ராகுல் டிராவிட் + சச்சின் டெண்டுல்கர் = ரச்சின்! C/O நியூசிலாந்து

கடந்த வாரம் 13வது உலகக் கோப்பை ஆண்கள் கிரிக்கெட் போட்டி இந்தியாவில் விறுவிறுப்பாக துவங்கியது. இதன் துவக்க போட்டியில் நியூசிலாந்து அணியும், இங்கிலாந்து அணியும் மோதின. குஜராத் மாநிலம் அகமதாபாத்தில் நடந்த இந்தப் போட்டியில் நியூசிலாந்து அணி சிறப்பான வரலாற்று வெற்றியைப் பதிவுசெய்தது. முதலில் விளையாடிய இங்கிலாந்து அணி 50 ஓவர்களில் 282 ரன்கள் எடுத்தது. பின்னர் விளையாடிய நியூசிலாந்து அணி 36 ஓவர்களில் இந்த ரன்னை எளிதாக எட்டியது. இதற்குக் காரணம் இருவர்.  

ஒருவர் தொடக்க ஆட்டக்காரர் டெவான் கான்வே. நமக்கெல்லாம் நன்கு பரிச்சயமானவர். ஐபிஎல்லில் சென்னை சூப்பர் கிங்ஸ் அணிக்காக ஓபனிங் செய்பவர்.
மற்றொருவர் ரச்சின் ரவீந்திரா. பெயரைப் பார்த்ததுமே இந்தியர் என்று கணித்துவிடலாம். யெஸ். இந்தியரேதான். இவரே இப்போது உலகின் அத்தனை கிரிக்கெட் ரசிகர்களையும் கவர்ந்திருக்கும் வீரர். வழக்கமாக ரச்சின் நியூசிலாந்து அணிக்காக நான்காவது அல்லது ஐந்தாவது வீரராகதான் களமிறங்குவார்.

ஆனால், அன்றைய போட்டியில் நியூசிலாந்து அணி கேப்டன் கேன் வில்லியம்சன் காயம் காரணமாக விளையாடவில்லை. இதனால், தொடக்க ஆட்டக்காரர் வில் யங், டக்அவுட்டில் வெளியேறியதும், வில்லியம்சனுக்குப் பதிலாக யாருமே எதிர்பார்க்காத நிலையில் முதல் வீரராக வந்தார் ரச்சின்.அவரின் விக்கெட்டை எளிதாக வீழ்த்திவிடலாம் என்றே இங்கிலாந்து அணியினர் நினைத்திருக்கக்கூடும். ஆனால், நடந்தது அதுவல்ல. அவரின் அதிரடி வேறலெவலாக இருந்தது. இங்கிலாந்து வீரர்களே திணறிப் போயினர்.

96 பந்துகளில் 123 ரன்கள் சேகரித்து நியூசிலாந்தின் வெற்றிக்கு டெவான் கான்வேயுடன் கைகோர்த்து நின்றார் ரச்சின். இதில் ஐந்து சிக்சர்களும், பதினோரு பவுண்ட்ரிகளும் அடக்கம்.
இதுமட்டுமல்ல. 82 பந்துகளில் சதம் கடந்து உலகக் கோப்பையில் வேகமாக சதமடித்த இளம் நியூசிலாந்து வீரர் என்ற சாதனையையும் படைத்தார் ரச்சின். தவிர, இதுவே அவரின் முதல் ஒருநாள் போட்டி சதம் என்பதும் குறிப்பிடத்தக்கது. அன்றைய போட்டியின் சிறந்த வீரருக்கான விருதும் வென்றார் ரச்சின்.  

சரி, தலைப்பிற்கும் இதற்கும் என்ன சம்பந்தம் என்கிறீர்களா?

இருக்கிறது. ரச்சின் (Rachin) என்கிற பெயரே ராகுல் டிராவிட் (Rahul), சச்சின் (sachin) என்ற ஜாம்பவான்களின் பெயர்களில் இருந்து எடுத்து வைக்கப்பட்டது என்பதுதான்!
ரச்சின் ரவீந்திராவின் தந்தை ரவி கிருஷ்ணமூர்த்தி பெங்களூரைச் சேர்ந்தவர். சாஃப்ட்வேர் துறையில் பணியாற்றுபவர். பெங்களூரில் கிளப் லெவல் கிரிக்கெட் போட்டிகளில் பங்கெடுத்தவர். முன்னாள் இந்திய வேகப்பந்து வீச்சாளர் ஜவகல் ஸ்ரீநாத்தின் நண்பர்.