கருவேல மரங்களை வைத்து நடக்கும் சாதிப் பிரச்னையை இந்தப் படம் பேசுது...

தமிழகத்தில் அதிர்வலைகளை உருவாக்கிய மிகச் சில படங்களின் வரிசையில் ‘மதயானைக் கூட்டம்’ படத்தை நிச்சயம் தவிர்க்க முடியாது. அப்படியான அதிர்வலைகள் கொடுத்தவர் இயக்குநர் விக்ரம் சுகுமாரன். இதோ நீண்ட இடைவேளைக்குப் பிறகு வெளியான இவரின் அடுத்த பட போஸ்டரே மீண்டும் ஒரு தாக்கத்தை உண்டாக்கியிருக்கிறது. ‘இராவணக் கோட்டம்’... கருவேலக் காட்டுக்குள் காளையுடன் தலைதெறிக்க ஓடி வரும் சாந்தனு. ஆர்வமும், கேள்விகளுமாக சந்தித்தபோது மனம் விட்டு பேசத் தொடங்கினார்.

‘இராவணக் கோட்டம்’... எதற்கு இந்தத் தலைப்பு..?

‘தமிழகம்’னுதான் தலைப்பு வெச்சிருக்கணும். ஒரு தமிழ் அரசனுடைய ஊரைப் பத்தி பேசக் கூடிய படம். இராவணன் ஒரு தமிழ் அரசன்தானே. சோழர், பாண்டியர்ன்னு வெச்சிருந்தா அந்த ஏரியா செழிப்பானதா இருக்கும். அதே பட்டியல்ல இராவணன் என்னும் தமிழ் அரசன்னு நினைச்சா வறண்ட பூமியைக் குறிக்கும். அதனால் ‘இராவணக் கோட்டம்’ தலைப்பா வெச்சாச்சு.

எது சார்ந்து படம் பேசப் போகிறது?

விக்ரம் சுகுமாரன் அப்படின்னாலே கிராமம், கிராமத்து களம் இப்படின்னு இருக்கும் அடையாளத்தை உடைக்கணும்னு நினைச்சுதான் ஐடி துறை, அங்கே நடக்கற கதைன்னு ஒரு படம் திட்டமிட்டிருந்தேன். ஆனா, ‘உன் கடையிலே கசாப்புதான் நல்லா இருக்கும், அதையே கொடு’ன்னு கேட்டாங்க. அதனால் ரெண்டாவது படமும் கிராமத்துக் கதைதான்.
காலம் காலமா இருக்கும் கருவேல மர அரசியல், அதற்குப் பின்னணியில் இருக்கற கார்ப்பரேட் யுகம், அதைச் சார்ந்த சாதிப் பிரச்னைகள்தான் ‘இராவணக் கோட்டம்’ படத்தின் அடிப்படைக் கதை.

கருவேல மரம் நம்ம நாட்டுக்குள் வந்ததற்கு வேணும்னா ஆங்கிலேயர்கள் காரணமா இருக்கலாம். ஆனா, அதை அழிக்க முடியாம இருக்க என்ன காரணம், யார் செய்யும் சதி... நிச்சயம் மேலே இருக்கவங்க நினைச்சா கருவேல மரங்களை அடியோடு அழிக்கலாம். ஆனா, அதைச் செய்யாம அதைக் கொண்டு சாதிப் பிரச்னையும், அரசியலும் நடக்குது. அதைத்தான் பிரதானமா இந்தப் படம் பேசும்.

இந்தக் கருவேல மரங்கள் ஏதோ நிலத்தை சுரண்டுது, நீரை உறிஞ்சிதுன்னு மட்டும் நினைக்கிறோம். ஆனா, எதிர்காலத்திலே ஒரு தட்டு சோறு இல்லாத நிலைக்கு நம்மை எல்லாம் கூட்டிக்கிட்டு போகுதுங்கற ஆபத்தை உணர மாட்டேங்கறாங்க. சொட்டுத் தண்ணீர் இல்லாத பூமியா தமிழகத்தின் ஒருபகுதி ஏற்கனவே மாறிடுச்சு. இதே நிலை நீடிச்சா நிச்சயம் உணவுக்கும், நீருக்கும் கையேந்தி நிற்கக் கூடிய அவல நிலை உண்டாகும்.

ஆனா, அதெல்லாம் எதுவும் தெரியாம சாதிச் சண்டையிலே கட்டுண்டு கிடக்கிறோம். எல்லா விவசாய நிலங்களும் போயி, அங்கே கருவேல மரம் வளர்த்து,  கரி உருவாக்கிக்கிட்டு இருக்காங்க. அந்தக் கரி கார்ப்பரேட் உலகத்திலே மிகப்பெரிய மூலப் பொருள். டெக்ஸ்டைல் பிஸினஸில் இந்தக் கரிக்கு அவ்வளவு தேவை இருக்கு. இதனாலேயே விளைநிலங்கள்ல கருவேல மரம் வளர்த்து கரி செய்கிற அளவுக்கு விவசாயிகள் மாறிட்டு வர்றாங்க.

இப்படியே போனா இப்போதைக்கு ராமநாதபுரம் மாவட்டத்திலே மட்டுமே இருக்கற தண்ணி வண்டி பயன்பாடு தமிழகம் முழுக்கவே வந்திடும். பொண்ணக் கட்டிக் கொடுத்தா சீரா தண்ணி வண்டி கொடுக்கற அளவுக்கு அங்கே நிலமை மோசமாகிடுச்சு. அதாவது பல மைல்கள் தூரம் போயி தண்ணி கொண்டு வர்றதுக்குன்னே பிரத்யேகமா உருவாக்கப்பட்ட வண்டி அது.  அது மாறணும்ங்கற அரசியல்தான் ‘இராவணக் கோட்டம்’ படம் பேசும்.

சாதிச் சண்டை சார்ந்த படங்கள் எத்தனையோ நாம பார்த்திருக்கோம்... இந்தப் படம் சமகால சாதி அரசியலையும் பேசுமா?

முன்பை விட இன்னைக்கு சாதிப் பிரச்னை நவீனமயமாகியிருக்கு. முன்பெல்லாம் கிராமத்திலே படிக்காத, பாமர மக்கள் கிட்டே இருந்துச்சு. ஆனா, இன்னைக்கு கையில் இருக்கும் மொபைலில் சமூக வலைத்தளங்கள்ல சர்வ சாதாரணமா படித்த, நவீன யுக மக்கள் கிட்ட, கார்ப்பரேட் அலுவலகங்கள் தொடங்கி, பள்ளி, கல்லூரியிலே சாதிப் பிரச்னை நடக்குது.

எப்படி மண்ணுக்கு கருவேல மரம் விஷமோ, அப்படி மனுஷனுக்கு இந்த சாதி விஷம். குறிப்பா இளைஞர்கள் தங்களுக்குப் பின்னாடி சாதிப் பெயர்களை வெச்சிக்கிட்டுதான் சமூக வலைத்தள அக்கவுண்ட் பெயரையே பயன்படுத்துறாங்க. அந்த அளவுக்கு இன்னைக்கு சாதி அரசியல்ல நாம அடைஞ்சுகிடக்கிறோம்.

இதை எப்படி களையெடுக்கப் போகிறோம்னு தெரியலை. அப்படியான சமகால சாதிப் பிரச்னையும் இந்தப் படத்திலே இருக்கும்.

பெரும்பாலும் சாதியே வேண்டாம்னு சினிமாவிலே பேசினால் கூட அதுவும் இன்னொரு விதமான சாதிப் பிரச்னையை உருவாக்கிடுதே?