யார் இந்த லிஸ் ட்ரஸ்..?
இங்கிலாந்தின் புதிய பிரதமராக பதவியேற்கிறார் லிஸ் ட்ரஸ். வெளியுறவுத் துறை அமைச்சராக இருந்தவருக்கு இப்போது பிரதமர் பொறுப்பு. பிரதமர் பதவிக்கு போட்டியிட்ட இந்திய வம்சாவளியைச் சேர்ந்த ரிஷி சுனக்கை வீழ்த்தி மார்கரெட் தாட்சர், தெரசா மேக்குப் பிறகு இங்கிலாந்தின் மூன்றாவது பெண் பிரதமராகியிருக்கிறார் லிஸ்.  ரிஷி சுனக் தோற்றதற்கு சில காரணங்கள் இருக்கின்றன. என்னதான் ரிஷி சுனக் இங்கிலாந்து அரசியலில் நீண்ட காலம் இருந்தாலும் அவர் அந்நியராகத்தான் பார்க்கப்படுகிறார். இங்கிலாந்து அமைச்சரான பிறகும் அமெரிக்க குடியுரிமை வைத்திருந்தது சர்ச்சையானது. அவரது மனைவி அக்ஷதா மூர்த்தியின் இந்திய குடியுரிமையும் விவாதத்துக்குள்ளானது.
இன்ஃபோசிஸ் நாராயண மூர்த்தியின் மகளான அக்ஷதா இங்கிலாந்தில் சம்பாதிக்கும் பணத்துக்கு அங்கு வரி கட்டாமல் இந்தியாவில் கட்டுகிறார் என்ற குற்றச்சாட்டு எழுந்தது. இந்த சிக்கல்களையெல்லாம் ரிஷி சமாளித்து இறுதிச் சுற்றுவரை வந்தார். ஆனாலும் இந்தியாவை ஆண்ட இங்கிலாந்தை ஒரு இந்தியர் ஆள முயல்வதை அந்நாட்டினர் விரும்பவில்லை.
லிஸ் ட்ரஸ் மீதும் சர்ச்சைகள் இருக்கின்றன. இப்போது கன்சர்வேடிவ் கட்சியில் இருந்தாலும் லிஸ்ஸின் ஆரம்ப அரசியல் கன்சர்வேடிவ் கட்சிக்கு எதிரானதாகத்தான் இருந்திருக்கிறது. லிபரல் டெமாக்ரடிக் கட்சியின் உறுப்பினராகத்தான் தனது அரசியலை ஆரம்பித்திருக்கிறார். அப்போது கன்சர்வேடிவ் கட்சியின் தலைவராகவும் இங்கிலாந்து பிரதமராகவும் இருந்த மார்கரெட் தாட்சருக்கு எதிராக நடந்த போராட்டங்களில் லிஸ் ட்ரஸ்ஸின் குடும்பம் பங்கேற்றிருக்கிறது.
‘‘டீன் ஏஜ் பருவத்தில் இளைஞர்கள் தவறு செய்வதில்லையா? பலவித போதைகளில் சிக்கி வழி தவறி நடப்பதில்லையா? அவர்கள் மீண்டும் திருந்துவதில்லையா? நான் அப்படி அந்த சமயத்தில் லிபரல் டெமாக்ரடிக் கட்சியில் இருந்தேன். மன்னித்துவிடுங்கள்...” என்று தன் எதிர்ப்பாளர்களுக்கு பதிலளித்தார் லிஸ்.லிஸ்ஸின் பெற்றோர் தீவிர இடதுசாரிகள். மகள் லிஸ் திடீரென்று 1996ல் கன்சர்வேடிவ் கட்சியில் இணைந்தபோது அவர்களால் நம்பவும் முடியவில்லை, நம்பாமல் இருக்கவும் முடியவில்லை.
