2030ம் ஆண்டுக்குப் பிறகு சிங்கிள் பெண்கள் அதிகமாக இருப்பார்கள்... இன்னும் 1000 வருடங்களில் ஆண் இனமே இருக்காது... இப்படியான செய்திகள் நம்மை அவ்வப்போது அதிர்ச்சிக்குள்ளாக்கும்.

ஆனால், சமீபத்திய சர்வே ஒன்று ஆண்களுக்கு மேலும் ஒரு அபாய மணி அடித்திருக்கிறது. அதாவது உறவில் பிரிந்த அல்லது திருமண உறவில் விவாகரத்தான, தனியான ஆண்கள் மூன்றில் ஒருவருக்கு தற்கொலை எண்ணம் வருவதாகவும், அதில் பலர் தற்கொலை செய்து கொள்வதாகவும் ஆஸ்திரேலிய சுகாதார இன்ஸ்டிடியூட் சர்வே தெரிவித்துள்ளது. 

இதில் நாட்டுக்கு நாடு ஓரிரு சதவீத வித்யாசமே என்றாலும் பெண்களை விடவும் ஆண்கள் அதிகம் இதில் தற்கொலைக்கு முயற்சி செய்கின்றனர். ஏன்? இதன் பின்னணி என்ன?‘‘பழமைவாத பழக்கம்தான் மிக முக்கியக் காரணம்...’’ என்கிறார் சைக்காலஜிஸ்டும் ஹிப்னோதெரப்பிஸ்டுமான டாக்டர் அபிலாஷா. 

 ‘‘அதாவது வலி... அதற்கு உதவி கேட்கணும் என்பதே உயிர்களின் அடிப்படை தேவை என்பது ஆணுக்கு மட்டும் வேறுபாடமாக இருக்கிறது. ஆணுக்கு வலி இருக்கக் கூடாது, அவன் அழக் கூடாது, ஆண் உதவுவதற்காகவே பிறந்தவன், உதவி கேட்க பிறந்தவன் அல்ல என்கிற பழக்கமும் எண்ணமும்தான் காரணம். 

பொதுவாக மத்திம வயது பிரச்னைகள் என்கிற ஒரு பிரிவே மனோவியல் துறையில் உண்டு. அதாவது 35 வயதுக்கு மேல் வருகிற தனிமை, உடல் பிரச்னைகள்... இதெல்லாம் சேர்ந்து ஒரு மனிதனை மேலும் அழுத்தும். இதில் திருமண வாழ்க்கையில் இருப்பவர்களுக்கு மனைவி, குழந்தைகள் என எதோ ஒரு பொறுப்பு யோசிக்க விடாமல் ஓட வைத்துவிடும். 

நான் தனிமையில் இருக்கிறேன்... எனக்கு உதவி வேண்டும், எனக்கு வலிக்கிறது எனச் சொல்லக்கூட சமூகம் ஆணுக்கு இடம் கொடுப்பதில்லை. இதன் காரணமாகவே ஆண்கள் தற்கொலை செய்து கொள்வது அதிகரித்திருக்கிறது.முன்பை விட இன்று அதிகமாகவே பெண்கள் தங்கள் வாழ்க்கைக்காகக் கேள்வி கேட்கத் துவங்கி விட்டனர். 

ஆனால், ஆண் யாரிடம் கேட்பான்? மேலும் காதல்/கல்யாண பிரிவு வாழ்க்கையில் பொருளாதார அழுத்தம், யாருக்காக நான் ஓடுகிறேன், எதற்காக இந்த வாழ்க்கை என்கிற கேள்விகள் அவனைத் துரத்த... தற்கொலை எண்ணங்கள் அவனுக்குள் அதிகரிக்கின்றன...’’ என்ற டாக்டர் அபிலாஷா, இதற்கான தீர்வுகளையும் முன்வைக்கிறார்.