel on Climate Changes எனப்படும் IPCC  போன்ற அறிவியல் அமைப்புகள்தான். அவை செயற்கைக்கோள் தரவுகள், கணினி மாதிரிகள், நீண்டகால புள்ளிவிவரங்கள் மூலம் உலகளாவிய காலநிலை மாற்றங்களை விளக்குகின்றன.

இதற்கு மாறாக நம் கருப்பண்ணசாமி வழிபாடு ஓர் உள்ளூர் காலநிலை அறிவு அமைப்பாகத் திரண்டு கண்முன் நிற்கிறது.இப்படிப் பாருங்கள். ஒரு கிராமத்தில் மழை  தவறினால், வறட்சி ஏற்பட்டால், நோய் பரவினால் அல்லது விளைச்சல் குறைந்தால் என்ன நினைப்போம் அல்லது என்ன செய்வோம்?நம் கருப்பண்ணசாமியின் கோபமாகக் கருதுவோம்.

இது மூடநம்பிக்கை அல்ல. மாறாக, இயற்கை மாற்றங்களை சமூக நினைவாகப் பதியச் செய்த ஒரு வழிமுறை.IPCC உலகளாவிய தரவுகளைச் சொல்கிறது; பிரபஞ்ச மாற்றங்களைப் பட்டியலிடுகிறது. 

அதேபோல்தான் நம் கருப்பண்ணசாமி செய்கிறார். ஆனால், உலகளாவிய தரவுகளை முன்வைக்காமல் கிராம அனுபவங்களைச் சொல்கிறார். மொத்தத்தில் ஐபிசிசி-யும் சரி, நம் கருப்பரும் சரி... இயற்கையைப் பற்றி, இயற்கையின் மாற்றங்கள் குறித்தே பேசுகின்றன; பேசுகிறார். என்ன... பேசும் மொழிதான் வேறு.

சுற்றுச்சூழலில் முக்கியமாக புழங்கும் வார்த்தை ‘Metabolic Rift’. அதாவது, மூலதன உற்பத்தி முறையால் மனிதனுக்கும் இயற்கைக்கும் இடையேயான சமநிலை உடைவதைக் குறிப்பிடும் சொல் இது. புரியாததைச் சொல்வதாக குழம்ப வேண்டாம். 

நிலம், நீர், காடு ஆகியவையெல்லாம் சமூகத்துக்கு வாழ்வாதாரமாக கல் தோன்றி மண் தோன்றாக் காலம் தொட்டு இருக்கிறதல்லவா? அந்நிலை மூலதன உற்பத்தி முறையால் மாறுகிறது. இயற்கைப் பொருட்கள் சமூகத்துக்கானவை என்பது மாறி தனிப்பட்ட ஒரு மனிதர் அல்லது நிறுவனத்துக்கு சொந்தமானது என மாறுவது. 

இவையிரண்டும் ‘Metabolic Rift’ - அதாவது, மூலதன உற்பத்தி முறையால் மனிதனுக்கும் இயற்கைக்கும் இடையேயான சமநிலை உடைவதை நாம் புரிந்து கொள்வதற்கான எடுத்துக்காட்டுகள்.

காஞ்சிபுரம் ஏகாம்பரநாதர் கோயிலை நிலத்துக்கு அடையாளமாகவும், திருச்சி திருவானைக்காவல் ஜம்புலிங்கேஸ்வரரை நீருக்கு அதிபதியாகவும், திருவண்ணாமலை அருணாச்சலேஸ்வரை நெருப்பின் தலைவராகவும், காளகஸ்தி ஸ்ரீ காளஹஸ்தீஸ்வரரை வாயுவுக்கு அரசராகவும், சிதம்பரம் நடராஜரை ஆகாயத்துக்கு அடையாளமாகவும் போற்றுகிறார்கள்; செல்கிறார்கள்; வணங்குகிறார்கள். நம் கருப்பரும்... நம் கருப்பண்ணசாமியும் அப்படித்தான். 

ஆம். அவர் ஒரு ‘பஞ்சபூத தெய்வம்’.அடித்துச் சொல்லலாம். கருப்பண்ணசாமி, ஆகம சாஸ்திரத்தில் உருவான விண்ணுலகக் கடவுளல்ல. அவர் நிலத்திலிருந்து (மண்), காற்றிலிருந்து (வாயு), தீயிலிருந்து (தேஜஸ்) உருவான கிராமச் சமூகத்தின் பாதுகாப்பு சக்தி.