ஆம். இந்தக் காய்ச்சலின் பெயர் ஸ்க்ரப் டைஃபஸ். வாயில் பெயர் நுழையவில்லையா? பரவாயில்லை. ஒருவகையான ஃபீவரின் பெயர் இது என புரிந்துகொண்டாலும் போதும்.ஆந்திராவில் இந்த ஸ்க்ரப் டைஃபஸ் எனும் காய்ச்சல் பரவி சமீபத்தில் 9 பேர் இறந்துள்ளதாக செய்திகள் வந்துள்ளன. 

இதிலிருந்து இதன் வீரியத்தை உணரலாம். அத்துடன் நாம் அனைவரும் இதுகுறித்து விழிப்புணர்வுடன் இருக்கவேண்டியதும் காலத்தின் கட்டாயம். ஸ்க்ரப் டைஃபஸ் என்பது ஒருவகை ஒட்டுண்ணிக் கடியால் பரவும் காய்ச்சல். 

ஓரியன்சியா சுட்சுகாமுஷி - ஆமாம். ஜப்பானியர்தான். ‘ஜப்பான்காரன் எதை எதையோ கண்டுபிடிக்கிறா மாதிரி’ இதையும் கண்டறிந்திருக்கிறார்கள் - அப்படி கண்டறிந்தவரின் பெயர்தான் ஓரியன்சியா சுட்சுகாமுஷி.

உலகின் அனைத்துப் பகுதிகளிலும் பரவலாக இந்த பாக்டீரியா காணப்பட்டாலும் மேற்கே பாகிஸ்தான், கிழக்கே ஜப்பான், தெற்கே ஆஸ்திரேலியா ஆகிய பகுதிகளில் வாழும் நூறு கோடி மக்கள் இந்த ஸ்க்ரப்  டைஃபஸ் காய்ச்சல் பாதிப்புக்கு ஆளாகும் ஆபத்து இருப்பதாக இனம் காணப்பட்டுள்ளார்கள்.உலக வரைபடத்தில், மேற்கே பாகிஸ்தான், கிழக்கே ஜப்பான், தெற்கே ஆஸ்திரேலியா ஆகிய மூன்று நாடுகளிலும் புள்ளி வைத்து கோடால் இணையுங்கள். சரியாக ஒரு முக்கோணம் வரும்.

இந்த முக்கோணமே, ‘சுட்சுகாமுஷி முக்கோணம்’ என்றழைக்கப்படுகிறது. இந்த முக்கோணம் இருக்கும் பகுதியில் வாழும் சுமார் நூறு கோடி மக்களுக்கு ஏற்படும் காய்ச்சல் அறிகுறியில் நான்கில் ஒருவருக்கு ‘ஸ்க்ரப் டைஃபஸ் காய்ச்சல்’ உள்ளேன் ஐயா எனக் குரல் கொடுக்கிறது. 

தமிழ்நாடும் இந்த சுட்சுகாமுஷி  முக்கோணத்துக்குள் வருகிறது என்பதுதான் அதிர்ச்சி செய்தி. குறிப்பாக சென்னை, காஞ்சிபுரம், திருவள்ளூர், செங்கல்பட்டு, திருப்பத்தூர் மற்றும் மேற்குத் தொடர்ச்சி மலை மாவட்டங்களில் இந்த நோயின் தாக்கம் சற்று அதிகமாக இருக்கிறது. 

தொற்றுக்குள்ளான உண்ணிகள் மனிதர்களைக் கடிக்கும்போது நமக்கும் தொற்று பரவுகிறது. உண்ணிகளில் வாழும் பாக்டீரியாக்கள், மனிதனைக் கடிப்பதன் வழியாகப் பரவுகிறது. பூனை, நாய், எலி  போன்று மனிதனிடம் நெருங்கி வாழும் விலங்குகளிடமும் இந்த பாக்டீரியா தொற்று ஏற்படுத்துகிறது என்பது கவனத்துக்குரிய விஷயம்.  

கல்லீரல், சிறுநீரகங்கள் போன்ற முக்கிய உறுப்புகள் செயலிழந்து மரணமடைவதற்கான வாய்ப்பு 30 சதவிகிதமளவுக்கு இருப்பதாக ஆய்வுகள் எச்சரிக்கின்றன. 

ரத்த நாளங்களைச் சுற்றியுள்ள பகுதிகளில் அழற்சி, ரத்த நாளங்களில் கசிவு ஆகியவற்றின் விளைவாக முக்கிய உறுப்புகள் பாதிப்புக்குள்ளாகும். எனவே, மருத்துவரை சந்திப்பதிலும் சிகிச்சை எடுப்பதிலும் காலதாமதம் கூடாது. 

வயது முதிர்ந்தோர், ஊட்டச்சத்துக் குறைபாடு இருப்பவர்கள், கட்டுப்பாடற்ற நீரிழிவு கொண்டவர்கள், கூடவே இதய/ சிறுநீரக/கல்லீரல் சார்ந்த இணை நோய்களைக் கொண்டிருப்பவர்களுக்கு இந்தத் தொற்று ஏற்படும் போது தீவிரத்தன்மையுடன் வெளிப்படும் வாய்ப்புண்டு.

நமது உடலில் கூட ஈரப்பதமும் வெப்பமும் இருக்கும் பகுதிகளான அக்குள், கக்கம் ஆகிய பகுதிகளில்தான் முதலில் கடித்துப் புண் ஏற்படுத்துகிறது. 

ஒருவருக்கு காய்ச்சல் அடிக்கும்போது வேறெந்த அறிகுறிகளும் இல்லாமல் தீவிரக் காய்ச்சல், அதீத தலைவலி, அதீத உடல் சோர்வு இருந்தால்... உடனடியாக உடலில் எங்காவது சிகரெட்டால் வைத்து சுட்டது போன்ற வட்ட வடிவ புண் இருக்கிறதா அல்லது கருப்பு நிறத்தில் வட்ட வடிவில் காய்ந்த புண் இருக்கிறதா என்பதைப் பாருங்கள். உடனடியாக இதை மருத்துவரிடம் தெரிவியுங்கள்.