அமைதிக்கு பெயர்தான் நர்கீஸ்!

இந்த ஆண்டு அமைதிக்கான நோபல் பரிசு ஈரான் நாட்டைச் சேர்ந்த சமூக செயற்பாட்டாளர் நர்கீஸ் முகமதிக்கு அறிவிக்கப்பட்டுள்ளது. ஈரானில் பெண்கள் மீதான ஒடுக்குமுறைக்கு எதிராக குரல் கொடுத்து வருவதற்காகவும், மரண தண்டனையை எதிர்த்தும், மனித உரிமைகளுக்காக போராடி வருவதற்காகவும் இந்த விருது அவருக்கு அறிவிக்கப்பட்டுள்ளது.

51 வயதான நர்கீஸ், ‘டிஃபன்டர்ஸ் ஆஃப் ஹூமன் ரைட்ஸ் சென்டர்’ என்கிற அமைப்பின் துணை இயக்குநராக இருப்பவர். ஈரானிய அரசு அவரை 13 முறை கைது செய்துள்ளது. ஐந்து முறை குற்றவாளி எனத் தீர்ப்பளித்துள்ளது. இதனால், 31 ஆண்டுகள் சிறைத்தண்டனை பெற்ற நர்கீஸ், 154 கசையடிகளும் வாங்கியுள்ளார். இந்த விருது அறிவிக்கப்படும்போதுகூட அவர் தெஹ்ரானில் உள்ள அரசியல் கைதிகள் அடைக்கப்படும் எவின் சிறையில் இருக்கிறார்.

கடந்த ஆண்டு போலீஸ் கஸ்டடியில் 22 வயதான மஹ்சா ஜினா அமினி என்ற பெண் கொல்லப்பட்டார். இதனால், ஈரான் ஆட்சிக்கு எதிரான அரசியல் ஆர்ப்பாட்டங்கள் தொடங்கின. அப்போது ‘பெண் - வாழ்க்கை - சுதந்திரம்’ என்கிற இலக்கில் போராட்டம் முன்னெடுக்கப்பட்டது. இதற்குக் காரணமாக இருந்தார் நர்கீஸ். அரசுக்கு எதிராக பரப்புரை செய்ததாலேயே அவர் இப்போது சிறையில் உள்ளார்.

1972ல் பிறந்த நர்கீஸ் இயற்பியலில் பட்டம் பெற்று எஞ்சினியர். பெண்ணுரிமை, சமத்துவம் குறித்து பேசியவர், பத்திரிகையாளராகவும் பணியாற்றினார். பல்வேறு சமூக சீர்திருத்த பத்திரிகைகளில் மரண தண்டனையை ஒழிப்பது குறித்தும், பெண் உரிமைகள் குறித்தும், போராடுவதற்கான உரிமைகள் பற்றியும் குறிப்பிட்டார்.