கல்லூரி மாணவி நான். என் பற்கள் பழுப்பு நிறத்தில் இருக்கின்றன. வெளுப்பாக்க, கடைகளில் கிடைக்கிற ‘ஹோம் கிட்’ வாங்கி முயற்சி செய்தும் பலனில்லை. பல் மருத்துவரிடம் சென்று பிளீச் செய்து கொண்டால் வெளுப்பாகி விடும் என்கிறார்கள் சிலர். அதனால் எந்த பாதிப்பும் வராதா?

பதில் சொல்கிறார் பல் மருத்துவ நிபுணர் யஷ்வந்த் குமார்  வெங்கட்ராமன்

பற்களின் பழுப்பு நிறத்துக்கும் கறைகளுக்கும் இரண்டு காரணங்கள் இருக்கலாம். புகை பிடிப்பது, கஷாயம் குடிப்பது, பான்பராக் போடுவது போன்ற வெளிப்புறக் காரணங்களால் நிறம் மாறுவது ஒரு வகை. பிறக்கும்போதே பற்கள் பழுப்பு அல்லது மஞ்சள் நிறத்தில் இருப்பது இன்னொரு வகை. இதில் முதல் வகைக் கறைகளை ‘டூத் ஒயிட்டனிங்’ சிகிச்சையில் சரியாக்கலாம்.

பிளீச் என நீங்கள் கேள்விப்பட்ட சிகிச்சைதான் இது! இதில் ஒருவித பிரத்யேக அமிலத்தைப் பயன்படுத்துவோம். அதை நீர்க்கச் செய்து, பற்களின் எனாமலில் தடவி விட்டு, ஒருவித விளக்கைக் காட்டி செயல்படச் செய்வோம். அது பற்களின் மேலுள்ள ‘ஸ்மியர்’ என்கிற லேயரை எடுத்து, பற்களை பளீரென மாற்றும்.

பிறப்பிலேயே நிறம் மாறியிருக்கும் பற்களை கேப், லேமினேட் போன்ற வேறு சிகிச்சைகளால்தான் மறைக்க முடியும். இதற்கு டூத் ஒயிட்டனிங் பலனளிக்காது. டூத் ஒயிட்டனிங் சிகிச்சையை 6 மாதங்களுக்கொரு முறை செய்து கொள்ளலாம். அது எந்தவித பக்க விளைவையும் உண்டாக்காது. நீங்கள் சொல்கிற ‘ஹோம் கிட்’ பயன்படுத்தும் முன் முறைப்படி பல் மருத்துவரிடம் போய் பற்களை ஸ்கேலிங் மற்றும் பாலீஷிங் செய்திருக்க வேண்டும். அப்போதுதான் அந்த அமிலம் உள்ளே போகும்.

காபி, டீ, கோலா குடித்த பிறகு வாய் கொப்பளிப்பது, புகை, பான் பராக் பழக்கங்களை விடுவது, சாப்பிட்ட பிறகு பிரஷ் செய்வது... இதெல்லாம் பற்களில் கறை படியாமல் தடுக்கும் இயற்கை வழிகள்!

சமீபத்தில் திருமணமானது. உடனடி கர்ப்பம். இவ்வளவு விரைவாக குழந்தை பெற்றுக்கொள்ள விருப்பமில்லை. ‘முதல் கருவைக் கலைத்துவிட்டால் பிறகு குழந்தையே பிறக்காது’ என மாமியார் வீட்டில் பயமுறுத்துகிறார்கள். உண்மையா?

பதில் சொல்கிறார் மகப்பேறு மருத்துவர் என்.லட்சுமி

நிச்சயமாக அது உண்மையல்ல! குழந்தை இப்போது வேண்டாம் என நீங்களும் கணவரும் உறுதியாக இருந்தால், அனுபவம் வாய்ந்த மகப்பேறு மருத்துவரிடம் பரிசோதித்து, கலைத்து விடலாம். கவலைப்படாதீர்கள். அவரே கர்ப்பமாவதைத் தள்ளிப்போடுவதற்கான முறையான ஆலோசனைகள் வழங்குவார். மாதவிலக்குச் சுழற்சியின் நடுவிலுள்ள 10 நாட்கள் பாதுகாப்பானவை என நம்புவது வழக்கம். ஆனால், பலருக்கு அந்தச் சுழற்சி சரியாக வருவதில்லையே... அதனால் மருத்துவர் ஆலோசனையுடன் கருத்தடைச் சாதனங்களைப் பயன்படுத்துவதே நல்லது.