லிஸ்ஸின் கணவர் ஹூக் ஒலேரி. அவரும் அரசியலில் இருந்திருக்கிறார். இப்போது கணக்காளராகப் பணிபுரிகிறார். கன்சர்வேடிவ் கட்சி கூட்டங்களில் சந்தித்து காதல் மலர்ந்து இப்போது இவர்களுக்கு இரண்டு குழந்தைகள். மனைவியின் அரசியல் ஆசைகளுக்கு வழிவிட்டு ஒதுங்கி இருக்கிறார் ஒலேரி.2004ம் ஆண்டு கன்சர்வேடிவ் கட்சியின் மூத்த உறுப்பினர் மார்க் ஃபீல்ட் உடன் லிஸ் ட்ரஸ் திருமணத்துக்கு மீறிய உறவு கொண்டிருந்தது வெளியில் வந்தது. ஒரு வருடம் இந்த உறவு நீடித்திருக்கிறது. ஆனால், இந்தப் புயல் இவர்கள் திருமணத்தை பாதிக்கவில்லை. 2000ம் ஆண்டு நடந்த திருமணம் 22 ஆண்டுகளாக தொடர்ந்து கொண்டிருக்கிறது.
எல்லாம் சரி. இப்பொழுது லிஸ் ட்ரஸ் இங்கிலாந்து பிரதமராகி இருப்பதால் இந்தியாவுக்கு லாபமா? ஆம் என்கிறார்கள். முக்கியமாய் இந்திய - இங்கிலாந்து வர்த்தகம் மேம்படும் என கணிக்கிறார்கள். “இந்தியாவுடன் முழுமையான வர்த்தக உறவு தேவைப்படுகிறது. நிதி, பொருட்கள், விவசாயம் என எல்லாவற்றிலும் இணைந்து செயல்பட வேண்டும். அதற்கான ஒப்பந்தம் போடப்பட வேண்டும்...’’ என லிஸ் கூறியிருப்பதை இதற்கு ஆதாரமாக சுட்டுகிறார்கள்.
தவிர சமீபத்தில் இங்கிலாந்து பொருளாதாரத்தை முந்தியிருக்கிறது இந்தியா. உலகின் ஐந்தாவது பெரிய பொருளாதாரமாக இந்தியா உருவெடுத்திருக்கிறது. இங்கிலாந்து ஆறாவது இடத்துக்கு சென்றிருக்கிறது. இந்த சூழலில் இந்தியாவின் தேவை இங்கிலாந்துக்கு அதிகம் இருக்கும் என்றே கருதப்படுகிறது.
யுனைட்டட் கிங்டம்
நமது புரிதலுக்காக இங்கிலாந்து என்று கூறுகிறோம். ஆனால், இங்கிலாந்தின் பிரதமர் என்பது சரியல்ல. இங்கிலாந்து என்பதற்கு பதில் யுனைட்டட் கிங்டம் என்றுதான் சொல்ல வேண்டும். இங்கிலாந்து என்பது யுனைட்டட் கிங்டமில் ஒரு பகுதி.யுகே என்று நாம் எளிதாகக் கூறும் யுனைட்டட் கிங்டமில் இங்கிலாந்து, ஸ்காட்லாந்து, வேல்ஸ், நார்தர்ன் அயர்லாந்து என நான்கு பிரதேசங்கள் இருக்கின்றன.
இங்கிலாந்தின் பிரதமர் என்று நாம் குறிப்பிடுவது இந்த நான்கு பிரதேசங்களுக்கான பிரதமர். இந்த நான்கு பிரதேசங்களையும் தனி நாடுகளாகத்தான் குறிப்பிடுகிறார்கள். அவர்களுக்கென்று தனி நாடாளுமன்றங்கள் இருக்கின்றன. ஆனால், அவற்றையெல்லாம் நிர்வகிப்பது யுனைட்டட் கிங்டமின் நாடாளுமன்றம். கிட்டத்தட்ட இந்தியாவின் மாநில அரசு, ஒன்றிய அரசு என்பது போல்.
சரி, பிரிட்டன் என்றும் கூறுகிறார்களே என்ற கேள்வி எழும். ஆமாம், கிரேட் பிரிட்டன் என்பது பெரிய தீவு. அந்தத் தீவில்தான் இங்கிலாந்து, வேல்ஸ், ஸ்காட்லாந்து இருக்கின்றன.
இத்தனை குழப்பம் இருப்பதால்தான் இங்கிலாந்து என்று பொதுப் பெயரில் அழைத்து எளிதாக்கியிருக்கிறோம்.
என்.ஆனந்தி
|