‘‘ப்பூ... முடிகளைப் போய் திருடியிருக்கிறார்களே... அதில் என்ன கிடைக்கும் என்று உதட்டைச் சுழிக்கலாம். ஆனால், இந்தியாவின் முடி ஏற்றுமதி பல கோடிகளில் புரள்வதை மறக்கக் கூடாது. அதிலும் உலகளவில் இந்திய முடி என்பது தரத்தில் நம்பர் ஒன் இடத்தைப் பிடித்திருக்கிறது...’’ என்கிறார் ஜார்ஜ் செரியன்.

சென்னையில் மனித முடிகளை ஏற்றுமதி செய்யும் ராஜ் இண்டர்நேஷனல் எனும் நிறுவனத்தை நடத்தி வருகிறார் ஜார்ஜ் செரியன். இவரது தந்தையால் தொடங்கப்பட்ட இந்த நிறுவனம் 40 ஆண்டுகளாக இயங்கி வருகிறது. ‘‘மொதல்ல இந்தியாவில் முடிகள் எப்படி கிடைக்கிறது என்ற விஷயத்தை தெரிந்துகொண்டால்தான் இதுபோன்ற திருட்டுகள் ஏன் நடக்கிறது என்பதை புரிந்து கொள்ளமுடியும்.

இந்தியாவில் இரண்டு வகையாக முடிகள் கிடைக்கின்றன. ஒன்று கோயில்களிலிருந்து. மற்றது நம் வீடுகள், சலூனில் இருந்து. கோயில்களில்  மொட்டை போடுவது, முடி தானம் செய்யும் காணிக்கைகள் பலகாலமாக நடந்து வருகின்றன.

அடுத்து நாம் வீட்டில் தலையை சீவும்போது கீழே விழும் முடி, சலூனில் வெட்டும் முடி. இந்த இரண்டு வகையான முடிகளை சேகரிப்பதுதான் இந்தியாவில் ஒரு வியாபாரமாக பலகாலமாக நடக்கிறது. இந்த முடி சேகரிப்பில் 75 சதவீதம் வீடுகளில் இருந்து கிடைக்கிறது என்றால், கோயில்களில் இருந்து கிடைப்பது 25 சதவீதம்தான்.