கடந்த நான்கு தசாப்தங்களுக்கும் மேலாக டப்பிங் துறையில் அளப்பரிய சேவை செய்து வருபவர் ராஜேந்திரன். இந்திய சினிமாவின் மிக முக்கியமான டப்பிங் கலைஞரான இவர் கோட்டா சீனிவாசராவ், சாயாஜி ஷிண்டே உட்பட பல நடிகர்களுக்கு டப்பிங் பேசியுள்ளார். ‘லயன் கிங்’ படத்துக்கும் குரல் கொடுத்துள்ளார். 

சென்னை திருவல்லிக்கேணி இந்து உயர்நிலை பள்ளியில் படிக்கும்போதுதான் சினிமா ஆசை துளிர்விட்டது. ரா.பார்த்திபன், நடிகர் வசந்த் என்னுடைய வகுப்பு தோழர்கள். எனக்கு இயல்பாகவே கதை சொல்லவரும். நண்பர்கள் கொடுத்த ஊக்கத்தால் நாடகங்களில் நடிக்க முயற்சி செய்தேன். ஒய்.ஜி.பி. டிராமா ட்ரூப், ஃபிலிம் இன்ஸ்டிடியூட் ரமணன் சார் டிராமா ட்ரூப் என சில ட்ரூப்களில் சில காலம் ஸ்டேஜ் நுட்பம் கத்துக்கிட்டேன்.

நடிகராக என்னை பட்டை தீட்டியது லியோபிரபு. என்னுடைய ‘நலம் நலமறிய ஆவல்’ நாடகத்தை  நாகேஷ் சார் நேரில் கலந்துகொண்டு பாராட்டியுள்ளார். நடிப்பைப் பொறுத்தவரை என்னுடைய குருநாதர் நாகேஷ் சார். சுமார் 1500 க்கும் மேற்பட்ட நாடகங்கள் செய்துள்ளேன்.

கோட்டா சீனிவாசராவ், சாயாஜி ஷிண்டே போன்றவர்களுக்கு வில்லன் வாய்ஸ், ‘கிழக்கே போகும் ரயில்’ சுதாகருக்கு காமெடி வாய்ஸ் என பல மாடுலேஷனில் டப்பிங் பேசியிருக்கிறேன். 

இயக்குநர் ஹரி சார் என்னிடம் ஆரம்பத்தில் சில நிமிஷங்கள் பேசினார். பிறகு என் மேல் நம்பிக்கை இல்லாமல் சில காட்சிகளுக்கு பேசச் சொன்னார். என் பக்கத்தில் உட்கார்ந்திருந்த அவரை அனுப்பிவிட்டு டப்பிங் பேசினேன். 

கோட்டா சாரின் பாடிலேங்வேஜுக்கு ஏற்ப டப்பிங் பேசியிருந்ததைப் பார்த்துவிட்டு ‘ஸ்பில்ட் பெர்சனாலிட்டி மாதிரி  மாறிட்டீங்க’ன்னு பாராட்டினார். அந்தப் படத்துக்கு தமிழக அரசின் சிறந்த டப்பிங் ஆர்ட்டிஸ்ட் விருது எனக்கு  கிடைத்தது. 

இப்போது தொழில் பக்தி பரவசம் குறைந்துவிட்டது. அப்போது தெலுங்கு டூ தமிழ் டப்பிங் பேசும்போது ரைட்டர், டப்பிங் ஆர்ட்டிஸ்ட் அனைவரையும் வரவழைச்சு படத்தைப் போட்டுக்காட்டுவார்கள். 

யார், யார் என்ன கேரக்டர் பேசவேண்டும் என்று சொல்லிவிடுவார்கள். அப்போது லிப் சிஸ்டம். எல்லோரும் அவரவர் போர்ஷன் வரும்போது பேசவேண்டும். சிறிய தவறு நடந்தாலும் மறுபடியும் முதலில் இருந்து பேச வேண்டும். இப்போது டெக்னிக் வசதி உண்டு. எப்படி வேண்டுமானாலும் லிப் சிங் கொடுக்க முடியும். 

‘சாமி’ படத்துக்கு தாமு, மயில் சாமி என சிலர் ‘டப்’ பண்ணியிருந்தார்கள். ஆனால், மேட்ச் ஆகவில்லை. மிமிக்ரி கலைஞர்கள் ஒரு குரலை நகல் எடுக்க முடியும். ஆனால், பெர்ஃபாமன்ஸ் பண்ண முடியாது.  

‘ஆதவன்’ படத்தில் சூர்யா சார் அப்பாவாக மலையாள நடிகர் முரளி நடித்தார். அந்தப் படத்தில் அனைவரும் சொந்தக் குரலில் பேசினார்கள்.படம் முடியும்போது முரளி சார் மறைந்ததால் கே.எஸ்.ரவிக்குமார் சார் என்னை டப்பிங் பேச கூப்பிட்டார். அந்தப் படத்துக்கு நான்தான் டப்பிங் பேசினேன் என்பது பலருக்குத் தெரியாது.

டப்பிங் அருமையான துறை. ஆனால், உறுப்பினர்கள் நலனுக்காக யூனியன் எதுவும் செய்வதில்லை. ராதாரவி தலைவராக பொறுப்பு ஏற்ற காலத்திலிருந்து அவருடன் பயணிக்கிறேன்.