- இப்படி ஒரு பெண்ணின் மென்மையான காதல் வரிகள், மெலோடியான  இசை, சென்னையின் தெரிந்த கிளாசிக் பகுதிகளில் ஓர் இளம் ஆண், பெண்ணின் சந்திப்பு, அதைச் சார்ந்த காட்சிகள் என நீண்ட இடைவேளைக்குப் பிறகு ஒரு மென்மையான தனியிசை பாடல் மில்லியன்களைக் கடந்து டிரெண்டாகியிருக்கிறது. 

இப்போதும் டிஜிட்டல் உலகத்தில் பீட்டான, இளைஞர்களை இழுக்கக்கூடிய வார்த்தைப் பிரயோகங்கள் மட்டுமே உடனடி டிரெண்டிங்கை சந்திக்கும். ஆனால், பிரகதி குரு இசை மற்றும் குரலில், பிஏ ஹரிஹரன் வரிகளில் ‘அடடா நீ அழகா...’ என்னும் பாடல் வெளியாகி நான்கு நாட்களில் ஒரு மில்லியன் பார்வையாளர்களைக் கடந்து டிரெண்டிங்கில் உள்ளது.

ரொம்ப நாட்களுக்கு முன்னாடியே இந்தப் பாடல் மேக்கிங் முடிச்சிட்டோம். வைரல் சவுத் டீம் உள்ளே வந்ததும் பாடல் இன்னும் பிரம்மாண்டமா மாறிடுச்சு. ஒரு பொண் ணு... அவளுடைய முதல் காதல், அந்தச் சந்திப்பு எப்படி இயல்பா நடக்கும், ஒரு பொண்ணுக்கு பிடிச்சா எந்த மெனக்கெடலும் தேவையே கிடையாது.

அழகா இயல்பா அந்தச் சந்திப்பு நட்பாகவும் காதலாகவும் மாற ஆரம்பிச்சுடும். இந்த ஓர் அடிப்படை விஷயத்தை மையமாக வைத்துதான் இந்தப் பாடல். அதில் சென்னையின் அழகு... இப்படி யோசிச்சு உருவானதுதான் இந்த பாட்டு.

இப்போ கொஞ்சம் வீட்டில் தைரியமா நாடு விட்டு நாடு போக அனுமதி கொடுக்குறாங்க. கலிபோர்னியாவில் நான் லா (சட்டம்) படிச்சிருக்கேன். எதுவுமே நான் திட்டமிடலை. மேலும் வீட்டிலும் எல்லோருமே ரொம்ப சாதாரணமா சங்கீதம் கத்துக்குவாங்க. ஆனால், அதை ப்ரொஃபஷனலா எடுத்துக்க மாட்டாங்க. 

அப்பாதான் என்னுடைய முதல் குரு. அஞ்சு வயதில் இருந்து மியூசிக் பயிற்சி எடுக்கறேன். தொடர்ந்து சங்கீதம் சுவாமிநாதன் குருகிட்ட மேற்கொண்டு இசைப் பயிற்சி. ரியாலிட்டி ஷோ... அடுத்து சினிமாவில் பாட வாய்ப்பாக ‘பரதேசி’, ‘வணக்கம் சென்னை’, ‘காதலும் கடந்து போகும்’, ‘தீரன் அதிகாரம் ஒன்று’, ‘ராட்சசன்’ உள்ளிட்ட 10க்கும் மேலான படங்களில் 20க்கும் மேற்பட்ட பாடல்கள்.