மலையாளத்தில் புகழ் பெற்ற இசையமைப்பாளர் ஸ்ரீஜித் எடவானா. இவர் தமிழில் ‘டி3’, ‘மியாவ்’ போன்ற படங்களுக்கும்; இந்தியில் ‘காமசூத்ரா’ உட்பட சில படங்களுக்கும் இசையமைத்துள்ளார். 

இப்போது இவர் இயக்குநராக ‘சிகாடா’ படத்தின் மூலம் அடியெடுத்து வைத்துள்ளார். பான் இந்திய படமாக உருவாகும் இந்தப் படத்துக்காக 24 பாடல்களை உருவாக்கியிருப்பதுதான் சினிமா உலகின் பேசுபொருளாக மாறியுள்ளது. சமீபத்தில் இதன் ஃபர்ஸ்ட் லுக் போஸ்டரை விஷால் வெளியிட்ட நிலையில் இயக்குநர் ஸ்ரீஜித் எடவானாவிடம் பேசினோம்.

எனக்கு சினிமா பேக்ரவுண்ட் எதுவும் கிடையாது. சின்ன வயதிலேயே கிளாசிக் மியூசிக் கத்துக்கிட்டேன். ஏ.ஆர்.ரஹ்மான் சாரின் ‘ஜென்டில்மேன்’, ‘காதலன்’ போன்ற ஆரம்பகாலப் படங்களின் பாடல்கள் இசைத் துறைக்கு வர வேண்டும் என்ற பெரிய தாக்கத்தைக் கொடுத்தது. சென்னையில் ஆடியோ என்ஜினியரிங் முடித்துவிட்டு கீரவாணி, தேவா, தமன் போன்ற இசையமைப்பாளர்களிடம் ரிக்கார்டிஸ்ட்டாக வேலை பார்த்தேன். 

அந்த சமயத்தில் நான் ஒரு தனி ஆல்பம் உருவாக்கியிருந்தேன். பிரபல இயக்குநர் அல்போன்ஸ் புத்திரன் என்னுடைய நெருங்கிய நண்பர். அவரிடம் பாடலைக் கொடுத்ததும் விஷுவல்ஸ் ஷூட் பண்ணிக் கொடுத்தார். அந்த ஆல்பத்தில் நிவின் பாலி, நஸ்‌ரியா நடித்தார்கள். சொல்லப் போனால் எங்க நாலு பேருக்கும் அந்தப் பாடல்தான் முதல் ப்ரொஃபஷனல் அனுபவமா இருந்துச்சு.

இது முழுக்க முழுக்க காடுகளில் நடக்கும் கதை. காடுகளில் படப்பிடிப்பு என்பதால் படப்பிடிப்புத் தளத்துக்கு நடந்துதான் செல்ல வேண்டும். ஒரு டெக்னீஷியன் மாதிரி வேலை பார்க்கக் கூடிய நடிகர் தேவைப்பட்டார். 

படத்தில் ஹீரோவுக்கு டூப் கிடையாது.  அருவியிலிருந்து  குதிப்பது, மலைச் சரிவுகளில் உருள்வது என பல ரிஸ்க் காட்சிகள் உள்ளது.நடிகர் ரஜத் என்னுடைய நண்பர். அவர் எல்லா ரிஸ்க்கையும் சந்திக்க முன்வந்தார். மலையாளத்தில் பல படங்களில் ஹீரோவாக நடித்துள்ளார் ரஜத். இதுவரை பண்ணிய படங்களிலிருந்து முற்றிலும் மாறுபட்டு நடித்தார்.

சர்வைவல் படம் என்றாலே ரியலிஸ்டிக்கை எதிர்பார்ப்பாங்க. மலையிலிருந்து குதிக்கிற காட்சிகளை டூப் இல்லாமல் பண்ணினார். படத்துல நரி, செந்நாய் என சில வனவிலங்குகள் இருக்கிறது. பயிற்சி கொடுக்கப்பட்ட விலங்குகளாக இருந்தாலும் எப்போது மூடு மாறி தாக்கும் என்பது தெரியாது. அந்த தாக்குதலில் இருந்து தப்பிக்கவே ரஜத் விலங்குகளுடன் பல நாட்கள் பழகினார். 

பின்னணி இசையைவிட பாடல்கள் உருவாக்குவது எனக்கு பிடிக்கும். ஒரு பாடல் உருவாக்குவதற்கு இயக்குநர்கள் சொல்லும் சிச்சுவேஷன் போதும். ஏனெனில், சிச்சுவேஷனை மையமாக வைத்துதான் பாடல்களை உருவாக்க முடியும். 

நான் நம்புவது, ஒருவருக்கு மியூசிக் தெரிந்தாலும் அவருக்குள்  பொறி உருவாக வேண்டும். அப்போது நம்முடைய வாழ்க்கை அனுபவம், காதல், எமோஷனல், மகிழ்ச்சி, துக்கம் என எல்லாம்  கனெக்ட் ஆகிவிடும். அப்படி சிச்சுவேஷனை ஃபீல் பண்ணும்போது உள்ளுக்குள் ஒரு டியூன் பிறக்கும்.