பசிக்காக ரொட்டித்துண்டைத் திருடுகிறவர்கள் பரிதாபமாக மாட்டிக்கொள்கிற நாட்டில், கள்ளத்தனமாக பொதுச்சொத்தைத் தின்ற ரெட்டி சகோதரர்கள் ராஜபோக வாழ்க்கை வாழ்ந்திருக்கிறார்கள். சட்டமும் ஆட்சியும் எப்படி அனுமதித்ததோ தெரியவில்லை!

விளை நிலங்களை விலைநிலங்களாக்கி வரும் கூட்டத்துக்கு மத்தியில் அபிநவம் கிராமத்து ஜெயராமன் ஒரு ஆச்சரிய மனிதர். 'மண்ணின் மைந்தன்' பட்டத்துக்குத் தகுதியானவர்!

'ஓய்வென்பது மனசுக்கில்லை' என்று புரிய வைத்தது 'அறுபதில் தொடங்குது வாழ்க்கை' கட்டுரை. சீனியர் சிட்டிசன்களின் அனுபவங்கள் பலருக்கும் பயனுள்ளவை.

- பானு பெரியதம்பி, சேலம்-30.

எலும்பும் தோலுமாக அந்தப் பிஞ்சுகளின் தோற்றமே நிலைமையின் வீரியத்தை உணர்த்துகிறது. சோமாலிய மக்களின் சோகம் களைய உலகம் எந்தவொரு நடவடிக்கையும் எடுக்கவில்லை என்றால் ஐ.நா. போன்ற அமைப்புகள் இருந்தென்ன லாபம்?

தந்தையை இழந்த சோகம் மிச்சமிருந்தாலும் ராஜீவ் கொலைக்குற்றவாளிகள் குறித்த கேள்விக்குப் பக்குவத்துடன் பதில் சொல்லியிருந்தார்கள் எட்வர்டு ஜோசப்பின் மகள்கள்.

இன்னொரு சினிமாவைக் காப்பியடிக்கிற கலாசாரத்தை மீடியாதான் திருத்த வேண்டும் என்கிறார் செல்வராகவன். 'கற்பனை ஒரேமாதிரி இருக்காதா' என வியாக்கியானம் பேசுபவர்களை என்ன செய்ய முடியும்? இயக்குனர்களாகப் பார்த்துத் திருந்தாத வரை, காப்பியடித்தலையும் கட்டுப்படுத்த முடியாதென்றே தெரிகிறது.

அலைவரிசை ஒத்துப்போனால் பிரச்னைகள் ஓடிப்போகத்தானே செய்யும்? வெங்கட்பிரபு & சக்தி சரவணன் ஜோடியின் வெற்றி ரகசியம் இதுதான்.

எங்கள் அபிமான டிவி நடிகைகளின் பேட்டிகளை வாராவாரம் தந்து அசத்துகிறீர்கள். 'மிஸ் கண்ணழகி' ஸ்ரீலக்ஷ்மியின் பேட்டி ரசிக்கும்படி இருந்தது.

சுவடுகளில் கணபதி ஸ்தபதி பற்றிய சேதி படித்ததும், இருவாரங்களுக்கு முன் வெளியாகியிருந்த அவரது பேட்டிதான் கண்முன் வந்தது.

- ச.தியாகராஜன், பொள்ளாச்சி.    .

'எவரது தொலைபேசி அழைப்பையும் ஏ.ஆர்.ரஹ்மான் புறக்கணிப்பதில்லை' என்று தெரிந்துகொள்ள வைத்தது நியூஸ் வே.

'பொக்கே'யில் பணம் சம்பாதிக்க வழிசொல்லித் தந்த 'வீட்டிலிருந்தபடியே சம்பாதிக்கலாம்' பகுதி, எங்கள் வாழ்வில் வசந்தத்தை வரவழைக்கும் என்று நம்புகிறோம்.

- மரகதச்செல்வி, பனையடிப்பட்டி.